وانتهى شهر اكتوبر .. وجينا للمفضلات واعتذر ان هالشهر ماكتبت كثير مريت بظروف خلتني ما ادون واللحين رجعت لكم واتمنى تسامحوني على القصور ..
بالنسبه للفاونديشن هالفاونديشن علمتني عليه صديقتي سارا وجربته منها كم يوم وكانت تجربه ممتازه ورحت شريت مثله تلقونه بصيدليه وايتس قوامه خفيف يتوزع بسهوله وعندهم درجات كثيره من ماركه اسنسي عاد تخيلوا بكم !؟ .. ٢٥ ريال فقط ارخص فاونديشن شريته : )
اللي على اليمين البي بي كريم من قارنيه من فتره قلت لكم بالتويتر بقول تجربتي والحمدلله كانت تجربه حلوه لكن مب قد التوقعات لانه غامق نوعا ما علي فصرت ادمجه معه الفاونديشن اللي فوق والنتيجه رووووعه تقريبا اغلب هالشهر كان هذا استخدامي للاساس : ) ♥
البلشر من بورجوا رقم ٥٤ جميل جدا هاللون وردي على مشمشي مثالي للاستخدام اليومي ♥♥ .
الشدو ايز تو كيل من جورج ارماني رقم ١٥ شدو بين الكريمي والموسي جميل جدا جدا جدا من اروع الشدوهات اللي جربتها بحياتي لونه ذهبي على بني يعطي كذا لون اغلب الاحيان اخففه يطلع ذهبي والنتيجه ممتازه طلبته من النت بس بنات الرياض يلقونه بالفيصليه هارفي نيكلس .
قلم الكحل من بورجوا من زمان هالكحل عندي وهالشهر ماكنت بالمود احط اسود لانه ثقيل وممل ككحل يومي فكنت احط هاللون روعه وسلس مره وفيه لمعه ذهبيه خفيفه جميل مع مسكارا بدون شدو حتى وخلصت نصه تقريبا ♥ : )
فرشه ٢٢٤ من ماك مستحيل مستحيل احط ميك اب بدون ما استعمل هالفرشه جمييله ومذهله ادمج فيها بكل سهوله اقدر اقول من مفضلاتي الدائمه.
ارواج ميك اب فور ايفر اللي نزلت قبل سنتين تقريبا من اروع الارواج اللي جربتها بحياتي تغطيتها كامله والوان روعه واهم شي هاللون مات ومايجفف الشفايف زي الماركات الثانيه اهم شي قشري شفايفك قبل واستمتعي باجمل روج .. لونه بين الموف والوردي رقمه ٥ ♥♥♥ .
المسكارا كنت استخدم ذي ار ريل من بنفيت كا استخدام يومي جميله تطول الرموش بس ماتكثف وهذا عيبها وبالنسبه لي الكثافه تهمني اكثر من الطول .
المناكير من دولتشي اند قابانا رقم ١٠٨ لونه وردي مشمشي يجنننن هاللون وانصح لو تبين شي مميز واضافه جديده لكولكشنك تختارينه ♥
واخيرا كوبي المفضل من دبنهامز .. دبنهامز كانوا يجيبون اكواب روعه ومميزه بس بالفتره الاخيره مدري تغيروا اتذكر قد شريت منهم كوب زي كوب سوزان ماير اللي بدسبرت هاوس وايفز > مشكله اللي يدقق بكل شي المهم انكسر :(
فيه احد يجمع اكواب مثلي ؟
استودعكم الله والقاكم بتدوينات اخرى ان شاء الله ♥
* للاشتراك في مدونتي اضغطي على الرابط الموجود في اليمين بالضغط على
.
