Monday 24 December 2012

تجاربي لمكياج بربري BURBERRY MakeUp


مرحبا فيكم بنات ان شاء الله كلكم بخير وطيبين .. 
الاغلب هالفتره عندهم اختبارات ومذاكره دعواتي لكم بالتوفيق والسداد ..
تدوينتي اليوم عن مكياج بربري ماركه بربري عريقه بدأت بصناعه الجلديات والمعاطف والاحذيه وتعتبر من الماركات الهاي ايند قبل سنتين تقريبا نزلت بربري كولكشن للميك اب من الفاونديشن حتى الفرش والجودة رائعه جدا والصناعه ايطاليه
كنت بسوي ريفيو عن الروج والشدو وتأخرت عشان اضم البلشر معهم وتكون تجربه شامله لبعض المنتجات ..


Burberry Taupe Brown NO.07

شدو بني رمادي (توبي) مطفي يتوزع ويندمج بكل سهوله ثباته يستمر اكثر من ٧ ساعات مع البرايمر يجي معاه فرشه اسنفجيه اللون جميل جدا وكنت محتاره باختيار لون والحمدلله توفقت بالاختيار لون مش مكرر عندي .. جميل جدا لو حطيتيه على كسره الجفن او قاعده للسموكي براون ايزقد شفت وحده بلوق اجنبيه تسوي فيه كونتور ماحسيت انه مناسب ابدا بس ممكن تجربوا لو حابين .


Burberry Blossom Light Glow NO.05

 

بلشر كورالي فيه لمسه اللون الوردي فيه شيمر خفيف جدا يجي معاه فرشه لونه طبيعي ويعطي لوك صحي ومناسب للصباح .. اللمعه اللي فيه تختفي ماحسها ثابته ومايزعجني هالشي بالعكس ..

  Burberry Cameo Pink NO.03

روج لونه وردي خوخي سهل جدا بالتوزيع التغطيه متوسطه فيه لمعه خفيفه وناعمه .. جميل جدا بس كان ودي يكون تغطيته اكثر من كذا احتاج معه برايمر او محدد قبله عشان يعطيني اللون الاصلي .

*الماركه جدا جميله وثباتها ممتاز يمكن الروج هو اقل شي عجبني يميز ماركه بربري الوانهم الطبيعيه الخاليه من الجرأه يعني مناسبه للجميع الاعمار .. لما شريت منهم عطوني مزيل المكياج الحليبي من نفس الشركه كتبت عنه هنا .. العلب جميله وفاخره وتتسكر بالمغناطيس تنفع هدايا لو حابه تهدين احد شي مميز  .. يعيبهم الاسعار المرتفعه .
 كثير بنات يمدحون الفاونديشن حقهم وجربت سامبل عطوني اياها وماتوفقت باللون بس ماتوقع اشتريه حسيته بالتوزيع ثقيل .
ان شاء الله يكون هالريفيو مفيد لكم ويساعدكم باختياراتكم مستقبلا .. 
 *للاشتراك في مدونتي اضغطي على الرابط الموجود في اليمين بالضغط على .
*  هنا التويتر ( تويتر نوره بيوتي بوكس )
 

Thursday 20 December 2012

فرشتين لمكياج العيون للميزانيه المحدوده



 مرحبا 
اتمنى الجميع بخير ... واهنيكم على هالاجواء الجميله اللي كل يوم اجمل من الثاني .. يعني صحيح جونا طول السنه حر بس هالايام تعوضنا وتعيشنا جو ..
المهم كثير بنات بتعليقات المدونه او يرسلون لي بالايميل يطلبون مني اكتب عن فرش رخيصه .. لأن الفرش بصراحه غاليه خصوصا اللي مصدرها حيواني او طبيعي .. زي فرشه من ماك توصل لميتين اما العيون تكون ١٥٠ ريال وكثير بنات تبي شي بسيط وتكون بالبدايه فماتبي تغامر .. 
في رحله الاستكشاف لقيت فرشتين للعيون وبعد التجربه لقيت الجوده نظرا للسعر تعتبر ممتازه تعالوا نستعرض هالفرشتين :


