Wednesday 28 August 2013

مشترياتي من ايف روشيه و ابو ريالين الياباني



مرحبا بنات 
شلونكم وش اخباركم ؟؟ كيف الاستعداد للدوامات p; 
جايتكم اليوم بمشتريات خفيفه ظريفه اتمنى تعجبكم وتفيدكم طبعا اغلبها ماجربتها صعب اقولكم حلو ولا لا بس ان شا الله انها كويسه 
بالفتره الاخيره طحت على محل ايف روشيه هالمحل الرومانسي الجميل اجلس عندهم ساعه اقرى واشم واشوف عاد شريت اشياء حلوه منهم احسن شي فيه ان فروعه بكل مكان من الحسا لجيزان للرياض يعني ان شا الله كل اللي بكتبه بتلقونه واذا جاز لكم شي لاتنسوني من دعواتكم ... 
رحت مره لفرع حياة مول فيه وحده مرره شطوره فاهمه كل المنتجات مشاء الله حتى البنات كلهم وش حليلهم ومره رحت لغرناطه الله لايوريكم المعامله ضحك وسواليف وتاركين الزباين مدري وش اقول !! بلحظه استياء بغيت اشتكيهم بس قلت ان شا الله مع الايام يهديهم ربي ولا يتركون المحل لناس تحبه  .
المحل اسعاره معقوله ومنتجاته متنوعه الغريب ان الموظفه تقول لي انه له سبع سنين بالسعوديه احس ماشفته الا هالسنتين !! 


نرجع للمشتريات 
من اليمين :
١- العلبه الخضراء سبراي للشعر وظيفته يفكك تشابك الشعر اذا معقد ترشينه عليه رطب او جاف وتمشطين شعرك حلوه ريحته جربته كم مره حليو بس صرت استخدمه بعد للبيبي هير ( الشعر المتاطير على الجنب ) وصار يرتبه مررره ٤٥ ريال.
٢- سبراي تان طبيعي ترشينه وتفركين جسمك وبعد ماينشف يمسك اللون بس لازم ماتغسلينه لمده ٣ ساعات تقول البائعه يجلس اسبوع حلاته لونه خفيف مره يعني تزيدين بالطبقه حسب رغبتك حتى السمراء ممكن تستخدم طبقه عشان يوحد لونها سعره ٥٥ .
٣- ماسك الطين للشعر والجسم (غريب مره انه للشعر والجسم ) قريت عنه كثير مره يمدحونه وموقع ايف روشيه الفرنسي ماخذ من افضل المبيعات مابعد جربته نجرب ونشوف سعره  ٩٥ريال .
٤- سكراب الفانيليا برضو ماجربته مع اني كنت اكره رائحه الفانيليا قبل كم سنه واللحين اعشقها سبحان مغير الاحوال علبته مره كيوت سعره ٦٥ ريال .



المكياج :
 شريت هالبلشر لونه دافي حسيته يناسب الشتا لونه روزي غامق على بني سعره ٥٩ ريال .
الفرش من زمان عندي وحده للدمج ووحده للحواجب او الكحل حطيتها قلت يعني يمكن وحده تستفيد ( اسعارها ناسيه بس ماتتعدى الثلاثين ) .
مكياجهم يمدحونه وطبيعي مايأثر على البشره قلت بجرب البلشر واشوف . 

المحل الياباني اللي بحياه مول كأنه ابو ريالين دايم ادخله ماشتري منه شي صراحه ماحب البرابيس ههههه واشتري اشياء ولا استفيد منها وهذا احسه كذا... لما مره برمضان قلت خل اشوف وش فيه واشوا دخل وطلعت باشياء حلوه وان شاء الله استفيد منها .

١- من اليمين فوق اداه المساج لازاله السولولايت مابعد جربتها اللي جربتها واستفادت منها تعلمني ولا ماتعب نفسي :/
٢- اللي جمبها فوطه قلت لو غسلت الفرش ولا شي p; 
٣- علب فاضيه مفيده لو بغيتي تجربين فاونديشن من صديقتك ولا للسفرات القصيره .
٤- الشي الجميل كنت دايم اشوفه بفديوهات الاسيويات وهو مناديل يمتص الدهون اذا حطيتي فاونديشن حلو يصير بشنطتك للازمات مره فرحت اني لقيته وتحسفت ان ماشريت كثير :(
٥- مشط لطيف على الفروه بعد الحمام عشان مايقطع الشعر وكذا اخذت واحد عليه صوره ميكي ماوس هههههه .

