SEPHORA HAUL

 من زمااان ماسويت هول من سيفورا غير اني من زمان ماقشيت منهم شي يعني تمر اوقات اخذ شي محتاجته بس اني اقعد ساعه ساعتين ابحث بالاشياء لا.. بس هالمره حبيت اشتري منهم كذا غرض وغير انه كان فااااضي يفتح النفس .

عاد قلت اكتب بوست عن مشترياتي الاخيرة منهم ..

GUERLAIN  L`OR MAKE-UP BASE
برايمر الذهب من قيرلان سمعت مدح عليه كثييييير ناس تقول يغير الملمس والشكل تماما لاي فاونديشن تحطينه بجربه واقولكم عاد اذا ينفع او لا .

 

DIORSKIN NUDE AIR POWDER
بودرة ديور نيود كنت ادور بودره من زمان لاني مازلت استخدم بورجوا هيلثي مكس وقربت تخلص فقلت ابي شي خفيف وبنفس الوقت طبيعي .
(للاسف بنات شريت هالباودر ويوم فتحتها تفاجات انها مستخدمه والحروف ممسوحه انقهرت من الاهمال ورحت لسيفورا وعلى طول بدلها بدون اي كلمه واضح انها تصير كثير لذلك اذا شريتوا شي زي كذا شيكوا قبل ماتدفعون )

NAKED SKIN
فاونديشن نيكد من اربن داكي اول مانزل جربته على يدي وحبيته مره تغطيته خفيفه يعتبر مصحح خفيف اكثر من انه فاونديشن هذا
حبيت ان فيه حماية بس فكره الضغاط ماعجبتني ابد وغير كذا احس كميتة قليلة :(

NARS PURE MATTE LIPSTICK
بما ان نارس صارت عندنا حبيت اخذ منهم شي وجربت هالروج من صاحبتي وحبيته مررره تغطيته صراحه خفيفه مره بس لونه يجنن بحط سواتش بالانستقرام .اسمه TONKIN

اخذت فرشة انستازيا برفلي هيلز للهايلايتر .

فرشة ميكب فور ايفر رقم 242 صار لي سنه ادورها والحمد لله لقيتها بسيفورا اتذكر اني لقيتها بمحل ميكب فور ايفر بس انا ابي اشتريها من سيفورا عشان النقاط :(

 

GLAMGLOW gravitymud firming treatment 
قناع من قلام قلو وظيفته يشد البشره ويزيل الجلد الميت  والقشور من البشره متحمسه اجربه عشان طريقة ازالته عاجبتني مره D; جاي معه فرشه حبيتها مره صغيره اتذكر شريت قلام قلو اللي علبته سوداء قبل ماكان معه فرشه :(

اتمنى استفدتو من هالبوست ولاتنسون تشاركوني مشترياتكم الجديده باي مكان بالسوشل ميديا
اسمي على التويتر والانستقرام والسناب نفس الشي NORAHBEAUTYBOX

اللي عندها اسئلة او فضفضه او تبي تسولف تقدر تراسلني على هالايميل ارد على الجميع حسب استطاعتي : )
norahbeautybox@gmail.com

الاضاءات اللي ماستغني عنها (دليلك باختيار الاضاءات )

اهلين بنات 
رمضان كريم والله يتقبل منا ومنكم يارب 
اليوم جايبه لكم ست اضائات اعشقها بكتب عن كل اضاءه وانتي اختاري اللي يناسبك 
الاضاءه شي مهم بالميك اب يعطي جمال ونظاره على وجهك ومؤخرا صارت كل ماركه تنافس بمنتجاتها 
اول شي حاولي تبتعدين عن الاضاءه اللي فيها قليتر او ( حبيبات لمعه كبيره ) الا اذا كنتي رايحه حفلات دي جي ممكن تكون مناسبه : )

بالنسبه للون اذا كنتي بيضاء اختاري اللي تجي على وردي واذا سمرا اختاري اللي على ذهبي وفيه اضاءات تكون مناسبه للجميع البشرات يكون فيها مزيج من اللون الذهبي والوردي .
اماكن توزيع الاضاءة هي الاماكن البارزه في وجهك مثل الخدود ماتحت الحاجبين فيه ناس يحبون يحطون على الجبهه خفيف والانف وارنبه الفم .