فرشه توزيع الظلال من ستديو بيسكس تستخدم لتوزيع الظل على كامل الجفن او للدمج بشكل طبيعي من الدانوب سعرها ٣٥ ريال وتقدرين تستخدمينها لتوزيع الآضاءه بشكل خفيف مثلا على عظمه الخد او الأنف شريتها من الدانوب فرع حياة مول - الرياض

الفرشه الثانيه فرشه السموكي وهي فرشه قلم ( تقريبا نفس فكره ماك ٢١٩ تستخدم على كسره الجفن لرسم خط مموه او اذا كنتي مثلا تبين تدمجين الكحل من فوق او تحت وماتبين يكون خط مرتب .. من ماركه اسنسي سعرها عشر ريال شريتها من صيدليه وايتس فرع الحمراء - الرياض الفروع الثانيه مادري اذا موجودة او لا ..

فيه فرشه قد كتبت عنها من اتش اند ام وهي للعيون برضو وكانت ممتازه هنا (مشتريات المكياج للبنت الجامعيه ) 
 تذكري ان المكياج والفرش مش محصوره على البروفشينال والميك اب ارتست تقدرين تسوين اجمل لوك واجمل ميك اب بارخص الاسعار ..
ان شاء الله تكون هالتدوينه مفيده ياجميلات والقاكم بوقت اجمل بأذن الله : ) 

*للاشتراك في مدونتي اضغطي على الرابط الموجود في اليمين بالضغط على .
*  هنا التويتر ( تويتر نوره بيوتي بوكس )

Thursday 13 December 2012

منتجات ندمت عليها ٢ product i regret buying 2


مرحبا ♥ :)
تذكرون قبل فتره كتبت عن منتجات ندمت تقدرين تشوفين التدوينه القديمه هنا عليها جيتكم من جديد ومعي اشياء ندمت عليها .. مع اني اقرا قبل اشتري واتفحص واسأل بس لابد يطلع شي ما يناسبني .. او اجربه ومع الايام اكتشف انه مايستحق !


طبعا لو اقولكم حماسي قبل سنه على هالارواج ماتصدقون مع حماس البنات عليهم قلت مب ارواج معجزه وفعلا نزلت بعد ٨ اشهر في اسواقنا .. وما انكر انها عجبتني الى حد ما واستخدمها الى يومكم هذا ترطب والوانها جميله وريحة الارواج تفتح النفس .. مشكلتي مع الثبات ماتثبت ابدا ابدا استغرب انه ٥٠ او ٦٠ ريال ماتوقع راح اشتريهم مره ثانيه ابدا فيه ارواج بنفس هالسعر وتثبت لمده اطول ..
 روج ايف سان لوران برضو ثباته سيئ لونه جميل جدا لكن مايثبت ابدا ابدا خصوصا هالنوعيه الانواع الثانيه جميله وقد كتبت عن ثنين روعه بس العلبه اللي يكون فيها ابيض الظاهر فيها مشكله ومشكلتها سايحه بزيادة .



مسكارا استي لودر ..مادري شلون شريت هالمسكارا سيئه وثقيله بس خلصتها عشان حرام فلوسها 
الثانيه ماتخفى على الكثير واستغرب من الناس اللي يحبونها واحسدهم واقول الله يهنيكم : ) ماضبطت معي ابدا 


هالمنتج  من تو فيسد قلوس شفاف يتحول للون وردي ثابت فكره هالمنتجات حلوه للمراهقات مشكلته يدبق وانا ماحب هالنوعيه ابد بس للامانه القلوس ثابت من بكرا ماراح : ) . 

