مرحبا بنات
انتهت سنة ٢٠١٥ وجا وقت المفضلات النهائية اللي قررت اكتب عنها اغلبها تكلمت عنها قبل باي مكان بالسوشل ميديا بس قلت اكتب عنها واجمعها كتوثيق وفائدة لكم : )
العناية :
من اليمين
١-ماسك سيفورا الطيني شبيه بماسك قلام قلو كتبت عنه قبل خلصت علبتين منه واعتبره افضل من قلام قلو وارخص.
٢- مرطب من بودي شوب قوامه جل تمتصه البشره بسرعه ومايترك اثر دهني جميل مره لكن ماحبيت ريحته مره .
٣- مرطب سوفت من نيفيا من المرطبات الرخيصه الجيدة سواء للبشره او لليد شريت علب كثير وخلصتها .
٤ - تونر بيكسي تكلمت عنه بالسناب قببل فتره بشكل مفصل بكل امانه يستاهل الضجه عليه منتج رائع .
كريم اورجنز للعيون
فضيع ترطيبه وتفتيحه للهالات السوداء اذا كنتي مرهقه الصباح حطيه قبل الميكب وشوفي النتيجة ماعتبره علاج قد ماهو حل مؤقت وسريع للهالات والانتفاخهالكريم انقذني مررره خصوصا اني صرت اسهر كثير :(
الماسكات الورقيه او القطنيه اكثر شي استخدمتها بالسنه اللي راحت منعشه ومرطبه وممتعه كثييير ماركات طلعوا لهم هالماسكات
مثل سيفورا وفيس شوب وستار سكن وغيرها .
المكياج
بالنسبه للوجه اكثر شي حبيته واستخدمته كثير وعطاني نتيجة مرضيه
1- البودره الشفافه HD من ميكب فور ايفر خفيفه على البشره تتوزع بسهوله ولا تكتل
2- اضاءه شامبين بوب اللي كسرت الدنيا من ماركة بيكا
3- بودره مضغوطه من بورجوا ( تطفي المظهر الدهني وتحافظ على شكل الاساس )
اقل ماركة اناظرها ماركة ماكس فاكتور بس بلشراتهم الجديده خلتني اعطيهم فرصه ثانيه D; بلشر وردي طبيعي يعطي نظاره
جميل وسهل بالتوزيع .
بالت لوراك الاصدار الأول اتوقع حتى السنه اللي راحت حطيته باختصار اجمل بالت شدو جربته بحياتي لحد الآن الالوان والثبات والتركيبه كلها مجموعه بهالبالت بشكل مثالي ،
الجندي المجهول برايمر سماش بوكس ماعاد استخدم برايمر غيره من يوم شريته تركيبته ثقيييله بس تتوزع بسهوله باختصار انسي يتكتل الشدو معك اذا حطيتيه .
بعام 2015 اخيرا اخيرا تعلمت اركب رموش او خلوني اقولكم تجرأت لان السالفه مايبيلها تعليم قد مايبي لها صبر واستمرار ومره مرتين خلاص تتقنين الشغله ماجربت ماركات كثيره بس افضل رموش جربتها ريد شيري رخيصه وسهله .
مسكارا ايسنس تفاجأت ان كثيييييير بنات يعشقونها ممتازه كجودة وسعر .
الارواج جربت اشياء وانواع كثيره من سايل ومات وغالي ورخيص المجمل ممتاز بس اكثر شي حسيته مختلف ارواج دوز اوف كلور السائلة المطفيه التركيبه مجنونه ثااااابته وماتقطع ومريحه ماتتحسفين تاخذين كل الالوان D;
الفرش وما ادراك مالفرش :( عندي قانون مافي شي اسمه عندي فرش كثيره لو يحصل لي اجمع كل فرش الماركات ماقول لا
اكثر ثلاث فرش حبيتهم وخطفوا قلبي
1- فرشه اورقلاس رقم 2 لتوزيع الفاونديشن اللي اقدر اقوله باختصار تجربه سعيدة جداااا وانتي تدمجين فيها الاساس
2- فرشه الدمج من انقلوت قريب شاريتها بس حبيتها مره لتوزيع اللون على كامل الجفن او دمج لون على كسرة العين
3- فرشه ريل تكنيك غنيه عن التعريف اكثر شي استخدمها لتثبيت الباودر تحت العيون نتيجه ممتازه خصوصا انها ماتاخذ كميه كبيره من الباودر
متفرقات
زيت الاكسير من تريسمي يناسب جميع انواع الشعر يحمي ويرطب ويخفف الجفاف احب استخدمه من نص الشعر لما النهايه خصوصا بعد ما استشور شعري يعطي لمعه وحيويه لشعري .
معطر المفارش والمخاد من باث اند بودي وركس اعشقه صرت مدمنه عليه ابخ على السرير منه قبل النوم ريحته مريحه للاعصاب D;
عطر من كارتيه جاني عينه من دبنهامز اول مره يعجبني عطر بهالشكل وعلى ان العينه صغيره بس فيها بركه عجيبه وريحته قويه مره
شمعه من ماركة فرنسيه من اجمل الشموع اللي جربتها وانتم اكيد تعرفون قد ايش استخدمت شموع بحياتي ههههه بس هاذي ريحتها تجنن هاديه مره وتنتشر بالغرفه بدون ماتكتم والعلبه بعد روعه
اتمنى عجبتكم مفضلاتي واستفدتوا فيه اشياء زيادة بس يبي لها تجميع و قلت لو طولت ماكتبت البوست ماراح يتناسب مع فكره مفضلات نهاية العام .
اللي جربت شي من هالاغراض تشاركني رايها بالانستقرام او هنا او بالسناب او بالتويتر
كل حساباتي بأسم NORAHBEAUTYBOX
القاكم على خير يا احباب
*سويت البوست حسب العام الميلادي لأن الماركات والكولكشنات تنزل حسب التقويم الميلادي