اضاءة ماري لو من ذا بالم هالاضاءه روعه لونها ذهبي تناسب البشرات البيضا والسمراء ثباتها ممتاز تحتاجين فرشه خفيفه لان صبغتها قويه .

اضاءه ماك لميتد اديشن روعه وجايه على ذهبي اسمها ويسبر اف قيلت

اضاءه توم فورد جميله وتعطي لوك الرطوبه ثباتها متوسط وبالاجواء الحاره ممكن ماتثبت ابد بس كاضاءه روعه زي اضاءه العارضات بالعروض 

اضاءه ديور امبر دايمند اعشقها هالاضاءه تناسب كل البشرات وممكن تستخدمينها كا آي شدو 

اضاءه بينفت واتس اب روعه هالاضاءه واكثر اضاءه طبيعيه هي انسب اضاءه من الست للصباح حطيها وانتي مرتاحه مافيها قلتر وتناسب البشرات البيضا والسمرا ثباتها ممتاز وتوزيعها سهل .

اضاءه هاي بيم اول اضاءه اشتريتها جميله وسهله بالتوزيع حلو كمان تدمجينها مع الفاونديشن تعطي وجهك نظاره ولمعان جميل .

وهذا كل شي .. بنات لاتنسون تدعموني بالفولو بالاشياء اللي تحت باكون ممتنه لكم كثير ❤️

• تلقوني هنا على التويتر   
•  انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RNL2013 اضغطي هنا لموقع سيقما
•  اشوفكم على خير .

حمره خدود من ديور Rosy Glow Healthy Glow Awakening Blush

مرحبا بنات ♥ ♥ 
قبل فتره سمعت عن بلشر جديد من ديور وكثير بالنت تكلموا عنه وعن ميزه فكرته وقررت اشتريه وهذا اول بلشر عندي من ديور وصراحه ماتوقعت انه نازل عندنا لانه جديد واسواقنا دايم يتأخرون بس الحمد لله لقيته موجود في دبنهامز . 

اذا فتحتي الكرتون تلقين العلبه مع المخبأ المخملي اللي اتمنى اعرف وش فايدته (مره ماله داعي ) المهم زي ماتشوفون لونه وردي فاقع يجي معاه فرشه صغيره والعلبه فضيه جميله جدا .. اللي خلاني اشتري هالبلشر انه يتحول حسب كميائيه الجسم يعني يعطي كل بشره لون مثلا بنت سمراء بشرتها يغير هاللون للون الوردي الدافي والبيضاء يقلب لونها وردي فاتح وهكذا ... الفكره مميزه وعجبتني مره المنتجات اللي زي كذا اللي تكون عالميه تناسب جميع البشرات بالعالم قليله بس اتوقع بيكون لها صيت بالشهور الجايه .
فيه شدوات من سماش بوكس نفس الفكره وقد جربت عينه قلوس من سماش بوكس يقلب اللون حسب لون شفايفك . ♥ ♥ 
اللي بقوله بالنهايه ان لونه بالعلبه مايطلع على الخدود زي كذا ابدا يتحول حسب بشرتك يناسب جميع الوان البشره ثباته جربته مرتين وثابته ممتاز من 5 الى 6 ساعات قوامه بودره بدون لمعه وصبغته واضحه وفيه ريحه ورد خفيفه ..بالنسبه لسعره غالي واعتبره مبالغه من ديور 218 على بلشر بس يمكن عشان تميز هالبلشر عن البلشرات العاديه .
ان شاء الله عجبكم هالريفيو واستفدتوا منه.
هنا سواتش بس زي ماوضحت اللون متغير .

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر  

اشوفكم بخير .. ♥ ♥  ♥ ♥ 

Best Beauty Products of 2012 افضل منتجات ٢٠١٢ الجماليه

مرحبا فيكم ... ان شاء الله كلكم بخير ...احس من زمان مادونت قلت يابنت اتركي الكسل واكتبي طبعا تأخر الوقت على مفضلات ديسمبر وتأخر الوقت على مفضلات ٢٠١٢ فقررت اكتب عن ٢٠١٢ مره وحده وان شاء الله تستفيدون من هالتدوينه .. 