فرشه ماك ١٨٧ من زمااااان شاريتها هالفرشه واقدر اقول ماستفدت منها بالشكل اللي كنت اتمناه كبيره مره فيه اصغر منها هي اللي ممتازه (اهم شي ظل يديني بالتصوير متحمسه هههه ).

ماسك للشعر من بوتس .. بعترف لكم اعتراف .. منتجات بوتس ماتفقنا انا وياها ابدا مدري العله مني او منهم اشياءهم مغريه ومتنوعه لكن الجوده سيئه على الاقل الاشياء اللي جربتها قريبه لمنتجات كارفور .
الماسك لو ما احطه يطلع شعري احسن < اسهل وصف : ) 
اللي جمبه مدري وشو بالضبط هههه فعلا مادري شريته والبائع قال لي تحطينه بعد الاستحمام ويخلي الشعر الكيرلي كيرلي بشكل مرتب مالاحظت هالشي ابدا يخلي الشعر دهني قريسي ! 


نجي للشي اللي ندمت وماندمت عليه هالشمعه من لوكسيتان روحوا للمحل وشموها بس يالهي اجمل ريحه شمعه شميتها بحياتي روووووعه مميزه وفخمه وتنفع عطر .. المشكله لم احترقت ماحترقت بالتساوي يعني اللحين فيه شمع كثير على الحواف حاولت اميعها ماقدرت يوم رحت لوكسيتان اخر مره قال جربي الزيت ترا احسن معترف ان فيها مشكله ! صرت افتحها واشمها واسكرها :(

وبس خلصنا .. : )
*للاشتراك في مدونتي اضغطي على الرابط الموجود في اليمين بالضغط على .
*  هنا التويتر ( تويتر نوره بيوتي بوكس )

Thursday 6 December 2012

هل بشرتي دافيه او بارده ؟ Am I Warm or Cool


مرحبا بكم في مدونتي من جديد
اليوم حبيت اكتب عن موضوع كثير انسأل عنه وكثير ناس يحتارون فيه فحبيت اوضح لكم حسب معرفتي المتواضعه واتمنى تستفيدون منه
الموضوع يساعدك تختارين الآلوان اللي تناسبك والألوان اللي فعلا تزهى عليك 
كثير من البنات تقول حطيت لون روج احمر يجنن لكنه ماناسبني بس طلع على صديقتي روعه مع اننا نفس لون البشره ليه !
او تلبسين بلوزه لونها اخضر حلوه عليك لكن على صديقتك تطلع باهته مع انكم نفس اللون ..
السبب اختلاف درجه البشره درجه البشره فيه منها نوعين :
١- نوع بارد يميل للازرق او الوردي 
٢- نوع دافي يميل الاصفر او الذهبي 
بالنسبه لمعرفه درجتك الاختبارات كثيره لكن اسهل طريقه تشوفين عروق جسمك اذا ازرق فهي بارده اذا خضراء فهي دافيه ...
فيه اختبار يقولك البسي اكسسوار ذهبي وفضي الاجمل عليك هو درجه لون اذا ذهبي تكونين دافي اما اذا فضي فبشرتك بارده ...
اذا عرفتي درجه لون بشرتك راح تختارين مكياجك وملابسك اللي تناسبك وتطلع عليك جميله جدا وتعكس لون بشرتك
طبعا مانحرم انفسنا من الالوان اللي ماتناسب بشرتنا هو فقط اجمل عليك وازهى 
نجي للبشره البارده والوانها المناسبه : 
الابيض، البنفسجي، الازرق، الوردي، البحري، الفحمي، الرمادي 
البشره الدافيه يناسبها الألوان :
البيج، الأخضر، البحري، التوبي، البني، الرمادي الفاتح، الأسود الأحمر اللي مايميل للأورنج .
وهذا بيان توضيحي للألوان بشكل مبسط 


وهنا على لون البشره اليمين بارده واليسار دافيه :


 وهذا كل شي الموضوع سهل وبسيط واي استفسار انا بالخدمه حبيباتي ..
 للاشتراك في مدونتي اضغطي على الرابط الموجود في اليمين بالضغط على .
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

