ترتيبي لطاوله الميك اب ❤️

مرحبااا بنات شهر رمضان على نهايته الله يعيده علينا وعليكم وحنا باحسن حال
قبل كم يوم حطيت فيديو بالانستقرام عن طريقتي بترتيب الميك اب وكثير بنات اعجبهم انبسطت كثير من الفيد باك قلت اكتب بالمدونه بالتفصيل عن اماكن اغراضي لاني ماذكرتها بالانستقرام  للي حابه ترتب مكياجها كل اشيائي بسيطه ومتوفره واسعارها معقوله يعني اغلى شي الطاوله شريتها ٤٩٥ من ايكيا .
حابه اقول نقطه ضروري ترتبين مكياجك بالطريقه اللي تناسبك عشان تستخدمينه وتعرفين مكان كل شي بكذا تستفيدين من اغراضك وتحللين مشترياتك لان اذا صار كل شي بمكان وعشوائي راح تنسين اشياء ولاتستخدمينها وتخرب وتعفن وانتي ما استانستي فيها .

اول شي الطاوله شريتها من ايكيا متوفره دايم عندهم واختي شرت زيها حتى تركيبها سهل ممكن اخوك سواقكم او حتى انتي تركبينها ماتسوى ياخذون عليك فلوس تركيب وتوصيل فيها درج واحد فقط ماحسه يتحمل كثير فيه مكياج حطيته في ادراج ثانيه خصوصا اللي ماستعمله كثير او شريته وطلع سيئ وبلشانه فيه :(
المرايه من ايكيا برضو سعرها ٧٥ ريال ماحبيت احط مرايه كبيره خصوصا ان عندي مرايه كبيره بالغرفه هاذي تكفي للميك اب وتؤدي الغرض .

علبه القطن الزجاجيه هديه من صديقتي احب احط القطن والاعواد بهالشكل واحب يكون عليها غطا تعرفون جونا غبار وحاله .
مقسم الارواج من الدانوب وفيه مثله اكبر معاه درج ومكان للاغراض الثانيه للمكياج زي بلشر كريم اساس حلو للي مكياجها قليل تحط اشيائها عليه سعره ماتذكر بس اتوقع بحدود  ٥٠ هالمقسمات الشفافه تلقينها برضو في ( ابو ريالين ) ومحلات الكماليات .
حاطه بالت انقلوت عشان الاستخدام السريع ودايم ابدل احيانا نيكد او ماك ... الخ حسب المود .

العلبه الزرقاء حطيت فيها فرش العيون شاريتها من سنتر بوينت من زمان ماعجبتني مره راح ابدلها قريب .. والعلبه الشفافه حطيت فيها فرش الوجه وهي اصلا علبه شمعه من باث اند بودي وركس غسلتها ونظفتها وحطيت الفرش فيها والعلبه الصغيره حطيت فيها البيوتي بلندر وبرضو كانت شمعه من ايكيا لما خلصتها استعملتها بهالشكل .

الفازه كانت جايتنا بشكولاته ماعرف من وين المهم لما اكلوا اهلي التشوكلت اخذتها ههههه وحطيت بلشراتي خصوصا اللي اشكالهم حلوه عشان استمتع بجمال البلشرات هههههه انا من عشاق البلشرات اعتبرها اجمل شي بالميك اب ❤️ ❤️.

هذا كل شي على الطاوله اللي فوق الطاوله استخدمه شبه يومي خصوصا بالايام اللي اكون مستعجله ماحب افتح الدرج وادور شي كل شي قدامي .

بالدرج المقسمات اخذتها من ايكيا اخذت ثنين الواحد ٩ ريال وزعت فيها الميك اب حسب نوعيته شي للقلوسات واقلام الشفايف وش للمسكارا والكحال .... الخ واخر شي فيه مساحه مايوسعها مقسم حطيت العلب البالتات وبين فتره وفتره ابدل بينهم عشان استخدمهم وكل بالت تاخذ حقها ههههههه حشا حسيت انهم عيالي ههههه .