الوجه /
اول شي نبدا بافضل فاونديشن .. فاونديشن شانيل فيتالومير غني عن التعريف خفيف وتغطيته متوسطه سهل بالدمج وهذا اجمل شي فيه 
الكونسيلر من بوبي براون ... بوبي براون ممتازه بمنتجات الوجه سواء اساس او كونسيلر او بودره واذا لقيتي درجتك المناسبه اضمن لك راح تكونين راضيه عن مكياجك .

البلشر من تارت اعتبره من اجمل البلشرات اللي جربتها يكفي انها طبيعي لونه طبيعي وثباته رائع .
 

اضاءه ديور امبر دايمند قد كتبت عنها هنا اضاءه جميله وناعمه وكل شي حلو بالدنيا شريتها من موقع ساكس فيث افنيو .. اتمنى ينزلونها هنا تستحق الشراء .

الأدوات / 

البيوتي بلندر جميله جدا جدا مع الاساس سهله بالاستخدام وناعمه على الوجه يمكن اللي يقهرني فيها احس انها تمتص الاساس مع اني قد شفت فيديو وحده قاطعتها من النص وتقول شوفوا مافيه اساس جوا وهذا دليل انها ماتمتص > ياحسافتها يوم قصتها :( 
المهم انصح فيها مره توزع الاساس بشكل طبيعي 
الفرشه الثانيه فرشه انقلوت للعيون وش اقول عن هالفرشه ؟ اعتبرها من فرشي المفضله المحبوبه تدمج بشكل خفيييييف ومركز لو بغيتي تدمجين لون غامق على كسره الجفن هاذي ممتازه لهالشي زي هالصوره 

العيون /

الشدو صعب الاختيار لأن مكياج العيون نحب نجدد فيه كل يوم فما بالكم سنة كامله !!... طبعا نيكد ٢ ابهرتني زي الاولى مع اني اول متردده اخذها ولا لا بس الحمدلله استفدت منها 
ولو بختار لون واحد راح اختار All That Glitter هالشدو بدون مبالغه ماقد حطيته بأي مكان الا احد يمدحني عليها طريقتي استخدمه على كامل الجفن مع كحل كات ايز عريض واجمل لوك اضمن لك بيطلع لوك انيق وناعم .. هذاي الصوره من النت توضح اللون 
الشدو الكريمي يفك ازمه ولما تحطينه ويكون يعطي لونين تحسين مكياجك جميل ومرتب كثير اجرب نوعيات وهالسنه طحت على شدو كريمي من بنفت اللون موف على بني ثابت ومايتكتل وسهل بالدمج دايم اذا مالي خلق احط شي احطه مع مسكارا وفعلا يرضيني الالوان اللي منزلينها قليله بس كلها روعه . 

الحواجب ماجربت شي جديد هالسنة وبقيت على بودرة الحواجب من بودي شوب .. وصايره احط مرطب بشكل خفيف جدا يعطي لوك طبيعي 

الكحل كحل ماك الكريمي من اشهر انواع الكحل وقليل جدا القى احد مايحبه سواد بس يبي لك فرشه واستمتعي باجمل كحله 
المسكارا شوكينق من سان لوران جميله هالمسكارا مررره يمكن بالآول ماعجبتني لأنها جمعت الرموش بس مع كل استخدام احبها اكثر وفعلا قد قريت مقال تجميلي يقولك فيه نوع مسكارات تتحسن مع الوقت .. يعني لاتيأسين من المسكارا على طول جربيها كذا مره .

الشفاه /

الارواج .. السنه هاذي الروج اللي حسيت اني حبيته ويستحف افضل روج هو روج سان لوران رقم ١٣ مع اني ماستخدمته طول السنه تقريبا الصيف بس .. لكن ثباته ولونه يستحق يكون افضل روج .. وكثير سمعت مدح على كل كولكشن روج كتور 
القلوس من نكس جميل وطبيعي وريحته توت انصح فيه حتى اللي ماتحب القلوسات اسمه (ناتشورال ) .
 المناكير /