Sunday 2 December 2012

مفضلات شهر نوفمبر November Favourites


مرحبا ياجميلات ... 
زي ماعودتكم نهايه كل شهر استعرض اهم المكياج اللي جربته وعجبني تأخرت كم يوم وكله من البرد اللي جا فجأه وجمدنا احس مفروض يجي بالتدريج !! اجل اليوم قمت ودرجه الحراره ٩ يا إلهي .. على كل حال ماطول عليكم ونبداء : )


بالنسبه للوجه كنت استخدم كونسيلر سيلكت كوفر اب من ماك لحاله واحيانا احط فاونديشن شانيل فيتا لومير الغني عن التعريف جميل هالفاونديشن وتغطيته خفيفه وجميله بنفس الوقت  وفيه حمايه ١٥ من اشعه الشمس : ) 
كثير سمعت انه بينقطع عاد مادري اشوفه للحين موجود بالسوق واحسه تصرف غبي 
 من شانيل يقطعون شي جميل زي هذا !!
الفرشه سامحوني مب نظيفه  روعه هالفرشه بدمج الاساس وتعطيك تغطيه رائعه .. فيه وحده ارسلت لي تقول انها ماعجبتها الفرشه وتحسفت عليها .. هو الفكره من الفرشه انك تدمجين لين تحسين ان الاساس اندمج مع بشرتك بشكل طبيعي وراح تعجبك متأكده


الشدو رجعت لبالتي القديم ناتشورال آي من تو فيسد هالبالت جميله جدا تسوين لوك صباحي او سهره فيه الوان مطفيه وفيه اللمعه وقد كتبت عنها هنا 


البلشر كنت استخدم تارت ناتشورال بيوتي رووووعه هالبلشر وثابت بشكل عجيب تمنيت اني شريت كم لون واهم شي الماركه طبيعيه لونه وردي غامق بس تقدرين تفتحينه براحتك بالفرشه والدمج 

المسكارا لاجديد هههه ماسكارا بنفيت ادري ازعجتكم فيها بس ماستخدمت الا هي ناويه اخلصها واتوقع انها خلصت جميله جدا تطول بشكل جميل وكثير يعتبرونها مسكارتهم المفضله
اللي جمبها نكته برضو مسكارا صغيره للرموش السفليه من كلينك كنت من زمان اشوف باليوتيوب يستخدمونها وعاجبتني مره طبعا ماعتبرها مفضله بس مفضله عشان شكلها يدنننن لكن احس تسوي نفس اللي تسويه المسكارا العاديه ..


الارواج روج لوريال ارواج لوريال فضيعه وفاخره والعلبه اصلا جميله وقد قالت لي وحده من البنات هنا انها تبع ايف سان لوران مادري اذا صدق ولا لا بس الماركه جميله جدا قد كتبت عن هالروج من قبل هنا رقمه  ٥٥٠ ناويه اجرب لون ثاني اذا توصون لون معين علموني : )
اللي جمبه محدد مكروف من ميك اب فور ايفر روووووعه هالمحدد اصلا كل اقلام هالماركه شي فضيع احيانا استخدمه لوحده واحيانا مع قلوس او روج مايحتاج اقول الثبات شي خرافي  رقمه ١٥ سي : ) 

اخر شي بعلمكم على شي خقيت عليه علمتني عليه خالتي الله يسعدها شوكولاته بالمارشميلو من مارك اند سبينسر ادمان هالشوكولاته وصديقاتي ادمنوا عليه 



 وخلصت التدوينه القاكم ان شاء الله بوقت ثاني واذا تبون شي اكتب عنه علموني بالتعليقات : )
للاشتراك في مدونتي اضغطي على الرابط الموجود في اليمين بالضغط على .
* وللأستفسارات السريعه والمتابعه انا موجودة على التويتر ( تويتر نوره بيوتي بوكس