وبس هذا كل شي عن مكياجي وترتيبه اتمنى تستفيدون من هالبوست وشكرا لوقتكم .

• تلقوني هنا على التويتر   
•  انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RNL2013 اضغطي هنا لموقع سيقما
•  اشوفكم على خير .
• 
  

اشياء حبيتها الفتره اللي راحت May Faves!

مرحبااا بنات .. شلونكم ان شاء الله طيبين 
العالم كلها اختبارات ومذاكره فالله يعينكم يارب .. انا جايتكم بمفضلات هالشهر وهي اشياء جربتها هالشهر او الفتره اللي راحت عموما وعجبتني وعلقت عليها عاد اشيائي كثيره هالمره اتمنى تعجبكم وتستفيدون ..

بالنسبه للوجه ماكنت استخدم فاونديشن لاني يوميا احط مكياج فصعبه احط فاونديشن كل يوم .. واحسن شي جربته هالشهر ويعطيني تغطيه جيده هو بي بي كريم مايبلين تغطيته خفيفه مافيه زيوت كثير وفيه حمايه من الشمس اتوقع قرب يخلص حقي اذا تبين تقرين زيادة عن البي بي كريم افتحي هالرابط .
بالنسبه للكونسيلر فيه ثنين كنت استخدمهم اول واحد الكونسيلر الجديد من بنفت وكتبت عنه هنا بس عشانه غامق صرت استخدمه كمصحح للهالات جميل جدا ولايتكتل وانصح فيه بعدها احط كونسيلر فيت مي من مايبلين وهذا فاتح بالنسبه لي بس يعطي اضاءه مع كونسيلر بينفت .. وعموما درجاته قليله لكنه جميل مره ويناسب البشرات اللي فيها عيوب قليله انصح فيه بقوه .
 البلشر بما اني دايم مستعجله وكنت مضغوطه فا احسن شي جربته هو البلشر الكريمي روز بيتل من نكس حلو مره وناعم ويناسب كل البشرات واللوكات وعلى فكره هو بديل مثالي لبلشر بوسي من ماك  شوفي هالرابط .

العيون : هالبالت عندي اياها من زمان من بير مينرلز وهي لميتد ادشن يعني مب متوفر هاللحين شاريتها اون لاين بس من فتره شفت سيفورا منزلين شدوات بير منيرلز قلت دام نزلوها بكتب عنها شدوات هالماركه جدا جميله وثابته وصبغته قويه مره احبها احيانا استخدم لون واحيانا الوان متعدده ( ملاحظه ماراح تلاقون هالبالت بس نصيحه جربوا شدواتهم ) .
الاكحال غير الاسود الوحده اكيد تحب التغيير ومافي اجمل من اللون الاخضر والبني كتغيير وبرضو هادي ومب زحمه زي الازرق والموف كلها من بورجوا وثباتها ممتاز .
المسكارا هاذي عينه من شانيل لمسكراتهم الجديده ممتازه مرره توزع الرموش ولا تكتلها وبرضو تطول حبيتها مره مع اني ماقد فكرت اشتري مسكارا من شانيل بس هاذي اعجبتني مره ويمكن اشتريها بالحجم العادي مستقبلا.

الفرش :
سيقما الكابوكي F88 اروح وارجع عليها مره ممتازه للتوزيع والدمج وبما ان شعيراتها جدا كثيفه فهي مناسبه مره للتغطيه المثاليه مع الفاونديشن الثقيل وحتى الخفيف تنفع له تقدرين تطلبينها من هنا وفيه خصم لو حبيتي 10 بالميه .
الفرشه الثانيه لي كم اسبوع شريتها من بربري رقمها ٩ استخدمها للدمج الشدو مره ممتازه وتدمج بسهوله ومهمتها شبيهه بفرشه 224 بس حبيت هاذي اكثر لان شعيراتها اكثر .

