Sunday 3 March 2013

كيف تختارين الكونسيلر المناسب من ماك How to choose Concealer from MAC


مرحبا بنات 
بهالبوست راح اتكلم عن الكونسيلر/ خافي العيوب وتحديدا من ماركة ماك .. كثير بنات يحتارون اي كونسيلر يختارون وش الأنسب لهم ؟
الكونسيلر مهم جدا ويعتبر اضافة اساسية للميك اب ولازم تحددين نوع بشرتك وايش اللي راح تغطينه ؟ هل هي ندب او هالات او احمرار ؟
فيه كثير ناس يكتفون بالكونسيلر بدلا من كريم الاساس خصوصا بالايام العاديه لذلك تأكدي أنك مختارة النوع المناسب .. ونبدأ بسم الله : ) 
اولا ماك عندها ٥ انواع من الكونسيلر تختلف تماما عن بعضها وعن نتائجها وتغطيتها.


١-  Select Cover-up Concealer كونسيلرسيلكت كوفر اب : هو كونسيلر يجي بأنبوب تغطيته خفيفه الى متوسطه قوامه مائي خفيف سهل بالدمج كثير قريت ان بعض الميك اب ارتست يستخدمونه ككريم أساس مناسب للهالات و الاحمرار الخفيف .


٢- Select Moisturecover كونسيلر سيلكت موسترايزكوفر : هالكونسيلر يجي بعلبه زي القلوسات قوامه كريمي ناعم سهل بالدمج تغطيته متوسطه مناسب جدا للهالات يخفيها ويضيئ ماتحت العيون من احب الكونسيلرات لقلبي ينفع للبشرات الجافه : ) 



٣- Pro Longwear Concealer كونسيلر برو لونق وير : (ماقد جربت هالكونسيلر ) هو كونسيلر يجي بضغاط تغطيته متوسط الى ثقيل يغطي الندب والكلف والهالات يعني تقريبا ينفع لكل شي ( قريت كثير انه صعب بالدمج والتحكم ) من اسمه لونق وير ثابت لوقت طويلاذا تبين نتيجة ممتازه بعد ماتحطينه حطي بودره خفيفه تثبته .


٤-  Studio Finish SPF 35 Concealer كونسيلرستديو فينش مع واقي الشمس بنسبة ٣٥ : اشهر كونسيلر في ماك يجي بعلبه زي الشدو قوامه كريمي تغطيته ثقيله سهل بالدمج ويغطي كل شي تقريبا مناسب للندب والكلف والتصبغات والاحمرار لايناسب الهالات لانه راح يتكتل معك بعد كم ساعه .


٥-Studio Sculpt Concealer كونسيلر ستديو سكالبت : يجي بعلبه زجاجيه تغطيته متوسطه الى ثقيله مناسب للبشرات الدهنية عيبه يبي لك تكثرين الكمية شوي عكس الانواع الثانيه تكتفين بكمية صغيره .
بالنسبه للتوزيع ممكن توزيع بفرشه او بيدك حسب ماتفضلين انا افضل اصابعي شكل الفرشه المناسبه للكونسيلر تجي مثل هالصوره 

  
خلصنا الشرح اتمنى سهلت عليكم الإختيار مستقبلا شوفي وش تبين تغطين وش نوع بشرتك وروحي اشتري المناسب لك واي استفسار انا حاضرة .
  • *للاشتراك في مدونتي اضغطي على الرابط الموجود في اليمين بالضغط على  
  • تلقوني هنا على التويتر   
  •   انستقرام : norahbeautybox
  •  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه SAVE2013 وهنا موقع سيقما 

القاكم على خير ..

