مرحبا بنات مره متحمسه لهالتدوينه فيها كل شي احبه : )
معروف الصيدليات فيها اشياء روعه وخصوصا الميك اب والعنايه وجودتها ممتازه وكثير منها تكون بديله للماركات الغاليه
صراحه انا اذا رحت الصيدليه اقعد ساعه احوس فيها ولا امل لين يطلعوني اهلي :(
عاد كثير اشوف يوتيوب بنات حاطين ٥ منتجات من الصيدليه ماستغنون عنها وقلت راح اسوي هالتدوينه واخترت خمس اشياء فعلا احبها ودايم استعملها وسهله جدا ومتوفره والمفاجاة الجميله ان كل الخمس منتجات راح اسوي قيف اواي لها تستاهلون كل خير حبيباتي الشروط راح اتركها باخر التدوينه : )
اول منتج كحل مايبلين الكريمي كنت دايم استخدم ماك واذا بديت انتصف فيه يبدا يجف معي وجربت كحل مايبلين وتركت ماك الى الابد مررره جميل وكريمي ولا ينشف يعني اذا جف جف على نهايته وهذا شي طبيعي لاني افتح العلبه مليون مره فيه منه بني وموف وازرق .
المنتج الثاني هي فرشه ريل تكنيك للوجه للمحترفين صراحه كنت اسمع عن هالفرشه كثيييييير وجربتها وعرفت السر روعه بالدمج وتنفع لكل فاونديشن الكريمي والسايل والبي بي كريم .
المنتج الثالث بلشرات نكس جودتها ممتازه وثباتها جميل فيها منها كريمي وفيه منها بودره هالبلشر اسمه قلو لونه وردي طبيعي يعطي الوجه تورد صحي وطبيعي وغير متكلف قد كتبت عنه قبل اضغطي هنا وانه بديل لماك بوسي .
المنتج الرابع مسكارا ماكس فاكتر 2000 هالمسكارا قديمه بس مازالت مطلوبه جميله تكثف وتطول كثير مسكارات اتركها بس هاذي دايم ارجع اشتريها .
المنتج الخامس والاخير روج ريد فلفت من ريفلون قد كتبت لكم قبل اني ماتوقعت الريفلون لب بتر بهالشكل وماعجبتني ابدا مافيها ثبات وسعرها مبالغ فيه بس طحت في غرام هاللون اجمل لون جربته من اللب بتر لونه عنابي احمر وثابت بالنسبه للارواج الثانيه حتى لو اختفى يبقى اثر جميل على الشفايف .
هاذي منتجات لو خلصت راح اشتريها لانها فعلا مناسبه لكل يوم والاوقات اللي تكونين تبين شي سمبل كل هالمنتجات روعه وتعطيك نتيجه ناعمه واسعارها ممتازه ومتوفره في اغلب الاماكن .
ماركه نكس متوفره في سنتر بوينت
ماركه مايبلين وريل تكنيك وماكس فاكتور وريفلون في وايتس ( فرشه ريل تكنيك هالنوع ماشفتها في الصيدليات بس الانواع الثانيه متوفره .
كل وحده تقول وش منتجاتها المفضله من الصيدليه وماتستغني عنها ؟ حابه اعرف وش الاشياء اللي تحبونها اكتبوها لي هنا او على التويتر او الانستقرام .
القيف اواي راح يكون لما السبت الجاي ان شاء الله وراح يكون لجميع مناطق المملكه
الشروط ( مافي شروط صعبه ) :
تسوين فولو بالتويتر او على الانستقرام .
اهم نقطه هي انك تكتبين ايميلك.
وين تكتبين ايميلك ؟
عندك كذا خيار اختاري اللي يناسبك .. اما تكتبينه هنا بالتعليقات او تكتبينه منشن بالتويتر او تعليق في صوره الانستقرام هاذي
راح اختار الفائزه من المتابعات بالتويتر او بالانستقرام بس لوماكنتي حاطه ايميلك ماراح اختارك .
الانستقرام norahbeautybox
التويتر اضغطي على هالرابط
اشوفكم على خير
مرحبا بنات ان شا الله كلكم طيبين
اللي متابعه مدونتي تعرف اني اعشق الالوان النتشورال اللي هي درجات البني والبيج والرمادي هالالوان تغريني مره بالاي شدو اذا شفتها اتنح هذا غير انها جميله على العيون صح الالوان الملونه الصارخه حلوه بس حلوه بالباليت فقط بس لما تحطيينها كمكياج يطلع الشكل اوفر مره كأنه حفله .
المهم انا من زمان كنت اجمع بالت لي من انقلوت هالمحل الرائع العجيب فروعه في الرياض في حياة مول والرياض قالري .