الشفايف :
روج ايف سان لوران YSL 14 وروج كريم بورلي رقمه 095 من ريفلون الصراحه كل هاللونين ابي استعملهم وبديت ادمجهم سوا اول شي احط ايف سان لوران وبعدها اخففه بمنديل وبعدها احط كريم بورليه من ريفلون ويعطيني نتيجه ناعمه مره .
واللي عندها كريم بورليه ووتورطت فيه لانه نيود بزياده اقولها حاولي تستخدمينه مع الارواج الصارخه او المحددات وراح يعجبك مره .

والقلوس اعشقه من كلارنس رقمه 2 مره جميل وقد تكلمت عنه احسانه احطه لوحده واحيانا مع ارواج ريحته تفتح النفس ويمكن تتحمسين وتاكلينه لان طعمه لذيذ . 

الاظافر :
 اليسار من سالي هانسن من وجوه فرع صحارى لونه ازرق بحري مره جميل وكريمي وعلى طول ينشف وهاذي اول مره اجرب مناكيرهم وعجبني مره رقمه 250 واسمه BLUE IT  .
الثاني هوليدي من شانيل Holiday 617 هذا اللون لو تذكرون الصيف الماضي انهبلت كنت ابيه ولا حصلته وكان لميتد ادشن واللحين نزلوه بشكل دائم جاني هديهلونه اورنج فاقع وهادي بنفس الوقت وبرضو حسيته يقبل كل البشرات .

الشيين اللي ماحبيتهم الفتره الماضيه :
هالسكراب / من باث اند بودي بوركس بالمانقو وجوز الهند ريحته استغفر الله ياربي قبيحه جدا وغير كذا مايسوي اي مفعول بس شكل واسم هاذي اول مره اجرب سكرابات باث بس شكلي ماراح اسويها ثاني مره .
الشي الثاني شمعه من ديورانس محلهم في حياة مول المحل يجننن مره وروايح تاخذ العقل وكنت من زمان ابي شمعه جميله وقررت اشتري منهم وحده وطبعا اخترت رائحتي المفضل اللافندر او ماشغلتها بالبيت انصدمت مالها ريحه ابد ابد :( مره انقهرت وخصوصا انها غاليه وغير كذا شي يقهرني بالشموع ماتحترق بالتساوي يعني بيضيع نص الشمع عليك بالحوايف عموما المحل ودي اجرب منه اشياء بس الشمعه احبطتني .

 *للاشتراك في مدونتي اضغطي على الرابط الموجود فوق على اليمين بالضغط على  

• تلقوني هنا على التويتر   
•  انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  SUM2013 اضغطي هنا لموقع سيقما
•  اشوفكم على خير .

ريفيو شامل عن البي بي كريم

مرحبا بنات شلونكم ؟ ان شاء الله بخير : ) .❤.❤
هالريفيو انطلب مني كثير من زمان ان شاء الله يعجبكم ويفيدكم ولو اني تأخرت فيه 
اول شي بتكلم عن البي بي كريم باختصار  :
هو منتج قديم كانوا الاسيوين يستخدمونه ولما عرفوا شركات التجميل الغربيه عنه كل شركه انتجت بيبي خاص فيها
طبعا بشرات الاسيويات لها خاصيه معينه نظرا لبيئتهم واكلهم تلاقون ام 80 سنه زي بشره ام 50 عندنا فشي طبيعي ان هالمنتج يناسبهم جدا ويضيف لبشرتهم رونق خاص فيهم اكثر مننا ❤.