كل هالاشياء يمكن ماتتعدى الخمسين (الله يديم الرخص ) ناسيه الاسعار بالضبط لاني من زمان شاريتهم المحل بحياه مول قدام توني روماس ..
 صوره الورق المخصص لدهون الوجه:

هذا القطن من المحلات اليابانيه دايسو جابته لي صديقتي من دبي اتوقع متوفر هنا بعد مرررره جميل للبشره متحسفه يخلص اللي شافته مثله عندنا تعلمني .

ان شاء الله انبسطتوا بهالتدوينه اشوفكم على خير لاتنسون اللي مجربه شي من ايف روشيه وعاجبها تعلمنا عليه عشان نستفيد .

Friday 23 August 2013

ريفيو بي بي كريم قارنيه الجديد والقديم

مرحبا بنات..



اليوم جايبه لكم رفيو مقارنه بين ثنين من بيبي كريم قارني كثير وضحت ان هالبيبي غير عن الاول وكثير يقولون انا تحسست منه اوكي على راحتكم بس اسأل هل جربتي الجديد ؟ تقول لا ... 
قلت لازم اوثق الموضوع بالبلوق واساعد قدر الامكان خصوصا ان الدوامات جايه والكل يدور شي يناسبه ..
اول شي قارني نزلت اربع انواع بيبي كريم ثنين منها نزلوا لاسواقنا بالسعوديه القديم اللي اكثر البنات اشتكوا منه وسبب لهم مشاكل وحبوب علبته قصيره والثاني الجديد مكتوب عليه بالانقلش للبشره المختلطه والدهنيه  (combination to oily skin ) علبته طويله ونحيفه .
انا من سنه جربت القديم غالبا اخلطه مع اساس وعادي ماحسيته ممتاز ولا سيئ في رمضان شريت الجديد من صيدليه بوتس وجربته كم مره هاللحين .
ميزات الجديد اللي شفتها :
١- تغطيته خفيفه وجميله 
٢- ماله ريحه عكس الاول اللي كان فيه ريحه ورد .
٣- حجم الجديد ٤٠ مل والقديم ٥٠ مل 
٤- مايدهن على البشره.
٥- اخذت درجه الميديم وكانت ممتازه علي بعكس الاول كنت ماخذه ميديم وغامق علي شوي .
٦- كلهم اسعارهم ٣٠ ريال سعودي 
 ٧- الحمايه من الشمس ٢٠ 
٨- الجديد قوامه اخف من القديم 
بالنسبه للشراء انا قلت لكم شريته من بوتس بس مادري اذا متوفر بالصيدليات الثانيه او لا ..
اتمنى وضحت لكم اكبر قد من المعلومات واللي جربت الجديد تكتب تجربتها بالتعليقات 
على فكره بنات السواتشات غالبا احطها بالانستقرام سواء ارواج او بلشرات ... الخ 

Monday 19 August 2013

مفضلاتي مؤخرا

مرحبا بنات ان شاء الله تكونون مبسوطين اخر تدوينه كتبتها برمضان وبعدها جاني كسل احس كل الناس يجيهم كسل وخمول بعد رمضان !! 
الله يعيده على الجميع اتمنى الجميع انبسط بالعيد والاجازه .. هالتدوينه جمعت فيه الاشياء اللي حبيتها الشهور اللي راحت لاني ماسويت بوست المفضلات الشهري من زمان وتجمعت اشياء احبها فقلت هذا وقتها اتمنى تجيبون كوب قهوه للقراءه لان البوست شوي طويل هههه انجوي حبيباتي .


 اليمين بلشر كريمي من شانيل رقمه ٦٣ نزلوا ست الوان اللون وردي لاهو غامق ولا فاتح احسه مثالي للكل التركيبه جميله جددداا كريميه بس ماتتكتل وتندمج بسهوله كنت اظن ان بلشرات ماك الكريميه ماك ممتازه بس يوم جربت شانيل تغيرت نظرتي وحسيت ماك ثقيل بالدمج القهر انها لميتد اديشن بالموقع كاتبين انها فتره محدوده عاد يمكن ربي يهديهم لان من زمان ماجربت منتج بهالروعه والسهوله فيه بنات قالوا لي مالقيناه بس اقولكم الالوان الثانيه بنفس الجوده (العوض ولا القطيعه ) .
البلشر الثاني شوقر بمب من بينفت يمكن قد تكلمت عنه قبل جميل جدا فيه لون وردي ومشمشي وبرونزي هالالوان كلها اجتمعت بعلبه جمال حقيقي وفيه لمعه خفيفه اذا حطيت منه احس ماحتاج اضاءه يعطي قلو للوجه بشكل ناعم .