المناكير ريفلون سموكي كانفس جميل هاللون ويحلي اليد بشكل .. ولونه غريب بس مب بشكل ملفت .. انا من النوع اللي احب احط مناكير كثير وبنفس الوقت احب الشي اللي يكون شيك ويليق مع كل شي وبكل وقت وهذا منقذني الحمدلله .
عطر / 

العطر من بنيفت اسمه ايفا عطر جميل وساحر ومافي  احد ماراح يحبه .. فعلا هذا العطر اللي راح يتفق الجميع انه جميل من كثر ماهو حلو صرت اشتريه هديه لصديقاتي وقريباتي واضمن انه يعجبهم ... بينفت منزلين ٦ عطورات كلهم حلوين جربوهم : )

العنايه /

من اليمين مرطب يدين من لوكسيتان معومه فائقه باختصار 
اللي جمبه مرطب من ستيفس بالخوخ استخدمه بالاسبوع مره جميله ولطيف 
اللي جمبه سيتافيل عرفته من مدونه كات واك قلام الله يسعدها روعه واتوقع اني راح اعتمده بحياتي 
الشامبو طبي اسمه كاستاليا صراحه قللللل التساقط عندي بشكل واضح الحمدلله جربت قبله فيتشي لكن هذا افضل 
اللي فوق ماسك من لوريال وماسكات لوريال كلها ممتازه واهم شي ماتخلي الشعر دهني .

هالمنتج اكثر منتج تكلموا عنه الناس هالسنه والسنه اللي قبلها ... مزيل مكياج ناعم على البشره وينظف اذا كان موجود بمدينتك انصحك وبقوه تشترينه : )

واخيرا شموع باث اند بودي غرامي وعشقي مع انهم يقولون مضره بس احبها .. واجمل وحده جربتها وراح اشتريها مره ثانيه ان شاء الله هي تشيري بلوسم اشغلها تحت واشمها فوق ريحتها تنتشر بكل البيت .. وبما ان باث تخفيضات انصحكم تستولون عليها بس خلوا لي وحده .
اتمنى لكم سنة جميله يارب تتحقق فيها امنياتكم وتزيد نجاحتكم .
*للاشتراك في مدونتي اضغطي على الرابط الموجود في اليمين بالضغط على .

*  هنا التويتر ( تويتر نوره بيوتي بوكس )

أضاءه كرستيان ديور آمبر دايموند Christian Dior Amber Diamond

مرحبا ... ان شاء الله كلكم بخير وطيبين .. ❤❤
اليوم بتكلم عن اضاءه ديور امبر دايموند اللي حطيتها من ضمن مشترياتي بالنت قبل فتره وبعد تجربه شهرين تقريبا قلت لازم اكتب عنها ❤❤
اول شي بقولكم شي مؤسف ان الأضاءه ماتنباع عندنا واستغرب هالشح بمحلاتنا كل شي ناقص والاشياء قديمه وطلعت بعدها كولكشنات غير وهم لسا .. المشكله لو بسوي احصائيه حنا اكثر بنات نحب الميك اب مادري ليه مايحترموننا ويجيبون الجديد اول بأول طبعا بعد شهور من البحث بمحلاتنا يأست وطلبتها من النت بظرف اسبوع ونص صارت عندي الحمدلله .
نجي للأضاءه اللي وقعت في غرامها.. انا مدمنه اضاءات واحسها اساسيه بالميك اب تعطي لوك صحي ومنعش وجميل ماحب الميك اب اللي يكون كله مطفي يعني حتى لو روجك مطفي ورسمت عيونك كذلك حلو تضيفين لمسه اضاءه تكسر هالميك اب ومايصير شكلك باهت ❤❤
دايم ابحثي بالاضاءه انها تكون اقرب شي للطبيعي وانتي تدورين اضاءه ابتعدي عن اللي يكون فيه شمير واضح واهم شي حبيبات الشمير ما تكون كبيره ،، بعدي عن اللي تكون على فضي ودايم ابحثي عن اللي تميل للذهبي هي اقرب للطبيعي .. للاسف ماقد جربت اضاءه من الميزانيه المحدوده فما عندي بديل او شي قريب خصوصا ان ماركات الميزانيه المحدودة عندنا عندهم فقر بالبرونزر والاضاءات.