مرحبا فيكم من جديد اليوم تدوينتي عن الطلب من النت بالنسبه للمكياج لان كثير بنات سألوني كيف تطلبين وقررت اسوي تدوينه عشان الجميع يستفيد
هالشحنه من زمان طالبتها وصورتها لكم عشان اعرض تجربتي لكم .. طلبت ميك اب من ساكس فيث افنيو فيه ماركات كثيرة وفيه منها مايوصل للسعوديه .. اخترت اللي يوصل للسعوديه وتسوقت منها
الشحنة تجي مغلفه بهالاكياس الفقاقعيه هههههه ومحميه بشكل ممتاز يعني لاتخافين ماراح يتكسر شي .
هاذي طلباتي الجميله ... اجمل شي بالطلب من النت انه اذا وصل تحسين انها هديه ههههههههه يلا نشوف وش جوا الكراتين :
العلبه الدائريه شدو كريمي من جورج ارماني اسمه Eyes To Kill رقم ١٥
اللي تحته شدو من نارس
والعلبه الكبيره هي اضاءه امبر دايمند من ديور هاذي الاضاءه مشهوره مره وتقييماتها بعالم الميك اب عاليه والكل يمدحها خصوصا تانيا البريطانيه دايم تحطها بالميك اب وعاجبتني مره وللاسف دورتها بكل محلات الرياض مالقيتها .. وقررت اطلبها ان شاء الله راح اكتب عنها بالتفصيل
القلم هو روج ثابت من نارس روووووعه بشكل خيالي وان شاء الله بجرب الوان ثانيه ان حصل لي < مطفره :(
والروج من ايف سان لوران رقم ١٣ وتكلمت عنه بهالتدوينه اضغطي هنا
كيف اطلب ؟ :
الطلب من النت شي كنت استصعبه مره لكن يوم قريت بالنت اكتشفت انه سهل واصعب من طلعه السوق بشوي..
اول شي انا اطلب من مواقع توصل مباشر للسعوديه فقط
بحط لكم مواقع اطلب منها وتوصل مباشر .
وش احتاج ؟ :
تحتاجين لفيزا .. بالنسبه لي انا فيزتي مسبقه الدفع لأن كثير اقرى تحذيرات بالسرقه والاحتيال فقلت هاذي اضمن احط فيها فلوس على قدر الطلب .
متى توصل طلبيتي ؟ :
عاده يستغرق الطلب ٥ ايام عمل واحسن شي تطلبين يوم الاثنين لانه بدايه الاسبوع عندهم .. مره طلبت الجمعه وطول الطلب مره لانه كان نهايه الاسبوع عندهم .
الاسعار ؟ :
طبعا الاسعار تقريبا نفس اسعارنا مافي اختلاف كبير واحيانا ارخص .. بس الميزه انك تلقين اشياء مب متوفر باسواقنا
بعد ماتتسوقين راح تجيك صفحه تعبين بيانتك فيها وكذا شكلها عبيها حسب معلوماتك .. اضغطي على الصوره للتكبير
بعدها تسوين تشيك اوت نهائي وراح تجيك رساله على ايميلك اللي حطيتيه انه استقبلنا طلبك .. بعد يوم او يومين حسب سياسه الموقع راح يرسلون لك رقم تتبع هالرقم يساعدك تشوفين وين صارت شحنتك بالنسبه لي مواقعي قليله اللي اطلب منها وكلها توصل على الدي اتش ال .. حلوين بس مايوصلون للبيت انتي تروحين تجيبين شحنتك من فرعهم بعد مايدقون عليك ويقولون لك وصلت .
المواقع اللي اطلب منها :
http://shop.nordstrom.com/ فيه ميك اب وملابس وجزم شامل مره عيبه الضريبه مرتفعه
saksfifthavenue نفس فكره الموقع الاول بس اقل ضريبه
http://www.shopbop.com/ موقع شامل بس مافيه ميك اب روعه ويوصل بسرعه وضريبته قليله
http://www1.bloomingdales.com فيه ماركات متنوعه لكن يطول بالتوصيل مره .
اتمنى يكون شرحي واضح واي استفسار انا حاضره باللي اقدر عليه .
* للاشتراك في مدونتي اضغطي على الرابط الموجود في اليمين بالضغط على .
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )
