SEPHORA HAUL

 من زمااان ماسويت هول من سيفورا غير اني من زمان ماقشيت منهم شي يعني تمر اوقات اخذ شي محتاجته بس اني اقعد ساعه ساعتين ابحث بالاشياء لا.. بس هالمره حبيت اشتري منهم كذا غرض وغير انه كان فااااضي يفتح النفس .

عاد قلت اكتب بوست عن مشترياتي الاخيرة منهم ..

GUERLAIN  L`OR MAKE-UP BASE
برايمر الذهب من قيرلان سمعت مدح عليه كثييييير ناس تقول يغير الملمس والشكل تماما لاي فاونديشن تحطينه بجربه واقولكم عاد اذا ينفع او لا .

 

DIORSKIN NUDE AIR POWDER
بودرة ديور نيود كنت ادور بودره من زمان لاني مازلت استخدم بورجوا هيلثي مكس وقربت تخلص فقلت ابي شي خفيف وبنفس الوقت طبيعي .
(للاسف بنات شريت هالباودر ويوم فتحتها تفاجات انها مستخدمه والحروف ممسوحه انقهرت من الاهمال ورحت لسيفورا وعلى طول بدلها بدون اي كلمه واضح انها تصير كثير لذلك اذا شريتوا شي زي كذا شيكوا قبل ماتدفعون )

NAKED SKIN
فاونديشن نيكد من اربن داكي اول مانزل جربته على يدي وحبيته مره تغطيته خفيفه يعتبر مصحح خفيف اكثر من انه فاونديشن هذا
حبيت ان فيه حماية بس فكره الضغاط ماعجبتني ابد وغير كذا احس كميتة قليلة :(

NARS PURE MATTE LIPSTICK
بما ان نارس صارت عندنا حبيت اخذ منهم شي وجربت هالروج من صاحبتي وحبيته مررره تغطيته صراحه خفيفه مره بس لونه يجنن بحط سواتش بالانستقرام .اسمه TONKIN

اخذت فرشة انستازيا برفلي هيلز للهايلايتر .

فرشة ميكب فور ايفر رقم 242 صار لي سنه ادورها والحمد لله لقيتها بسيفورا اتذكر اني لقيتها بمحل ميكب فور ايفر بس انا ابي اشتريها من سيفورا عشان النقاط :(

 

GLAMGLOW gravitymud firming treatment 
قناع من قلام قلو وظيفته يشد البشره ويزيل الجلد الميت  والقشور من البشره متحمسه اجربه عشان طريقة ازالته عاجبتني مره D; جاي معه فرشه حبيتها مره صغيره اتذكر شريت قلام قلو اللي علبته سوداء قبل ماكان معه فرشه :(

اتمنى استفدتو من هالبوست ولاتنسون تشاركوني مشترياتكم الجديده باي مكان بالسوشل ميديا
اسمي على التويتر والانستقرام والسناب نفس الشي NORAHBEAUTYBOX

اللي عندها اسئلة او فضفضه او تبي تسولف تقدر تراسلني على هالايميل ارد على الجميع حسب استطاعتي : )
norahbeautybox@gmail.com

مشترياتي بالفترة الاخيرة

مرحبا بنات 💕🌷❤️
من زمااان ماحطيت بوست مشتريات بالنسبه لي باليوتيوب ولا المدونات ولا اي برنامج اجمل شي عندي اشوف مشريات البنات خصوصا الميكب😍💕

بوريكم وش شريت بالفترة الآخيرة بعضها استخدمتها وبعضها لسا جديدة نبدا بسم الله D;

من سيفورا

اخذت بيوتي بلندر السوداء اول مره اغامر بغير الورديه صديقتي تقول تنفع مع الفاونديشنات الثقيله اكثر من الورديه قلت فرصه اجرب واغير .

واخذت برضو رموش من هدى بيوتي بعد ما شفت اغلب البنات يمدحونها  Samantha 7

من وجوه

اخذت محدد الشفايف من ايستي لودر لونه فضيييييع انجنيت عليه يوم شفت التيستر وبحثت بكل مكان دايم مالقاه واساسا مادري اذا هو سولد اوت ولا اصلا ماتجينا بضاعه من هالماركة لان ماعليها اقبال مره
لونه بني على احمر مناسب لموضه الشفايف الحين رقمه ١٦ اسمه brick .

الشي الثاني اخذت روج سايل مطفي من ماركة وجوه اسمه violet جربت منهم لون عودي كذا مشهور مره اسمه حنا وعجبني وقلت اجرب لون جريئ زي البنفسجي.

من ماك العشق الابدي 
قبل فترة اسبوع نزلوا ماك كولكشن magic of the night والضجه اللي صارت على الاضاءات شي عجيب اخذتهم واخذت روج موف مطفي لونه اخف مما توقعت اسمه evening rendezvous .

انقلوت

اعشششششق هالماركة بشكل رخيصه نوعا ما وكوالتي خطير ومتوفرة تقريبا باغلب اسواق الرياض اخذت منهم فرشتين وحده لدمج الشدو رقمها 6ss والثانيه فرشه للهايلايتر او الكونسيلر وغيره رقمها 4ss

اخر شي من الصيدليه :

من اليمين اخذت اساس اير مات من بورجوا جربته مره عجبني تغطيته بس حسيت اللون فاتح علي ممكن ارجع اخذ درجة ٦ وادمجها معه ويضبط الوضع .

برايمر من ريميل مدري كيف اخذته ولا ادري ليش اساسا هههههه بس جربته على يدي ومايبشر بنتائج كويسه ابدا بعلمكم اذا عجبني او غيرت رأيي .

اخذت كريم لتفتيح التصبغات والاثار مدحته بلوقر amalmakeup8 مره قلت اجربه على منطقه الذقن عندي واشوف النتيجة .

هذا كل شي من مشترياتي بالفترة الآخيرة
الاستفسارات والاسئلة بكل مكان سناب وانستقرام وتويتر norahbeautybox ولاتنسون الاضافة :)

منتجات خلصتها ورأيي فيها 👍🏽💕

مرحبا بنات

اتوقع هاذي اول مرت اسوي هالنوع من التدوينات فكرته اعرض لكم المنتجات اللي خلصتها ورأيي فيها واذا برجع
اشتريها ولا لا .. المنتجات متنوعه بين العنايه والميكب الميكب يبي له وقت عشان تخلصينه الاغلب عنايه.

lush,ogx

- من اليمين شامبو ogx حطيت صور بالانستقرام كثير قريت مدح عنه بس بعد تجربه لما خلصت علبتين لاحظت شعري طاح بشكل غريب وماكنت مغيره شي بنظامي فاتوقع منه جميل هو وينظف وماحسيته يجفف الشعر بالعكس يعطي شعري لمعه بس ماتوقع ارجع اشتريه بسبب التساقط  متوفر في صيدليات بوتس و وايتس و ماركت الدانوب و لولو .

-شامبو big من لاش روووعه كنظافه وريحه بس يجفف بشكل خيالي راح ارجع اشتريه بس اقلل من استخدامي له نوعيته من الشامبوهات اللي تستخدم بين فتره وفترة يادوب مره مرتين بالشهرمتوفر في محلات لاش .

benefit,thefaceshop

- من اليمين مزيل المكياج بالشاي الاخضر من ذا فيس شوب  روعه يابنات من اجمل المزيلات اللي جربتها ناااعم على البشره ويشيل كل شي وحتى المكياج الي ضد المويه وسعره ممتاز انصح فيه وراح ارجع اشتريه اكيد ❤️ متوفر في محلات ذا فيس شوب .

 - من اليسار مرطب بشكل بخاخ من بينفت ريحته جميله وانوثيه ترطيبه مؤقت ماراح ارجع اشتريه لأن نتيجته بسيطه لاتذكر متوفر في وجوه و سيفورا .

denblan

- معجون denblan تبييض الاسنان جربته وبيض اسناني بشكل ملاحظ  جميل للي مايحبون اللصقات بس يبي له استمرار سعره مبالغ  فيه بالنسبه لمعجون اسنان تلاقونه في صيدليات وايتس .

soap and glory

سكراب من سوب اند قلوري اعشق منتجات الشاور من هالشركة تنظف وريحتها خيال مقشر بملح البحر وزيت الماندرين ريحته منعشه راح ارجع اشتريه بس دايم استغلو العرض عليه متوفر في صيدليات بوتس .

by terry

فاونديشن شير اكسبرت من باي تيري دايم احطه والقى مدح على بشرتي خفيف ويغطي ولا سبب لي حساسيه جميل مره سعره مبالغ فيه بس اذا تبين تغطيه جميله وخفيفه انصحك تاخذينه بدون تردد هالماركة كانت في دابنهامز وحاليا غير متوفر للاسف . 😔

mac, bioderma

- من اليمين مرطب للبشره من بايودرما ترطيبه عادي وكميته قليله جدا بالنسبه لسعره متوفر في صيدليات وايتس و بوتس .

- من اليسار ستورب كريم من ماك تحطينه قبل الاساس يعطي نضارة وقلو طبيعي للبشره نتيجته جميله بس لاحظت اغلب منتجات ماك للبشره تسبب نفور بوجهي ماراح ارجع اشتريه :( 

وخلص البوست اتمنى استفتدوا منه 

تابعوني على التويتر والانستقرام والسناب على حسابي norahbeautybox 

 القاكم على خير 💕❤️

قناع الطين من سيفورا sephora mud mask

مرحبا صبايا
قبل فتره حطيت صوره بالانستقرام لما شريت ماسك الطين من سيفورا كثير سألو عنه قلت اكتب عنه تجربتي بالتفصيل
هنا للي مهتم يشتريه :

الماسك يجي بعلبه بلاستك فاخره قوامه ناعميحتوي على الزنك والنحاس يتوزع على البشره بطبقه معتدله لما ينشف على وجهك يتحول للون افتح هنا تغسلين وجهك بمويه مع التدليك .
الماسك لما جربته حسيته يحرق بالبدايه بعدها يخف واذا نشف تماما ماتحسين باي شيء ينظف البشره بشكل عميق ويزيل الدهون بشكل ملاحظ ويشد البشره مره لدرجة من بكرا احس بشرتي مازالت مشدوده .
ريحته عاديه مب حلوه ولا شينه .
اذا تبين نتايج حلوه تستخدمينه لمده مرتين بالاسبوع تقريبا بس انا عن نفسي تو متش مرتين بالاسبوع :( 
سعره بخمس وسبعين وسعر معقول مره بالمقارنه بالماسك المشهور قلام قلو اللي سعره 300 تقريبا
النتجية بتعجب اللي بشراتهم دهنيه اكثر بس للبشرات الجافه احس لازم بعده كميه مرطب عموما انصح فيه لان سعره مقارنه بالنتيجه اللي شفتها معقول جدا
انصح تجربونه بفرشه الماسك من سيفورا للتوزيع مره جميله وتوزع بالتساوي بعد ماقالت لي صديقتي الماسكات ماينفع توزع باليد وانا طايحة بهالفرشه انظف واسرع .
اتمنى هالبوست عجبكم والقاكم على خير .
تابعوني على التويتر والانستقرام والسناب هذا حسابي : norahbeautybox