اضاءه ديور عباره عن خمس الوان متدرجه  من الالوان الذهبيه الى البرونزيه الفاتحه صبغتها واضحه تحطين بالفرشه بشكل خفيف منها الثبات ثابته لاكثر من ٦ ساعات العلبه تحتوي على الكثير يعني اتوقع تكفي لوقت طويل تجي معها المخبأ اللي مادري وش فايدته !! يجي منها علبه ثانيه طلعوها بعد هاذي اسمها روز دايموند والوانها جايه على وردي كثير يقولون انها شبيهه بسوفت اند جنتل من ماك وجربت اضاءه ماك بالمحل عشان اقيمها واقارن لقيت ان سوفت اند جنتل اخشن من ديور امبر دايموند لمعه ديور جايه انعم واسطع ماك جميله جدا لو بغيتي بديل .
هنا حطيت السواتش طبعا مب زي على البشره ابدا وماحب احط صور مو من تصويري الا للضروره فاعذروني : )

 

ان شاء الله تكون هالتدوينه وافيه لهالأضاءه واستفدتوا لو بالشيء البسيط : )  ❤❤

* للاشتراك في مدونتي اضغطي على الرابط الموجود في اليمين بالضغط على .

* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

مشترياتي المكياجيه من النت مع طريقه الطلب من النت

مرحبا فيكم من جديد اليوم تدوينتي عن الطلب من النت بالنسبه للمكياج لان كثير بنات سألوني كيف تطلبين وقررت اسوي تدوينه عشان الجميع يستفيد
هالشحنه من زمان طالبتها وصورتها لكم عشان اعرض تجربتي لكم .. طلبت ميك اب من ساكس فيث افنيو فيه ماركات كثيرة وفيه منها مايوصل للسعوديه .. اخترت اللي يوصل للسعوديه وتسوقت منها

الشحنة تجي مغلفه بهالاكياس الفقاقعيه هههههه ومحميه بشكل ممتاز يعني لاتخافين ماراح يتكسر شي .

هاذي طلباتي الجميله ... اجمل شي بالطلب من النت انه اذا وصل تحسين انها هديه ههههههههه يلا نشوف وش جوا الكراتين :

العلبه الدائريه شدو كريمي من جورج ارماني اسمه Eyes To Kill رقم ١٥
اللي تحته شدو من نارس
والعلبه الكبيره هي اضاءه امبر دايمند من ديور هاذي الاضاءه مشهوره مره وتقييماتها بعالم الميك اب عاليه والكل يمدحها خصوصا تانيا البريطانيه دايم تحطها بالميك اب وعاجبتني مره وللاسف دورتها بكل محلات الرياض مالقيتها .. وقررت اطلبها ان شاء الله راح اكتب عنها بالتفصيل
القلم هو روج ثابت من نارس روووووعه بشكل خيالي وان شاء الله بجرب الوان ثانيه ان حصل لي < مطفره :(
والروج من ايف سان لوران رقم ١٣ وتكلمت عنه بهالتدوينه اضغطي هنا
 كيف اطلب ؟ :
الطلب من النت شي كنت استصعبه مره لكن يوم قريت بالنت اكتشفت انه سهل واصعب من طلعه السوق بشوي..
اول شي انا اطلب من مواقع توصل مباشر للسعوديه  فقط 
بحط لكم مواقع اطلب منها وتوصل مباشر .
وش احتاج ؟ :
تحتاجين لفيزا .. بالنسبه لي انا فيزتي مسبقه الدفع لأن كثير اقرى تحذيرات بالسرقه والاحتيال فقلت هاذي اضمن احط فيها فلوس على قدر الطلب .
متى توصل طلبيتي ؟ : 
عاده يستغرق الطلب ٥ ايام عمل واحسن شي تطلبين يوم الاثنين لانه بدايه الاسبوع عندهم .. مره طلبت الجمعه وطول الطلب مره لانه كان نهايه الاسبوع عندهم .
 الاسعار ؟ :
طبعا الاسعار تقريبا نفس اسعارنا مافي اختلاف كبير واحيانا ارخص .. بس الميزه انك تلقين اشياء مب متوفر باسواقنا 
بعد ماتتسوقين راح تجيك صفحه تعبين بيانتك فيها وكذا شكلها عبيها حسب معلوماتك .. اضغطي على الصوره للتكبير