تعريف البي بي كريم :
البي بي كريم مكوناته غير ضاره وكيميائيه ويرطب ويعطي البشره نضاره ويعالجها ( هالكلام مب بالضروره صحيح )
الماركات المشهوره اغلبها نزلت لها بي بي كريم اللي فاشل واللي ممتاز واللي خفيف واللي كانه كريم اساس وهكذا ... انا عن نفسي ماكنت متحمسه اجربه من ايام الاقلاع وانا اشوف التجارات يبيعون الكوري حسيته موضه وبتروح .. لكن بعد مده بديت اجرب من كم ماركه وفيه اللي عجبني وفيه اللي لا .. راح استعرض معكم بهالتدوينه تجاربي لست انواع بي بي كريم اتمنى يعجبكم وتستفيدون واسفه اني تأخرت بالريفيو بس قلت اجرب هالكريمات فتره عشان احكم صح ❤ ❤ ❤: )  

بي بي كريم سماش بوكس : 
جميل جدا واعتبره كريم اساس خفيف تغطيته متوسطه قوامه ثقيل شوي فيه حماية من الشمس انصح فيه اللي تبي تغطيه اثقل من البي بي كريم الخفيف

بي بي كريم بودي شوب :
يجي منه 3 درجات 1 و2 و3 انا اخترت 2 قوامه ابيض ومع الدمج يتحول للون بشرتك تغطيته خفيفه لازم يتثبت بودره اشوف انه يدهن بعد كم ساعه .

بي بي كريم بوبي براون :
ممتاز وهو افضل واحد جربته يناسب البشرات الصفراء اكثر من الورديه تغطيته متوسطه ثباته ممتاز ويدمج بسهوله على البشره فيه نسبه 35 حماية من الشمس .

بي بي كريم قارنيه :
كثير يسبون هذا البي بي انا ماشفت انه سيئ خصوصا اني ادمجه مع اساس احيانا ويعطيني تغطيه حلوه قوامه كريمي يندمج بسهوله
مافيه حماية من الشمس .

بي بي كريم مايبلين :
تغطيه خفيفه جدا عجبني قوامه وتركيبته كثير احطه اذا بغيت طله خفيفه مع شوي كونسيلر ويطلع جميل جدا انصح فيه المراهقات اللي يحبون التغطيه الخفيفه بالمدرسه مناسب لهم و نسبه الحمايه من الشمس  30 .

بي بي كريم لوريال :
اول ماحطيته لاحظت كم وحده قالوا بشرتك منوره للاسف الشديد ماقد شفته باسواقنا انا شريته من السوق الحره من دبي تغطيته خفيفه قوامه ابيض ويندمج بسهوله فيه حماية بسيطه من الشمس 12 بالميه بس الشي اللي ماعجبني فيه انه يترك ملمس ترابي خفيف .

اللي محتاجين تعرفونه بحطه بهالنقاط ❤ :
1- البي بي كريم يناسب البشرات الصافيه اكثر من البشرات المتضرره
2- البي بي كريم عاده فيه دهون لان هو اللي يخلي قوامه كريمي ويعطي اضاءه للوجه لذلك تحتاجين تثبيت بودره خصوصا اذا كانت بشرتك دهنيه
3- البي بي كريم غالبا تغطيته خفيفه الي متوسطه فأذا انتي تدورين شي ثقيل ما انصحك فيه  
4- اغلب البي بي كريم يجي بثلاث درجات لايت ميديم ودارك .

وهذا كل شي عن البي بي كريم اتمنى استفتدوا من هالتدوينه واللي جربت اي نوع او انواع ثانيه تقرد تترك تعليق هنا او منشن بالتويتر❤ ❤.❤
 

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
• 
    انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RSR2013 وهنا موقع سيقما  
•  اشوفكم على خير 

تجاربي لشهر مارس MARCH FAVORITES

مرحبا بنات 
ان شاء الله انكم بخير انبسطتوا بالاجازه للاسف بدت الدومات وماعاد فيه عندي وقت :( 
بهالتدوينه بستعرض افضل ماجربته في الميك اب في الشهر اللي فات وعجبتني وفيه منتجين فاشلين باخر التدوينه بكتب عنهم : 

الفاونديشن والكونسيلر :
من فتره طويله وانا ادور البي بي كريم حق بودي شوب وكنت ابي الدرجه الثانيه ودايم مخلصه والحمدلله اخيرا توفر تجربتي كانت ناجحه حبيته مره يغطي بشكل خفيف يندمج بسهوله بس اهم نقطه لازم يتثبت بودره ولا بيعطيك شكل دهني ماراح تحبينه .
بالنسبه للكونسيلر قد كتبت عن هالكونسيلر هنا (دليلك بأختيار الكونسيلر من ماك ) هو تغطيته خفيفه وهذا اللي يناسبني غالبا خصوصا بفترات الصباح ماحب الشي الثقيل .