مناكير اسينس او اسينسي جميله وسعرها رخيص وفرشتها كبيره للي تحب الفرش الكبيره راح يعجبها طبقه وحده تكفي اخترت الوان صيفي اليمين مرجاني رقمه 109 واليسار وردي فاقع رقمه 107 اسمائهم اليمين واليسار .



قلم زيت اللوز المخصص لزوائد الاظافر من بودي شوب صار لي فتره استخدمه والحمدلله خفت الزوائد كثير يجي على شكل ريشه تفركين القلم ويطلع الزيت وتوزعينه على محيط الاظافر .


بيقمنت نيود بيتش Nude Beach من بيرمينرالز من سيفورا شفت باليوتيوب وحده تمدحه وعجبني من وصفها وفعلا طلع رووعه لونه لحمي وفيه موف خفيف تبين تحطين خفيف منه او ثقيل ماحس لمعته تو متش  ناعمه للسهرات يعطي لوك راقي وجميل .


 بودره شفافه من ماك صديقتي جابت لي اياها مع ان عندي حقت فور ايفر اتش دي بس برضو هاذي حلوه تثبت الميك اب واحسها تخفي الدهون بالبشره اوزعها على الجبهه والانف فيه منها كومباكت للي ماتحب البودره .

 فرشه ريل تكنيك للمحترفين احس طفشتكم بهالفرشه بس فعلا جميله كتبت عنها بالانستقرام وبتدوينه سابقه هنا فيه بنات كثير سألوني اذا هي متوفر بوايتس او لا الجواب لا ماشفتها بصيدليه وايتس يمكن يوفرونها بعدين مادري!!



كونسيلر مايبلين برضو قد حكيت عنه خفيييف وجميل تغطيته وترطيبه تحسينه انه منتج غالي من شانيل ولا ديور انا احطه كاضاءه خصوصا لو كانت هالاتي واضحه ذيك الايام وقبله احط كوركترهنا التدوينه اللي تكلمت عنه بالتفصيل


الارواج انا طايحه فيها طيحه مدري وش فيني ..  اليمين روج كريمي قلوسي من ريميل روعه روعه ثابت ولون من اول طبقه يجفف الشفايف شووي بس ممكن تحطين قبله مرطب حلاته لونه جميل وبرضو يعطي لمعان افكر اشتري الوان ثانيه لان تحفه واختراع جميل .

اللونين الفاقعات من مايبلين المجموعه الجديده هالارواج آخر مانزلت من مايبلين عندنا طريقتي احطها بشكل خفيف ووفوقها قلوس او مرطب يعطيك لون جديد ومميز وصيفي الكورالي رقمه 109 اسمه SHOCKING CORAL والموف رقمه 902
واسمه FUCHSIA FLASH 

الاخير غرامي روج قيرلان اول روج اشتريه من قيرلان من اسمه GISELA رقم 47 من المجموعه G لونه احمر لكن احمر معقول هذا اول احمر اشتريه اقدر استخدمه يوميا واحسه ملائم جميل اللون مرررره وتركيبة الروج سحر صحيح سعره غالي جدا بس على سنع علبته جميله وفاخره يجي معها مرايه اللي ناويه روج من قيرلان انصحها بهذا بقوه .


 هاذي مفضلات متفرقه من اليمين مزيل المناكير اجمل مزيل جربته لحد اللحين وهاذي مكن ثالث علبه ريحته شوي مزعجه بس يشيل على طول حتى الالوان الغامقه
العلبه الزرقاء غسول لليدين من باث اند بودي وركس برائحه الزهور الايطاليه يابنااااات ريحته جميله جداا ورومانسيه صرت اغسل يديني كل دقيقه يجي على شكل رغوه اتمنى القى عطر زيه .
واخيرا على اليسار مناديل مزيله للمكياج من لا فريش بزهور اللافندر اخذتها من صيدليه بوتس فيها ثمان حبات بسعر 38 صراحه غاليه بس مادري لو اقدر استخدم المناديل كذا مره او لا جربت مره مسحت الميك اب وخليت المنديل مارميته تحسفت من بكرا استخدمت نفس المنديل والمفاجأه انه مسح كلش ههههه فيها زيوت اتوقع هذا السبب عموما راح اخلي كل منديل استخدام مرتين حسافه 38 ريال .



