اليوم ماراح اكتب عن منتج او اي مكياج لكن بسولف عليكم بنطاق الميك اب بما اني تميت شهر على افتتاح المدونه بشكل رسمي حبيت اتشارك معكم بالقرقه والثرثره طبعا قبل سنة افتتحت المدونه وشاركت فيها كم مشاركه بعدين تركتها ولما شفت التفاعل بالتويتر قررت اعيد التجربه وفعلا كانت خطوة موفقه خصوصا مع التفاعل الجميل من البنات الله يعافيهم ♥ .
سبب افتتاحي للمدونه اني احب اساعد البنات بكل صدق وامانه وخصوصا ان عندي شغف وحب للميك اب وتركيبته والوانه وين انصنع... الخ من التفاصيل الداخليه والخارجيه .
وبالفتره الاخيره كثير بنات منهم صديقاتي يسألوني وش اشتري كريم اساس او وش حاطه روج يجنن هاللون وكنت افرح بهالشي واكبر وناسه لي لما عروس طلبت مني اتسوق لها منتجات الميك اب حسيت اني ثقه هههههه .
بدايتي بالميك اب زي اي بنت يومها بزر كانت تحب (تبربس) بالميك اب ولما راهقت كرهته وبعدين مع بدايه النضج بدت العلاقه العشقيه .
لكن قصه العشق لازم تتحارب بشكل ما.. بالبدايه ماكنت واثقه اني اقدر احط هاللون او هالروج او يصلح احط هالشدو كان فيه رهبه من الآلوان ورهبه اني استخدم اشياء احترافيه ويبي لها شغل !
بعد اكتساب الثقه بنفسي من خلال الجرأه والتحدي واجهت مشكله ثانيه اللي هي الناس المعادين للميك اب ونشوفهم كثير عندنا منتشرين اللي يدعون انهم يحبون البنت على الطبيعه !... وياي نحب البنت الناتشورال ... ويع وش هالميك اب الفيك .. الخ
والا مانلقى احد من هالنوعيه يمكن قلوا بالفتره الاخيره وصار فيه وعي عند البنات لكن بالفتره اللي بديت فيها كان شبه محارب اللي تحط ميك اب عشان تستمتع او عشان تنبسط كان الميك اب محصور بالاعراس والمناسبات وغيره مفروض روج وبس اما بالنسبه للبنت اللي تحط ميك اب وتدهر بعمرها وهي ماتزوجت ؟ هذا عيب ... ماقلت لكم حرب ;d
الحمدلله هالامور شبه اختفت والبنات صار اكبر اهتمامهم الاهتمام والتنافس صار على اوجه ههههه تنافس شريف : )
للأسف سوقنا مازال فقير بالمنتجات الماركات الجديدة شبه معدومه والكولكشنات اذا نزلت تنزل بعد مايخلص الموسم وناقصه بعد لكن الحمدلله التسوق بالنت فتح الباب للبنات واعرف كثير ناس صاروا ماينزلون يتقضون للميك اب نهائيا كله من النت ماعدا الفاونديشن والاشياء السائله لأنها ممنوعه فهاذي نعمه يارب لك الحمد .
تدوينتي هالمره عشوائيه لكن الهمني ان كثير من البنات مايعرفون للميك اب لكن عندهم حب وتطلع بهالموضوع بالنسبه للي عندهم رغبه اقولها جربي وافشلي وانجحي وعيشي حياتك الميك اب مافيه ١+١ = ٢ ببساطه ماتمشين على كلام فلانه او هالمقاله وتنجحين يحتاج الموضوع لمستك انتي ونظرتك انتي
اعرف حريم كبار ماقد حطوا ميك اب ليه ؟ تقول تعودت واحس من جواتها تبي هالشي لكن حاجز الرهبه يمنعها تجرب تشوفينها من وين هذا حلو هذا بس اذا جت للتطبيق توقف النوعيه يبي لهم تشجيع وتحفيز بالبدايه جربي تشترين الاساسيات تعلمي رسمات الكحل وتعلمي السموكي ايز اليوتيوب مليان فديوهات تعليميه روعه من خبراء تجميل محترفين الموضوع سهل مره مب زي اول نفتح المجلات ولا نشوف برامج التي في وكلها كلام غامض ومبهم ( ضعي الظلال على الجفن ولا استخدمنا هالنوع من الاساس ) كل شي صار سهل مع النت ولله الحمد : )
بالنسبه للمبتدأت انصحهم يشترون الميك اب من الميزانيه الممحدودة وكتبت عنه هنا كثير وراح اطرح الكثير مستقبلا ان شاء الله لأنه بالآول لازم تشوفين نفسك اذا فعلا الموضوع عجبك تبدين تجمعين لك كولكشن جميل وتستمتعين فيه اما اذا كان (طفه) فأنتي ماخسرتي شي ;)
بالنهايه الميك اب عالم واسع تبينه كمهنه تقدرين .. تبينه كتسليه تقدرين .. تبينه كتجميع وهوايه برضو لك فرصه واسمى غرض بالنسبه لنا يامعشر النساء هو ابراز الجمال ♥♥♥.
اتمنى ماطولت عليكم بالهذره بس حبيت اسولف عليكم
احب اشكر الجميع على التفاعل والزيارات من جميع انحاء العالم شي يفرح مره
اتمنى اشوف مشاركاتكم وسواليفكم ومتابعتكم معي حابه فعلا اعرف مين يقراني !! ولاتنسون الاشتراك في المدونه : )
احبكم جميعا ♥