اسعار الاي شدو جميله جدا ومناسبه سعر كل شدو ٣٥ ريال فقط تقدرين تعبين لك علبه حسب احتياجك بالالوان اللي تحبينها
علبه الاي شدو الفاضيه فيها عشر اماكن سعرها ١٠٠ ريال تقريبا تزيد او تنقص قليلا لول لاني شاريتها من زمااان اول مافتح انقلوت
شدوهاتهم صبغتها ممتازه وثباتها روعه مع البرايمر ممكن تجلس فوق ١٢ ساعه وكميتها كبيره مقارنه بشدو ماك الدائري بضعف السعر وعندهم تعدد الوان عجيب محلات انقلوت تتعامل بالارقام يعني اي شدو له رقم مافي اسم المات تبدا برقم ثلاث ميه واللي فيها لمعه تبدا برقم اربع ميه راح اكتب لكم ارقام الشدوهات وشوفي اللي يناسبك وطيري للمحل وخوذيه . احيانا ممكن تواجهين صعوبه مع العاملات بالمحل بس ترا بالهم طويل لو مالقت لك اللون اللي تبينه قولي دوري مره ثانيه الله يعافيك كثير من الالوان اول مره قالت مش موجود بعدها دورت ولقته . لانها ارقام كثيره فتلخبط البائعه يعني اذا ناويه انقلوت فضي لك يوم وخوذي قهوتك من ستار بكس وروحي ابسطي عندهم : )
نجي للعيوب يوجد عيب بسيط جدا بالشدوهات وهي انها تتناثر وتتاطير خصوصا الالوان المطفيه بس ماعتبرها مشكله لو خليتي يدك خفيفه بالتوزيع .
زي ماقلت لكم لي اكثر من سنه وانا اجمع هالالوان ماشريتها دفعه وحده ومازال فيه مكان فاضي مالقيت شي حبيته مره زي الباقي فقلت متى ماجا هاللون جا انصحك اذا بتجمعين البالت لاتستعجلين خليها على رواق متى ماكتملت اكتملت اهم شي تشترين الوان مقتنعه فيها وحابتها وتناسبك .
نبدا بسم الله
هالالوان مررره روعه للوك الصباحي والدوامات اغلبها مطفي وطبيعي مره احطها مع كحل اسود وبني يطلع جميل ومو متكلف
الارقام من اليمين لليسار From right to left
330 لونه بيج وردي مطفي .
463 بيج فيه قلتر ذهبي مره روعه حتى لو تحطينه لحاله .
390 ترابي مطفي جميل جدا بالدمج مع الفاتح او الغامق .
344 توبي فاتح بين / بين الرمادي والبيج والبني مطفي بس جايه قلتر من الثاني .
337 بني فاتح فيه شوي رمادي وموف مطفي .
342 بني رمادي مطفي
335 اورنج مطفي ترا مبين بالصوره فاقع بالواقع لونه جدا معقول وينفع مع شوي بني او ذهبي يطلع لوك روعه
421 بني فيه قلتر نحاسي روعه هاللون تقدري توزعينه لحاله .
329 بني داكن يميل للسواد ولو حطيتيه ثقيل يطلع كأنه اسود
السواتشز تلقونها على حسابي في الانستقرام .
وقعت في غرام هالمحدد بصراحه انا مو من عشاق المحددات احس الروج خياراته اكثر وامتع واجمل ومع اني استخدم بين فتره وفتره محددات بس غالبا اميل للارواج والقلوسات .
سمعت عنه كثييير وكثير اسمع ان خبراء التجميل كثير يستعلمونه سواء لوحده او كقاعده للارواج والقلوسات وبعد تردد وحيره قررت اشتريه وفعلا عجبني كثير .
لونه بني نيود فيه شوي حماار تحسينه طوبي او بني مدري كيف بس اكيد على كل بنت يختلف لانه يعتمد على لون شفايفك اذا فاتحه او غامقه .
روعه لوحده او مع ارواج لونها بيج او قلوسات شفافه .
عيبه الوحيد سعره ٩٠ ريال غالي مره على محدد لذلك اكيد بدور على لون شبيه فيه من ماركه رخيصه لاني اتوقع راح يكون ثابت في مكياجي .
