مرحبا بنات
من زمان بكتب هالبوست بس انشغلت وزياده على كذا احس منتجات البشره نتايجها تختلف من ناس لناس عشان كذا تترددين تنصحين احد بشي عاجبك ...
انا زي كل البنات احلم ببشره صافيه وقزازه بس للاسف دايم داخله بمعاناة بالثانوي كانت بشرتي زينه بعدين لما دخلت الجامعه الله لايوريكم :(
وقررت اخذ روكتان وخلصت كورس وبعد فتره رجعت الحبوب ضاق صدري واكتئبت ورجعت اكلته مره ثانيه بعد الجامعه واللحين بعد ٣ سنين من تركته مارجعت الحبوب الا يادوب كم حبه كل كم شهرين
البشره يدخل فيها عوامل كثيره الاكل والنفسيه والجو .. الخ بس تقدرين تسيطرين على شي معين بحيث تكونين راضيه الى حد ما عن نفسك .
بحكي لكم عن المنتجات اللي جربتها ولعل وحده منكم تستفيد منها ( انا بشرتي دهنيه الى مختلطه )
اول شي الكليروسانك من ٤ سنين وانا اسمع عنها وانها آله عظيمه لين قررت اغامر واشتريها ولي ٣ شهور تقريبا استعملها جميله بالتنظيف خصوصا لو كنتي حاطه ميك اب ذاك اليوم وغسلتي وجهك تحسين تطلع كل الاثار احيانا استخدمها يومي او يوم ورا يوم .
طريقتها باختصار :
تتحطين الغسول اللي تستخدمينه على الفرشه وبعدها تشغلينها وراح تحسب لك ٢٠ ثانيه للجبهه ٢٠ ثانيه للذقن والانف وعشر ثواني لكل خد ..
شحنها تقريبا نص يوم وراح تظل معك مشحونه لمده اكثر من ٣ اسابيع
فيه ناس استخدموها وويقولون انها طلعت لهم حبوب بالبدايه لان تنضيفها عميق فتطلع الحبوب الداخليه انا ماصار لي هالشي
الفرشه تبدلينها كل ٣ اشهر الى خمس انا ماغيرتها لحد اللحين ..
الغسول استخدم ثنين
افين جميل جدا وينظف مررره يناسب البشره الدهنيه والختلطه ماحسه يجفف البشره
وكلين اند كلير خفيف على البشره وريحته حلوه مع انهم كاتبين عميق المفعول بس ماحسه كذا ابد .
التونر (وظيفته يغلق المسام ويوازن الدهون وبعد الغسول تحطينه )
استخدمت لوريال وكلينك بس مالقيت زي مويه الورد احسها ماتضر البشره وتساعد على توازن الدهون ويكفي انها طبيعيه
اشتريها من الحمود وتلقونها باي محل عطاره ( العلبه انكسرت وحطيته بعلبه سبراي فكتوريا سيكرت )
المرطبات
من اليمين بودي شوب فيتامين اي دايم امدحه للناس وماقد شفت احد اشتكى منه يناسب كل البشرات خفيف مررره على البشره وبنفس الوقت يرطبها استخدمه دايم قبل الميك اب عشان مايدهن وجهي اسوء شي فيه انه اذا خليتيه فتره ماستعملتيه يتغير قوامه يصير خفيف بزياده .
الوسط مرطب من ماركه لروشي بوزي من صيدليات وايتس جمممميل هالمرطب للبشره الدهنيه او المختلطه استخدمه غالبا بالليل لان احس ترطيبه عالي مره .
اليسار من كلينك مع اني ماعمري شريت شي من كلينك وعجبني الا ان هالمرطب ماستغني عنه كانه جل وخالي من الزيوت وتمتصه البشره على طول .
الماسكات
انا انسانه اعشق الماسكات خصوصا وقت الشاور حلو تستخدمينها كل اسبوع الى مرتين بالاسبوع تزيل الخلايا الميته وتنظيفها عميق .