19 comments:

  1. شكرا جزيلا ياليت تعرضين اﻷسعار

    ReplyDelete
    Replies
    1. الاسعار فيه ١٢٠ وفيها ١٠٥

      Delete
  2. بغيت اسألك عن اسماء الفرش اللي تناسب الكونسيلر , اعطيني ارقامهم الله يعافيك
    من ماك او سيجما او ريل تكنيك
    وشكراااا

    ReplyDelete
    Replies
    1. من ماك ١٤٢ وفيه من ريل تكنيك ديلوكس كريس

      Delete
  3. روعة نوره استفدت من التدوينة كثير
    كنت متحمسه أجرب كونسيلر ستديو فينش لان عليه مدح كثير بس اذا يتكتل مشكلة :(
    ربي يعافيكِ حبيبتي على التدوينة الجميلة
    ♥♥♥

    ReplyDelete
    Replies
    1. هلا ساره نورتيني ولله ،، هو يتكتل حول العين اذا على الوجه فهو رائع جدا
      الله يسلمك نوريني دايم

      Delete
  4. ماشاء الله عليك
    الحمدلله شفت تدوينتك قبل اروح اشتري كنت باخذ ستديو فينش
    بس كويس
    على كذا راح يناسبني كونسيلر سيلكت موسترايزكوفر
    الف شكر لك على التوضيح <3

    ReplyDelete
    Replies
    1. هلا ايمان
      الله يعافيك ياقلبي حلو سعيده جدا انك استفدتي اتمنى تشراكيني بتجربتك مستقبلا

      Delete
  5. طيب انا جربت اول نوع بس يطلع لي خطوط وتحاعيد تحت العين ايش اسوي فيها وكيف اخفيها

    ReplyDelete
    Replies
    1. حطي بودره فوقه عشان يثبت يمكن بشرتك دهنيه

      Delete
  6. جميل جميل جميل يانوره ماشاء الله تبارك الله
    شرحك وافي وواضح وعرفت اشياء ماكنت اعرفها
    الله يعطيك العافية حبيبتي ❤

    ReplyDelete
    Replies
    1. الله يسلمك هيا .. الجميل يرى الجمال كلك ذوق حبيبتي
      سعيده جدا بطلتك

      Delete
  7. الله يعطيك العافية نورة موضوعك جا بوقته
    أنا استخدمت الاستديو فينيش بس ما أعطاني الغطية المطلوبة وفعلا لاحظت إنه يظهر الخطوط ،، وحابة أجرب نوع ثاني
    اللي هو السيليكت بس انتي قلتي للبشرة الجافة !! أنا بشرتس مختلطة وهالاتي واااضحة هل بينفعني

    ReplyDelete
    Replies
    1. اهلين حبيبتي ... السيلكت موسترايزركوفر انصحك تحطين بودره على الاماكن الدهنيه في وجهك لان قوامه كريمي مره وممكن يظهر خطوط بعد كم ساعه .. البرو لون وير احس راح يناسب احتاجك بس ماقد آكد عليك لاني ماقد جربته
      لاتستعجلين على نفسك شوفي جربي بالمحل وخوذي راحتك
      خبريني وش يصير معك

      Delete
  8. بالنسبة لي أستخدم كونسيلرستديو فينش جميل بس يوم قلتي مو مناسب للهلات بديت ألاحظ فعلاً مو مناسب للهلات تطلع خطوط
    يسلمو تدوينة جميلة جداً ومفيدة جداً الله يعطيك العافية ويحفظك ويوفقك

    ReplyDelete
  9. الله يعطيك العافية موضوعك جميل جدا
    اول مرة اشتري كونسيلر من ماك و محتارة اي نوع اشتري انا بشرتي جافة وهالاتي واضحة شوي يمكن يناسبني سيلكت موسترايز كوفر؟
    كم سعرة ؟؟ا
    ياليت والله تخبريني اذا هو مناسب لي او ﻻ

    ReplyDelete
  10. يعطيك العافيه اكثر كونسيلر ماكنت استغني عنه من ماك ستديو سكالبت
    بحكم ان بشرتي دهنيه
    ماعاد صاروا يجيبونه ماك !!!
    والان افكر اجرب البرو لونق وير لأن كثير مدحوه
    يعطيك الف عافيه عالتدوينه المفيده

    ReplyDelete
  11. حبيبتي انا من النوع اللي مااشقر حواجبي ابغاك تنصحيني بكونسيلر ينفع لاخفاء الحواجب

    ReplyDelete
  12. روعة نوره استفدت من التدوينة كثير

    ReplyDelete