ادري ازعجتكم فيه ههههه بس جربوه واحكموا : ) وتلقون السواتش على الانستقرام
وهذا كل شي .. بنات لاتنسون تدعموني بالفولو بالاشياء اللي تحت باكون ممتنه لكم كثير ❤️
اهلين بنات
رمضان كريم والله يتقبل منا ومنكم يارب
اليوم جايبه لكم ست اضائات اعشقها بكتب عن كل اضاءه وانتي اختاري اللي يناسبك
الاضاءه شي مهم بالميك اب يعطي جمال ونظاره على وجهك ومؤخرا صارت كل ماركه تنافس بمنتجاتها
اول شي حاولي تبتعدين عن الاضاءه اللي فيها قليتر او ( حبيبات لمعه كبيره ) الا اذا كنتي رايحه حفلات دي جي ممكن تكون مناسبه : )
بالنسبه للون اذا كنتي بيضاء اختاري اللي تجي على وردي واذا سمرا اختاري اللي على ذهبي وفيه اضاءات تكون مناسبه للجميع البشرات يكون فيها مزيج من اللون الذهبي والوردي .
اماكن توزيع الاضاءة هي الاماكن البارزه في وجهك مثل الخدود ماتحت الحاجبين فيه ناس يحبون يحطون على الجبهه خفيف والانف وارنبه الفم .
اضاءة ماري لو من ذا بالم هالاضاءه روعه لونها ذهبي تناسب البشرات البيضا والسمراء ثباتها ممتاز تحتاجين فرشه خفيفه لان صبغتها قويه .
اضاءه ماك لميتد اديشن روعه وجايه على ذهبي اسمها ويسبر اف قيلت
اضاءه توم فورد جميله وتعطي لوك الرطوبه ثباتها متوسط وبالاجواء الحاره ممكن ماتثبت ابد بس كاضاءه روعه زي اضاءه العارضات بالعروض
اضاءه ديور امبر دايمند اعشقها هالاضاءه تناسب كل البشرات وممكن تستخدمينها كا آي شدو
اضاءه بينفت واتس اب روعه هالاضاءه واكثر اضاءه طبيعيه هي انسب اضاءه من الست للصباح حطيها وانتي مرتاحه مافيها قلتر وتناسب البشرات البيضا والسمرا ثباتها ممتاز وتوزيعها سهل .
اضاءه هاي بيم اول اضاءه اشتريتها جميله وسهله بالتوزيع حلو كمان تدمجينها مع الفاونديشن تعطي وجهك نظاره ولمعان جميل .
وهذا كل شي .. بنات لاتنسون تدعموني بالفولو بالاشياء اللي تحت باكون ممتنه لكم كثير ❤️
مساء الخير يا احباب ❤️❤️
اليوم جايه بكتب لكم عن فاونديشن وكونسيلر من زمان بكتب عنهم بس توي اتذكر وكثير بنات طلبوا اكتب عنه وعن فاونديشن من الدرق ستور .
قبل ماتكلم عنه بقولكم بنات عن موقع bloglovin وهو موقع تسجلين فيه وتابعين البلوقات اللي انتي حابتها وراح تجيك اول باول البوستات الجديده .. وفيه منه تطبيق على الايفون والاندرويد .
وهاذي صفحتي في بلوق لوفن اضغطي هنا.
نرجع للفاونديشن اللي بتكلم عنه هو فاونديشن فيت مي من مايبلين وهو اخر فاونديشن من مايبلين الفاونديشن تغطيته متوسطه يعطيك لوك ديوي (لامع طبيعي ) بس لو تحطينه مايبين انك حاطه شي سهل بالدمج بشكل رائع يذكرني بالفاونديشنات من الماركات الكبيره ثباته روعه اجمل طريقه لتوزيعه هي بفرشه الكابوكي من سيقما او اي فرشه مشابهه لها بالنسبه لنوعيه البشرات يناسب جميع البشرات بس الدهنيه مره اتوقع راح تلاقي صعوبه بالثبات .
المشكله دائما بكريمات الاساس اللي بالصيدليات ان الدرجات محدوده فاللي تلقى درجتها من هالفاونديشن محظوظه .
الكونسيلر للاسف عندنا مانزل الا اربع درجات 3 درجات فاتحه جدا ودرجه غامقه مرررره انا اخذ الدرجه 20 وطبعا فاتح علي فصت اخلليه اضائه تحت العين ( احط كوركتر ثم فاونديشن وبعدها اوزع هالكونسيلر بالبيوتي بلندر والنتيجه خيال ) الفرشه حقت الكونسيلر كأنها فرشه قلوس انا احب هالنوعيه خفيفه وناعمه ع البشره.
تغطيته متوسطه وخفيف مرره تركيبته ممتازه حبيته مره وكنت اتمنى لو فيه درجتي .
فيت مي خط جديد بماركه مايبلين اجمل شي منهم الفاونديشن والكونسيلر البلشر قد كتبت عنه فاشل جدا والبودره سيئه بالنسبه لي .
وهذا كل شي .. بنات لاتنسون تدعموني بالفولو بالاشياء اللي تحت باكون ممتنه لكم كثير ❤️