الشدو : 
كل هالشهر تقريبا اذا حطيت شدو ماحط الا هذا اسمه برونز من ماك ( كنت شاريته وانا مسافره وتكسر :( ) جميل جدا تقدرين تخففينه او تثقلينه وحطيت سواتش بالانستقرام هنا للي حاب يشوف اللون .

البلشر :
اليمين  MELBA من MAC  لونه وردي فاتح جدا وطبيعي دايم مخلص من ماك وعرفت ليش صراحه اكثر بلشر طبيعي عندي ويناسب اي بشره يمكن هذا اللي خلاه يشتره واهم شي انه مطفي يناسب اللي مايحبون اللمعه  حطيت سواتش بالانستقرام : ) 
اليسار بلشر بلمعه اسمه ALPINE BRONZE لونه برونزي مع لمعه ذهبيه جميل مررره كنت انتظره من زمان لاني شفت وحده باليوتيوب تمدحه ورحت سألت حقت ماك قالت مخلص :( بعدين نزلت مره ثانيه طلع الكولكشن توه ينزل اتاري البائعه ماتدري قالت مخلص وبس < تبي تفتك مني ... المهم هو من اخر كولكشن يمكن تلاقونه اللحين للي تبيه روعه وخطير بالصيف .. انا احطه بلشر وصديقتي توزعه على كامل الوجه وتقول مره حلو بالطريقه : ) (قصة حياتي هالبلشر :/ )

الأرواج : 
اليمين اقلام ريفلون الجديدة رقمه 001 برضو فيه صوره بالانستقرام صجيتكم فيه بس لاني توي اطيح فيه > بدري :( 
الاقلام جميله تغطيتها بسيطه وخفيفه تنفع للصبح وللطلعات البسيطه ثابته بس لمعه القلوس تروح بسرعه 
الوسط قد حكيت عنه بتويتر وهو عباره عن محدد شمعي شفاف من ماركه تو فيسد في سيفورا تحددين فيه شفايفك وبعدين ترسمين الروج ويساعد ان الروج مايطلع على الحوايف ويتلطخ المنتج ممتاز وفكرته جديده عجبني مره وجربته كم مره وفعلا مايطلع الروج مع الاكل والسواليف يناسب مره الالوان اللي تحوس وتخافين يخرب شكلك مثل الاورنج والاحمر.

اليسار قلوس / كريم الشفايف من NYX اسمه  Buttery Nude رقمه ٠٤ مع ان كثير بنات يمدحونه من زمان بس توي اطيح عليه عجبني مررره ثابت ولونه يجنن بس العيب الوحيد هو الفرشه سيئه مره كانه خشب!! سواتش انستقرام .. 

 المسكارا :
اليمين المسكارا الصغيره من كلينك تركتها فتره ورجعت لها يعني حتى اللي مالها رموش تحت تطلع لها 
اليسار مسكارا من ماركه برستيج من سنتر بوينت جميله المسكرا مره وفرشتها عريضه انا احب هالنوعيه تكثفه مرررره بس التطويل عادي اللي مثلي تهمها الكثافه راح تعجبها مره وسرها ممتاز 30 ريال .

 الفرش :
هالفرشه اخذتها من الدانوب وكتبت عن فرشتين هنا بسعر رخيص جميله مره مع الشدو اللي فوق تنفع للي مستعجله وتبي شي سريع مناسبه لكامل الجفن او لو حبيتي للأضاءه .

