Best Beauty Products of 2012 افضل منتجات ٢٠١٢ الجماليه

مرحبا فيكم ... ان شاء الله كلكم بخير ...احس من زمان مادونت قلت يابنت اتركي الكسل واكتبي طبعا تأخر الوقت على مفضلات ديسمبر وتأخر الوقت على مفضلات ٢٠١٢ فقررت اكتب عن ٢٠١٢ مره وحده وان شاء الله تستفيدون من هالتدوينه .. 

الوجه /
اول شي نبدا بافضل فاونديشن .. فاونديشن شانيل فيتالومير غني عن التعريف خفيف وتغطيته متوسطه سهل بالدمج وهذا اجمل شي فيه 
الكونسيلر من بوبي براون ... بوبي براون ممتازه بمنتجات الوجه سواء اساس او كونسيلر او بودره واذا لقيتي درجتك المناسبه اضمن لك راح تكونين راضيه عن مكياجك .

البلشر من تارت اعتبره من اجمل البلشرات اللي جربتها يكفي انها طبيعي لونه طبيعي وثباته رائع .
 

اضاءه ديور امبر دايمند قد كتبت عنها هنا اضاءه جميله وناعمه وكل شي حلو بالدنيا شريتها من موقع ساكس فيث افنيو .. اتمنى ينزلونها هنا تستحق الشراء .

الأدوات / 

البيوتي بلندر جميله جدا جدا مع الاساس سهله بالاستخدام وناعمه على الوجه يمكن اللي يقهرني فيها احس انها تمتص الاساس مع اني قد شفت فيديو وحده قاطعتها من النص وتقول شوفوا مافيه اساس جوا وهذا دليل انها ماتمتص > ياحسافتها يوم قصتها :( 
المهم انصح فيها مره توزع الاساس بشكل طبيعي 
الفرشه الثانيه فرشه انقلوت للعيون وش اقول عن هالفرشه ؟ اعتبرها من فرشي المفضله المحبوبه تدمج بشكل خفيييييف ومركز لو بغيتي تدمجين لون غامق على كسره الجفن هاذي ممتازه لهالشي زي هالصوره 

العيون /

الشدو صعب الاختيار لأن مكياج العيون نحب نجدد فيه كل يوم فما بالكم سنة كامله !!... طبعا نيكد ٢ ابهرتني زي الاولى مع اني اول متردده اخذها ولا لا بس الحمدلله استفدت منها 
ولو بختار لون واحد راح اختار All That Glitter هالشدو بدون مبالغه ماقد حطيته بأي مكان الا احد يمدحني عليها طريقتي استخدمه على كامل الجفن مع كحل كات ايز عريض واجمل لوك اضمن لك بيطلع لوك انيق وناعم .. هذاي الصوره من النت توضح اللون 
الشدو الكريمي يفك ازمه ولما تحطينه ويكون يعطي لونين تحسين مكياجك جميل ومرتب كثير اجرب نوعيات وهالسنه طحت على شدو كريمي من بنفت اللون موف على بني ثابت ومايتكتل وسهل بالدمج دايم اذا مالي خلق احط شي احطه مع مسكارا وفعلا يرضيني الالوان اللي منزلينها قليله بس كلها روعه . 

الحواجب ماجربت شي جديد هالسنة وبقيت على بودرة الحواجب من بودي شوب .. وصايره احط مرطب بشكل خفيف جدا يعطي لوك طبيعي 

الكحل كحل ماك الكريمي من اشهر انواع الكحل وقليل جدا القى احد مايحبه سواد بس يبي لك فرشه واستمتعي باجمل كحله 
المسكارا شوكينق من سان لوران جميله هالمسكارا مررره يمكن بالآول ماعجبتني لأنها جمعت الرموش بس مع كل استخدام احبها اكثر وفعلا قد قريت مقال تجميلي يقولك فيه نوع مسكارات تتحسن مع الوقت .. يعني لاتيأسين من المسكارا على طول جربيها كذا مره .

الشفاه /

الارواج .. السنه هاذي الروج اللي حسيت اني حبيته ويستحف افضل روج هو روج سان لوران رقم ١٣ مع اني ماستخدمته طول السنه تقريبا الصيف بس .. لكن ثباته ولونه يستحق يكون افضل روج .. وكثير سمعت مدح على كل كولكشن روج كتور 
القلوس من نكس جميل وطبيعي وريحته توت انصح فيه حتى اللي ماتحب القلوسات اسمه (ناتشورال ) .
 المناكير /

المناكير ريفلون سموكي كانفس جميل هاللون ويحلي اليد بشكل .. ولونه غريب بس مب بشكل ملفت .. انا من النوع اللي احب احط مناكير كثير وبنفس الوقت احب الشي اللي يكون شيك ويليق مع كل شي وبكل وقت وهذا منقذني الحمدلله .
عطر / 

العطر من بنيفت اسمه ايفا عطر جميل وساحر ومافي  احد ماراح يحبه .. فعلا هذا العطر اللي راح يتفق الجميع انه جميل من كثر ماهو حلو صرت اشتريه هديه لصديقاتي وقريباتي واضمن انه يعجبهم ... بينفت منزلين ٦ عطورات كلهم حلوين جربوهم : )

العنايه /

من اليمين مرطب يدين من لوكسيتان معومه فائقه باختصار 
اللي جمبه مرطب من ستيفس بالخوخ استخدمه بالاسبوع مره جميله ولطيف 
اللي جمبه سيتافيل عرفته من مدونه كات واك قلام الله يسعدها روعه واتوقع اني راح اعتمده بحياتي 
الشامبو طبي اسمه كاستاليا صراحه قللللل التساقط عندي بشكل واضح الحمدلله جربت قبله فيتشي لكن هذا افضل 
اللي فوق ماسك من لوريال وماسكات لوريال كلها ممتازه واهم شي ماتخلي الشعر دهني .

هالمنتج اكثر منتج تكلموا عنه الناس هالسنه والسنه اللي قبلها ... مزيل مكياج ناعم على البشره وينظف اذا كان موجود بمدينتك انصحك وبقوه تشترينه : )

واخيرا شموع باث اند بودي غرامي وعشقي مع انهم يقولون مضره بس احبها .. واجمل وحده جربتها وراح اشتريها مره ثانيه ان شاء الله هي تشيري بلوسم اشغلها تحت واشمها فوق ريحتها تنتشر بكل البيت .. وبما ان باث تخفيضات انصحكم تستولون عليها بس خلوا لي وحده .
اتمنى لكم سنة جميله يارب تتحقق فيها امنياتكم وتزيد نجاحتكم .
*للاشتراك في مدونتي اضغطي على الرابط الموجود في اليمين بالضغط على .

*  هنا التويتر ( تويتر نوره بيوتي بوكس )