الماسكات اللي جربتها :
ماسك بودي شوب بلو كورن لطيف وتنظيف معقول .
ماسك كيس ماي فيس هالماركه متوفره في بعض فروع التميمي مرره جميل هالماسك تحسينه ينظف ويشد البشره .
ماسك كلارنس يساعد على تضييق المسام ولما تحطينه ينعم بشرتك ويعطها نضاره ماركه كلارنس بالعنايه ممتازه مره بس محد عاطيها فرصه منتجاتهم طبيعيه ولطيفه على البشره اشوف بنات كثير يشتكون من كلينك احس كلينك كميائيه مره وقويه على البشره
انصح البنات يجربون كلارنس بس اختاري اللي يناسبك .
ماسك من نوكس صراحه ماسك فاشل بس مازلت استخدمه عشان احلل فلوسه ماستفدت منه شي غير انها بعد ماحطه يدهن وجهي مره يمكن يناسب غيري مادري !! ..
هالمنتج مدري هو ماسك او غسول بس كاتبين ماسك من ماركه بيلس متوفره في دابنهامز قوامه زي الجل تغسلين وجهك بالمويه وتحطينه وتدلكين وجهك فيه وتطلع لك رغوه منتج مميز ماقد جربت زيه ريحته فواكه حمضيه تنظيف عميق وتحسين بشرتك بعدها فرش ونظيفه .
الواقي
الواقي استخدمت كثير حاليا استخدم نيتروجينا وتوبكس نصحتني فيها وحده من متابعاتي الله يسعدها كلهم ممتازين توبكس لاحظت مايدهن بالوجه ابد .
وهذا كل شي في روتين العنايه طولت عليكم بالمنتجات بس حبيت يكون البوست شامل بحيث كثير يستفيدون منه .
اللي عندها شي تنصح فيه تكتب لنا هنا نتشارك المنتجات واهم شي تكتب وش نوع بشرتها .
نصيحه :
ازاله المكياج قبل النوم مهمه جدا انصحك ماتخلين شي على وجهك وبتلاحظين كيف تتحسن بشرتك بعكس اذا خليتي الميك اب ونمتي حبوب ونفره بالوجه ... هنا كتبت عن مزيلات المكياج .
مرحبا بنات
ان شاء الله انكم بخير انبسطتوا بالاجازه للاسف بدت الدومات وماعاد فيه عندي وقت :(
بهالتدوينه بستعرض افضل ماجربته في الميك اب في الشهر اللي فات وعجبتني وفيه منتجين فاشلين باخر التدوينه بكتب عنهم :
الفاونديشن والكونسيلر :
من فتره طويله وانا ادور البي بي كريم حق بودي شوب وكنت ابي الدرجه الثانيه ودايم مخلصه والحمدلله اخيرا توفر تجربتي كانت ناجحه حبيته مره يغطي بشكل خفيف يندمج بسهوله بس اهم نقطه لازم يتثبت بودره ولا بيعطيك شكل دهني ماراح تحبينه .
بالنسبه للكونسيلر قد كتبت عن هالكونسيلر هنا (دليلك بأختيار الكونسيلر من ماك ) هو تغطيته خفيفه وهذا اللي يناسبني غالبا خصوصا بفترات الصباح ماحب الشي الثقيل .
الشدو :
كل هالشهر تقريبا اذا حطيت شدو ماحط الا هذا اسمه برونز من ماك ( كنت شاريته وانا مسافره وتكسر :( ) جميل جدا تقدرين تخففينه او تثقلينه وحطيت سواتش بالانستقرام هنا للي حاب يشوف اللون .