المناكير : 
 قبل سنه تذكرون هبه البنات بمناكير تيفاني لدرجه اي بياع تدخلين عنده يقول عندنا مناكير تيفاني عاد حامت كبدي وكرهت اللون وكرهت الاسم وكرهت تيافني بكبره لول .. عاد قبل تره طحت على مناكير بيري ام كتبت تدوينه هنا وعجبني هاللون مره فرايحي وجميل . 

المنتجات سيئه لا انصح بشرائها :

هالمنتجين فاشلين بدرجه غير معقوله يعني اصلا هالاشياء مفروض ماتنباع يمكن الروج اهون شوي .. اليمين روج من لوريال اللي يجي غطاه شفاف بساعه او اقل يروح اللون مع ان اللون عاجبني مره لكن للاسف مب ثابت ابدا 
اليسار سويت سواتش بالانستقرام عنه وهو من البلشرات الجديدة من مايبلين اغبى بلشر شريته في حياتي مايطلع اللون ابدا ياحسافه الفلوس بس مانصح ولا وحده تشتريه ابدا ابدا .

طولت بهالتدوينه مررره اتمنى تسامحوني واهم شي تستفيدون وهذي غايتي ولاتنسون التعليق والمشاركه .

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
•   انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  AAM2013 وهنا موقع سيقما  
•  اشوفكم على خير 

بلشر كريمي من ماك مع بديل رخيص من نكس

مرحبا ... 
عندي حماس زايد هالايام .. ودي كل يوم اكتب بوست p;
المهم اليوم بكتب لكم عن بلشر من ماك مشهور جدا جدا حتى بالمحل لو تقولين ابي بلشر كريمي على طول راح يرشح لك هاللون وراح اكتب عن بديل من نكس 

بلشر كريمي من ماك اسمه POSEY  لونه وردي مرجاني طبيعي كريمي بشكل ناعم سهل بالدمج لمسه بسيطه تتوزع على الخد مايحتاج كمية كبيره يناسب جميع الوان البشره الغامق والفاتح واللي بينهم ..
البديل من نكس ماركه متوسطه الاسعار وجودتها رائعه لقيت هالبلشر الكريمي اسمه Glow وهو شبيه مره بحق ماك يمكن ماك وردي اكثر بس على البشره حطيت واحد على خد والثاني على خد مافي فرق 
الفرق ماك اسهل بالدمج لانه كريمي اكثر .. حسيت ماك يعطي نظاره اكثر مع ان نكس برضو يعطي قلو بس مب زي ماك .. الثبات نفس الثبات مافي فرق ومعروف جودة بلشرات نكس وثباتها الطويل .
سعر ماك ٩٨ .. ماك ماينعرف لهم بالاسعار كل يوم يزيدون الاسعار الشدوات كنت اشتريها  ٥٩ واللحين صارت ٧٢ !!!!
نرجع للاسعار سعر بلشر نكس مايتعدى الخمسين يعني تقريبا النص يعني تشترين بلشرين من نكس بسعر واحد من ماك ومافي اي فرق يذكر 
هنا سواتش يبين التشابه :

اتمنى استفدتوا من هالتدوينه واذا لقيتي شي بديل بسعر ارخص انصحك تشترينه لان كثير مكياج بسعر متوسط وجودته زي جودة الغالي ../ ليش نخسر انفسنا ؟!

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
•   انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه SAVE2013 وهنا موقع سيقما 

القاكم على خير ..

كيف تختارين الكونسيلر المناسب من ماك How to choose Concealer from MAC

مرحبا بنات 
بهالبوست راح اتكلم عن الكونسيلر/ خافي العيوب وتحديدا من ماركة ماك .. كثير بنات يحتارون اي كونسيلر يختارون وش الأنسب لهم ؟
الكونسيلر مهم جدا ويعتبر اضافة اساسية للميك اب ولازم تحددين نوع بشرتك وايش اللي راح تغطينه ؟ هل هي ندب او هالات او احمرار ؟
فيه كثير ناس يكتفون بالكونسيلر بدلا من كريم الاساس خصوصا بالايام العاديه لذلك تأكدي أنك مختارة النوع المناسب .. ونبدأ بسم الله : ) 
اولا ماك عندها ٥ انواع من الكونسيلر تختلف تماما عن بعضها وعن نتائجها وتغطيتها.