بعدها تسوين تشيك اوت نهائي وراح تجيك رساله على ايميلك اللي حطيتيه انه استقبلنا طلبك .. بعد يوم او يومين حسب سياسه الموقع راح يرسلون لك رقم تتبع هالرقم يساعدك تشوفين وين صارت شحنتك بالنسبه لي مواقعي قليله اللي اطلب منها وكلها توصل على الدي اتش ال .. حلوين بس مايوصلون للبيت انتي تروحين تجيبين شحنتك من فرعهم بعد مايدقون عليك ويقولون لك وصلت .

المواقع اللي اطلب منها :
 http://shop.nordstrom.com/ فيه ميك اب وملابس وجزم شامل مره عيبه الضريبه مرتفعه
 saksfifthavenue نفس فكره الموقع الاول بس اقل ضريبه 
http://www.shopbop.com/ موقع شامل بس مافيه ميك اب روعه ويوصل بسرعه وضريبته قليله
http://www1.bloomingdales.com فيه ماركات متنوعه لكن يطول بالتوصيل مره .

اتمنى يكون شرحي واضح واي استفسار انا حاضره باللي اقدر عليه . 
 

 * للاشتراك في مدونتي اضغطي على الرابط الموجود في اليمين بالضغط على .

* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

منتجات ندمت على شرائها

التسوق من امتع الاشياء بحياتنا ولما تتوفقين باشياء ممتازه يصير اسعد واسعد ♥ :)
كثير منتجات ندمنا اننا شريناها وماستعملناها يا اما انك تشوفين مدح ويطلع مب قد الكلام او البايع يقنعك انه واو وهو خربوطي او بكل بساطه انتي تخطئين باختيارك وهالشي يصير للاغلبيه بالمحلات نتحمس نشتري مع الناس والجو العام بالسوق يحرضك تشترين اشياء يمكن تكون غير جيدة او سيئه تدوينتي هاذي راح اقولكم عن منتجات ندمت اني شريتها: 

بودرة البرونز  من بورجوا /Bronzing Powder From BOURJOIS 
بودرة البرونز من بورجوا تجي على شكل لوح شوكولاته بعلبه كرتونيه تتسكر مغناطيسيا العلبه كيوت مره وسمعت مدح كثير عليها وقررت اشتريها واستغربت كثير كيف الناس معجبتهم صبغتها سيئه جدا لازم تحطين كم طبقه عشان يطلع لك اللون ماعتبر هالشي جيد ابدا يضيع وقت وجهد الباودر برونز يجي بدرجتين واح وخمسين وثنين وخمسين .

بيس ال مات من ميك اب فور ايفر All mat from MUFE
المنتج الثاني ال مات من ميك اب فور ايفر يفترض انه بيس يمتص الدهون ويعطيك اللوك المطفي للاسف مايسوي شي حطيتيه او ماحطيتيه نفس الشي جربته على وحده بشرتها دهنيه ومافي اي فرق خصوصا منطقه الانف بالنسبه للبشرات الدهنيه يتركز فيها الدهون ماتغيرت بعد ساعه الأنف فيه لمعان ! حتي للبشرات العاديه لو بغيتي تحطينه عشان يعطيك لوك مخملي ماراح يسوي شي يذكر اللي محيرني ان الميك اب ارتست من ميك اب فور ايفر يعشقونه يمكن انا ماعرفت له ؟! 
جربته فوق وتحت الفونديشن نفس الشي للامانه ملمسه مخملي رائع وريحته نظافه :) . 