البلشر :
اليمين MELBA من MAC لونه وردي فاتح جدا وطبيعي دايم مخلص من ماك وعرفت ليش صراحه اكثر بلشر طبيعي عندي ويناسب اي بشره يمكن هذا اللي خلاه يشتره واهم شي انه مطفي يناسب اللي مايحبون اللمعه حطيت سواتش بالانستقرام : )
اليسار بلشر بلمعه اسمه ALPINE BRONZE لونه برونزي مع لمعه ذهبيه جميل مررره كنت انتظره من زمان لاني شفت وحده باليوتيوب تمدحه ورحت سألت حقت ماك قالت مخلص :( بعدين نزلت مره ثانيه طلع الكولكشن توه ينزل اتاري البائعه ماتدري قالت مخلص وبس < تبي تفتك مني ... المهم هو من اخر كولكشن يمكن تلاقونه اللحين للي تبيه روعه وخطير بالصيف .. انا احطه بلشر وصديقتي توزعه على كامل الوجه وتقول مره حلو بالطريقه : ) (قصة حياتي هالبلشر :/ )
الأرواج :
اليمين اقلام ريفلون الجديدة رقمه 001 برضو فيه صوره بالانستقرام صجيتكم فيه بس لاني توي اطيح فيه > بدري :(
الاقلام جميله تغطيتها بسيطه وخفيفه تنفع للصبح وللطلعات البسيطه ثابته بس لمعه القلوس تروح بسرعه
الوسط قد حكيت عنه بتويتر وهو عباره عن محدد شمعي شفاف من ماركه تو فيسد في سيفورا تحددين فيه شفايفك وبعدين ترسمين الروج ويساعد ان الروج مايطلع على الحوايف ويتلطخ المنتج ممتاز وفكرته جديده عجبني مره وجربته كم مره وفعلا مايطلع الروج مع الاكل والسواليف يناسب مره الالوان اللي تحوس وتخافين يخرب شكلك مثل الاورنج والاحمر.
اليسار قلوس / كريم الشفايف من NYX اسمه Buttery Nude رقمه ٠٤ مع ان كثير بنات يمدحونه من زمان بس توي اطيح عليه عجبني مررره ثابت ولونه يجنن بس العيب الوحيد هو الفرشه سيئه مره كانه خشب!! سواتش انستقرام ..
المسكارا :
اليمين المسكارا الصغيره من كلينك تركتها فتره ورجعت لها يعني حتى اللي مالها رموش تحت تطلع لها
اليسار مسكارا من ماركه برستيج من سنتر بوينت جميله المسكرا مره وفرشتها عريضه انا احب هالنوعيه تكثفه مرررره بس التطويل عادي اللي مثلي تهمها الكثافه راح تعجبها مره وسرها ممتاز 30 ريال .
الفرش :
هالفرشه اخذتها من الدانوب وكتبت عن فرشتين هنا بسعر رخيص جميله مره مع الشدو اللي فوق تنفع للي مستعجله وتبي شي سريع مناسبه لكامل الجفن او لو حبيتي للأضاءه .
المناكير :
قبل سنه تذكرون هبه البنات بمناكير تيفاني لدرجه اي بياع تدخلين عنده يقول عندنا مناكير تيفاني عاد حامت كبدي وكرهت اللون وكرهت الاسم وكرهت تيافني بكبره لول .. عاد قبل تره طحت على مناكير بيري ام كتبت تدوينه هنا وعجبني هاللون مره فرايحي وجميل .
المنتجات سيئه لا انصح بشرائها :
هالمنتجين فاشلين بدرجه غير معقوله يعني اصلا هالاشياء مفروض ماتنباع يمكن الروج اهون شوي .. اليمين روج من لوريال اللي يجي غطاه شفاف بساعه او اقل يروح اللون مع ان اللون عاجبني مره لكن للاسف مب ثابت ابدا
اليسار سويت سواتش بالانستقرام عنه وهو من البلشرات الجديدة من مايبلين اغبى بلشر شريته في حياتي مايطلع اللون ابدا ياحسافه الفلوس بس مانصح ولا وحده تشتريه ابدا ابدا .
طولت بهالتدوينه مررره اتمنى تسامحوني واهم شي تستفيدون وهذي غايتي ولاتنسون التعليق والمشاركه .