 

١-  Select Cover-up Concealer كونسيلرسيلكت كوفر اب : هو كونسيلر يجي بأنبوب تغطيته خفيفه الى متوسطه قوامه مائي خفيف سهل بالدمج كثير قريت ان بعض الميك اب ارتست يستخدمونه ككريم أساس مناسب للهالات و الاحمرار الخفيف .

٢- Select Moisturecover كونسيلر سيلكت موسترايزكوفر : هالكونسيلر يجي بعلبه زي القلوسات قوامه كريمي ناعم سهل بالدمج تغطيته متوسطه مناسب جدا للهالات يخفيها ويضيئ ماتحت العيون من احب الكونسيلرات لقلبي ينفع للبشرات الجافه : ) 

٣- Pro Longwear Concealer كونسيلر برو لونق وير : (ماقد جربت هالكونسيلر ) هو كونسيلر يجي بضغاط تغطيته متوسط الى ثقيل يغطي الندب والكلف والهالات يعني تقريبا ينفع لكل شي ( قريت كثير انه صعب بالدمج والتحكم ) من اسمه لونق وير ثابت لوقت طويلاذا تبين نتيجة ممتازه بعد ماتحطينه حطي بودره خفيفه تثبته .

٤-  Studio Finish SPF 35 Concealer كونسيلرستديو فينش مع واقي الشمس بنسبة ٣٥ : اشهر كونسيلر في ماك يجي بعلبه زي الشدو قوامه كريمي تغطيته ثقيله سهل بالدمج ويغطي كل شي تقريبا مناسب للندب والكلف والتصبغات والاحمرار لايناسب الهالات لانه راح يتكتل معك بعد كم ساعه .

٥-Studio Sculpt Concealer كونسيلر ستديو سكالبت : يجي بعلبه زجاجيه تغطيته متوسطه الى ثقيله مناسب للبشرات الدهنية عيبه يبي لك تكثرين الكمية شوي عكس الانواع الثانيه تكتفين بكمية صغيره .
بالنسبه للتوزيع ممكن توزيع بفرشه او بيدك حسب ماتفضلين انا افضل اصابعي شكل الفرشه المناسبه للكونسيلر تجي مثل هالصوره 

  
خلصنا الشرح اتمنى سهلت عليكم الإختيار مستقبلا شوفي وش تبين تغطين وش نوع بشرتك وروحي اشتري المناسب لك واي استفسار انا حاضرة .

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
•   انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه SAVE2013 وهنا موقع سيقما 

القاكم على خير ..

February Favs 2013 الأفضل في شهر فبراير

رجعت للمفضلات (عبارة عن افضل المنتجات اللي استخدمتها في الشهر اللي فات ) احس من زمان ماكتبت بس لأن احيانا مالقى شي جديد فحلو اخذ بريك مع اني اعشق فديوهات وتدوينات المفضلات .

 اجمل بيبي كريم جربته بيبي كريم لوريال كثير بنات قالوا لي علمينا اذا عجبك وابشركم انه عجبني P: جميل جدا وخفيف تغطيته متوسطه ماستخدمت الا هو طوال هالشهر اسوء مافيه يبي له ترطيب عالي لانه قوامه ناشف .. 

كواد الشدو رقم ٤٠١ من زمان شاريته لكن ماحصل اجربه الا هالفتره واستغربت اني متجاهلته التغطيه واللون جميلين مره وثابت مره من الماركه التركية flormar فيه كثير تاجرات على التويتر يوفرونها واسعارها مناسبه .