فرشه الحمره من بودي شوب / Blush Brush From TheBodyShop
هالفرشه وصتني عليها صديقتي وقالت انها جميله ولاني اعشق فرش الميك اب شريتها .. الفرشه حجمها وسعرها معقول لكنها ناعمه بزيادة عن اللزوم فيه فرش ناعمه لكن تمسك اللون بالشكل المطلوب هاذي العكس 
التوزيع فيها سيئ جدا خصوصا ان بلشراتي صبغتها قويه اغلبها فتطبع اللون طباعه واذا جيتي توزعين راح يبان نقطه البدايه والفكره من البلشر انه يكون ناتشروال قدر الامكان هاذي تفعل العكس فعلا اكرهها وندمت اني شريتها مانصح فيها راح اجرب الكابوكي يمكن تكون احسن منها لاني سمعت مدح عليها : ) 
 

اساس ميبلين دريم لوكد موس / Dream liquid Mousse From Maybelline 
الاساس شريته بناء على مدح البائع مدح غير طبيعي شريته وندمت فورا الاساس يسيح ومايثبت ابدا حطي شوي او كثير الثبات سيئ قوامه ثقيل شوي وصعب بالدمج  الى حد وما انسى انه يتكتل بشكل قبيح الشي الحلو فيه الضغاط بما اني احب العلب اللي تجي ضغط سهله بالتحكم والاستعمال لكن ماراح انصح فيه احد ابدا .

قلوس من سماش بكس Gloos From Smashbox
قلوس من سماش بوكس شريته الشتا اللي راح هاللون عبجني مره وكونه غامق وقلوس شي اغراني بقوه اشتريه جميل جميل كلون لكن تركيبته سيئه ثقيل بالنسبه لقلوس ويتلصق كأني حاطه شي فوق شفايفي احب القلوسات الخفيفه تعطي تغطيه ولوك جميل فرشته مب عمليه من النوعيه اللي تكون شعيرات وقاسية وطويله مفروض تكون اسفنجيه اسهل بالتوزيع ماتوقع اني راح اشتري قلوسات من سماش بوكس ابدا .

مناكير من كليرز/  Manicure From Claires 

مناكير كليرز شريت لي وشريت لاختي منها هالماركه معروف انها تقريبا موجهه للمراهقات لكن حتى المراهقات يستحقون مناكير افضل سيئ بدرجه غير معقوله مع اني اسكر العلبه بشكل جيد الا انه تنشف ويصير قوامه كثيف وكأنه صمغ هذا غير ان اول ماشريته كان يطول على بال ماينشف .. مع ان سعره ١٣ ريال لكن حسافه عليه ريالين 
الوانهم حلوه لكن مستحيل اشتريه ثاني مره ولا حتى لطفلة ام خمس سنوات : )

ظل كريمي من ديور Creme Eyeshadow From Dior 
شدو كريمي من ديور شريته من ايام الصيف قوامه موسي على كريمي سهل جدا بالتوزيع لونه حلو وصيفي المشكله انه يتكتل بشكل غريب حطيت برايمر او ماحطيت نفس الشي مع اني جربت كثير شدوات كريميه لكن هذا اعتبره الاسواء استغربت من النتيجه لأن شدوهات ديور بالعاده ممتازه .
 
فيه منتجات ندمت عليها كانت من كولكشنات ليمتد اديشن فكره ان هالمنتج فترته محدوده تغريني مره : ( والعواقب منتج اندم عليه ماحبيت اذكرها لانها ماراح تفيدكم بشي لانها ماعاد صارت موجودة بالمحلات .
 فيه منتجات شريتها وندمت عليها ورميتها ماتحملت وجودها بحياتي ولو كنت داريه اني بكتب هالموضوع كان احتفظت فيها منها شدو بورجوا الثلاثي اتذكر انه اسوء شدو مر علي صبغته خفيفه ولا تبين وحتى لو بينت يطلع اللون واضح انه متكلف وطبقات متراكمة و ندمت بعد على فرش مكياجي للوجه والبلشر بعد فتره بسيطه خشنت معي وغير الشعر اللي تساقط :( برضو شدو شانيل الرباعي الالوان كانت روعه نتشرال وبرونز لكنها تطيح وتهل على كل الوجه .
المنتجات ماعجبتني انا شخصيا بعد تجارب وفتره ليست بالقليله لكن ممكن تعجب غيري وتمشي معهم ولولا اختلاف الاذواق لبارت السلع لاتنسون تعلموني عن منتجات انتم ندمتوا عليها : )
* اتمنى تدوينتي حازت على رضاكم واستفدتوا تسعدني متابعتكم واشتراككم وتعليقاتكم :)
* للاشتراك في مدونتي اضغطي على الرابط الموجود في اليمين .