- *للاشتراك في مدونتي اضغطي على الرابط الموجود في اليمين بالضغط على
- تلقوني هنا على التويتر
- انستقرام : norahbeautybox
- إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه AAM2013 وهنا موقع سيقما
- اشوفكم على خير
مرحبا ياجميلات ...
زي ماعودتكم نهايه كل شهر استعرض اهم المكياج اللي جربته وعجبني تأخرت كم يوم وكله من البرد اللي جا فجأه وجمدنا احس مفروض يجي بالتدريج !! اجل اليوم قمت ودرجه الحراره ٩ يا إلهي .. على كل حال ماطول عليكم ونبداء : )
بالنسبه للوجه كنت استخدم كونسيلر سيلكت كوفر اب من ماك لحاله واحيانا احط فاونديشن شانيل فيتا لومير الغني عن التعريف جميل هالفاونديشن وتغطيته خفيفه وجميله بنفس الوقت وفيه حمايه ١٥ من اشعه الشمس : )
كثير سمعت انه بينقطع عاد مادري اشوفه للحين موجود بالسوق واحسه تصرف غبي
من شانيل يقطعون شي جميل زي هذا !!
الفرشه سامحوني مب نظيفه روعه هالفرشه بدمج الاساس وتعطيك تغطيه رائعه .. فيه وحده ارسلت لي تقول انها ماعجبتها الفرشه وتحسفت عليها .. هو الفكره من الفرشه انك تدمجين لين تحسين ان الاساس اندمج مع بشرتك بشكل طبيعي وراح تعجبك متأكده
الشدو رجعت لبالتي القديم ناتشورال آي من تو فيسد هالبالت جميله جدا تسوين لوك صباحي او سهره فيه الوان مطفيه وفيه اللمعه وقد كتبت عنها هنا
البلشر كنت استخدم تارت ناتشورال بيوتي رووووعه هالبلشر وثابت بشكل عجيب تمنيت اني شريت كم لون واهم شي الماركه طبيعيه لونه وردي غامق بس تقدرين تفتحينه براحتك بالفرشه والدمج
المسكارا لاجديد هههه ماسكارا بنفيت ادري ازعجتكم فيها بس ماستخدمت الا هي ناويه اخلصها واتوقع انها خلصت جميله جدا تطول بشكل جميل وكثير يعتبرونها مسكارتهم المفضله
اللي جمبها نكته برضو مسكارا صغيره للرموش السفليه من كلينك كنت من زمان اشوف باليوتيوب يستخدمونها وعاجبتني مره طبعا ماعتبرها مفضله بس مفضله عشان شكلها يدنننن لكن احس تسوي نفس اللي تسويه المسكارا العاديه ..
الارواج روج لوريال ارواج لوريال فضيعه وفاخره والعلبه اصلا جميله وقد قالت لي وحده من البنات هنا انها تبع ايف سان لوران مادري اذا صدق ولا لا بس الماركه جميله جدا قد كتبت عن هالروج من قبل هنا رقمه ٥٥٠ ناويه اجرب لون ثاني اذا توصون لون معين علموني : )
اللي جمبه محدد مكروف من ميك اب فور ايفر روووووعه هالمحدد اصلا كل اقلام هالماركه شي فضيع احيانا استخدمه لوحده واحيانا مع قلوس او روج مايحتاج اقول الثبات شي خرافي رقمه ١٥ سي : )
اخر شي بعلمكم على شي خقيت عليه علمتني عليه خالتي الله يسعدها شوكولاته بالمارشميلو من مارك اند سبينسر ادمان هالشوكولاته وصديقاتي ادمنوا عليه
وخلصت التدوينه القاكم ان شاء الله بوقت ثاني واذا تبون شي اكتب عنه علموني بالتعليقات : )
للاشتراك في مدونتي اضغطي على الرابط الموجود في اليمين بالضغط على .