 يمكن كثير اتكلم عن هالبرايمر لي سنة استخدمه وابشركم خلص وناوية اشتري واحد ثاني من افضل البرايمر اللي جربته يعطي اللون الاصلي للشدو الثبات رائع لاكثر من ١٢ ساعه تكتفين بنقطتين منه وتوزعينه على العيون قبل الشدو وبعدها بلحظات توزعين الشدومن ماركة تو فيسد تحصلونها في سيفورا .

المسكارا من ريفلون تكثف وتطول اجمل مافيها انها خفيفه جدا ماتحسين حاطه شي على رموشك مكتوب على العلبه انها تساعد على نمو شعيرات الرموش مادري اذا صدق او لا بس نشوف وش يصير .

 اضاءه لميتد اديشن من ماك اسمها WHISPER OF GILT يمكن تحصلونها لأن احيانا تقعد الاشياء فيعرضونها .
هذا اخر منتج شريته من كولكشنات ماك لأنهم زودوها ماغير ينزلون كولكشن وبين كل كولكشن وكولكشن كولكشن فرعي !!! ماصار يهمني وش ينزلون وغالبا المنتجات اللي بالكوكلشنات اللي تنزل تصير جودتها سيئه خصوصا الفرش مانصحكم تشترون منها .

 مافي اجمل من انك ترجعين لمنتج كنتي ناسيته وتكتشفين انك تحبينه بلشر من بينفت اسمه شوقر بمب Sugarbomb لونه مشمشي ذهبي جميل جدا يعطي لوك صحي منعش انصح فيه للصيف .

مادري وش فيني هالشهر على ريفلون !
الارواج هاذي اعتبرها بالنسبه لي افضل ارواج ماركه ريفلون ثابته ومرطبه وتغطيتها كامله واسعارها ممتازه 
الاول اسمهMink رقمه ٦٧١ الوسط اسمه CHERRIES IN THE SNOW رقمه 440 والأخير اسمه Fire & Ice رقمه ٧٢٠ ...
القلوس انا مب راعيه قلوسات ابدا بس هذا طحت فيه غرامه برضو من ريفلون حلاته مايدبق وتحسينه ثقيل اسمهPink Pop رقمه ١٨٠ .

فرشه الفلات كابوكي من سيقما رقم F 88  اعجبتني هالفرشه مره استخدمها لتوزيع الفاونديشن واحيانا تنفع للكنتور دمجها ناعم وتعطي تغطيه صافيه تقدرون تشترونها من هنا .

ماقلت لكم ريفلون قصتها قصه :/ هذا المناكير المطفي الوحيد اللي عندي واكتشفت اني احب المطفي اللون اخضر غامق فخم وكلاسي اسمه Emerald City رقمه ٠٣٢ مره انصحكم فيه طبعا عشان تعرفين اذا هو مطفي او لا فيه ستكر على الغطا مكتوب عليه مات .

اسرع شي اخلصه بالبيت الشموع والقهوة هالشمعه من باث اند بودي وركس من الاروماثيربي وهي مجموعه محدوده من الشموع هي شموع للاسترخاء والنوم .

اخر شي حطيته قبل بالانستقرام وهو دولاب الاكسسورات الجميل العظيم كل ما اشوفه اقول ويني كنت عنه من زمان جميل ومنظم ومرتب لكل الحاجات الاكسسواريه اول كنت حايسه نفسي بالادراج والعلب والتعليقات والسلسله تتشبك مع الاسواره < حرب 
واللحين يارب لك الحمد بس افتح واتنقى جاني احساس الاميرات ههه انصحكم فيه بقوه شريته من طيبه الرياض فيه من بني واسود وابيض سعره 550 تقدرون تطلبونه من هنا  ع الطلب
خلصت مفضلاتي اتمنى تستفيدون يارب وتلقون شي يعجبكم القاكم على خير حبيباتي ..

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر  
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه SAVE2013