هالاعواد فكت ازمه شريتها من صيدليه وايتس دايم اخبص بالمناكير وبدال ما امسح كل المناكير ازيله بهالعود وبس



واخيرا شمعه من باث اند بودي وركس للي يحبون ريحه الخربز والبطيخ هذي تنفع لهم ريحتها صييييف جميله وهاديه وتوسع الصدر . 
وخلصت التدوينه اتمنى ماطولت عليكم اللي جربت شي منهم وعجبها او ماعجبها تعلمني انا موجوده في هالمواقع اللي تحت .
شكرا لقرائتكم ووقتكم 

Saturday 3 August 2013

ترتيبي لطاوله الميك اب ❤️


مرحبااا بنات شهر رمضان على نهايته الله يعيده علينا وعليكم وحنا باحسن حال
قبل كم يوم حطيت فيديو بالانستقرام عن طريقتي بترتيب الميك اب وكثير بنات اعجبهم انبسطت كثير من الفيد باك قلت اكتب بالمدونه بالتفصيل عن اماكن اغراضي لاني ماذكرتها بالانستقرام  للي حابه ترتب مكياجها كل اشيائي بسيطه ومتوفره واسعارها معقوله يعني اغلى شي الطاوله شريتها ٤٩٥ من ايكيا .
حابه اقول نقطه ضروري ترتبين مكياجك بالطريقه اللي تناسبك عشان تستخدمينه وتعرفين مكان كل شي بكذا تستفيدين من اغراضك وتحللين مشترياتك لان اذا صار كل شي بمكان وعشوائي راح تنسين اشياء ولاتستخدمينها وتخرب وتعفن وانتي ما استانستي فيها .

اول شي الطاوله شريتها من ايكيا متوفره دايم عندهم واختي شرت زيها حتى تركيبها سهل ممكن اخوك سواقكم او حتى انتي تركبينها ماتسوى ياخذون عليك فلوس تركيب وتوصيل فيها درج واحد فقط ماحسه يتحمل كثير فيه مكياج حطيته في ادراج ثانيه خصوصا اللي ماستعمله كثير او شريته وطلع سيئ وبلشانه فيه :(
المرايه من ايكيا برضو سعرها ٧٥ ريال ماحبيت احط مرايه كبيره خصوصا ان عندي مرايه كبيره بالغرفه هاذي تكفي للميك اب وتؤدي الغرض .




علبه القطن الزجاجيه هديه من صديقتي احب احط القطن والاعواد بهالشكل واحب يكون عليها غطا تعرفون جونا غبار وحاله .
مقسم الارواج من الدانوب وفيه مثله اكبر معاه درج ومكان للاغراض الثانيه للمكياج زي بلشر كريم اساس حلو للي مكياجها قليل تحط اشيائها عليه سعره ماتذكر بس اتوقع بحدود  ٥٠ هالمقسمات الشفافه تلقينها برضو في ( ابو ريالين ) ومحلات الكماليات .
حاطه بالت انقلوت عشان الاستخدام السريع ودايم ابدل احيانا نيكد او ماك ... الخ حسب المود .



العلبه الزرقاء حطيت فيها فرش العيون شاريتها من سنتر بوينت من زمان ماعجبتني مره راح ابدلها قريب .. والعلبه الشفافه حطيت فيها فرش الوجه وهي اصلا علبه شمعه من باث اند بودي وركس غسلتها ونظفتها وحطيت الفرش فيها والعلبه الصغيره حطيت فيها البيوتي بلندر وبرضو كانت شمعه من ايكيا لما خلصتها استعملتها بهالشكل .

الفازه كانت جايتنا بشكولاته ماعرف من وين المهم لما اكلوا اهلي التشوكلت اخذتها ههههه وحطيت بلشراتي خصوصا اللي اشكالهم حلوه عشان استمتع بجمال البلشرات هههههه انا من عشاق البلشرات اعتبرها اجمل شي بالميك اب ❤️ ❤️.


هذا كل شي على الطاوله اللي فوق الطاوله استخدمه شبه يومي خصوصا بالايام اللي اكون مستعجله ماحب افتح الدرج وادور شي كل شي قدامي .

بالدرج المقسمات اخذتها من ايكيا اخذت ثنين الواحد ٩ ريال وزعت فيها الميك اب حسب نوعيته شي للقلوسات واقلام الشفايف وش للمسكارا والكحال .... الخ واخر شي فيه مساحه مايوسعها مقسم حطيت العلب البالتات وبين فتره وفتره ابدل بينهم عشان استخدمهم وكل بالت تاخذ حقها ههههههه حشا حسيت انهم عيالي ههههه .

وبس هذا كل شي عن مكياجي وترتيبه اتمنى تستفيدون من هالبوست وشكرا لوقتكم .