كريمات اساس للميزانيه المحدودة

صباح الخير
اليوم بكتب تدوينه عن كريمات اساس ( الميزانيه المحدودة ) واقصد اللي يكون سعرها متوسط الى رخيص ونلقاها بالصيدليات غالبا طبعا مب رخيصه لكن مقارنه بالماركات العالميه الثانيه نقدر نقول سعرها ممتاز ميزة الماركات انها تعطي الجميع فرصه للشراء وغير انها تعتمد على مواكبه الماركات الراقيه / High End .

اساس بورجوا هيلثي مكس / Bourjois Healthy Mix foundation
هالأساس مافي احد مايعرفه او مر عليه الاسم اساس خفيف الى متوسط قوامه سائل مائي نوعا ما ريحته كأنها بطيخ مشابهه كثير لريحه اساس شانيل فيتا لوميير بس شانيل اقرب للورد وكثير ناس يقارنون بينهم ويقولون متشابهين حتى بالقوام نفسه لو مهتمه بالتشابه زوري تدوينتي مقارنه بلشر شانيل مع بلشر بورجوا هلثي مكس ينفع للبشرات العاديه والجافه يعطيها اضاءه وتغطيه جميله اما الدهنيه ما انصح فيه لأن احس بعد ساعه يعطيها بشره تلمع بشكل غير جميل (لمعه دهنيه مب لمعه قلو واضاءه ) ممكن تستخدمه صاحبه البشره الدهنيه بس بشرط اذا خلصت توزيع تنتظر خمس دقايق وتوزع عليه باودر عشان يثبت وبرضو يسوي توازن .
احب هالاساس مره ودايم اذا بغيت تغطيه او توحيد احطه فيه كثير شروه وقالوا مايستحق هالمدح او سيئ او .. الخ اول شي الاساس يعتبر من الانواع الخفيفه المتوسطه لذلك توقعي يكون كذا فماراح يعطيك تغطيه كامله للندب او الاثار ثانيا نسبه المادة المثبته بالمنتجات تزيد من سعرها بما ان سعره يميل الى الرخص اعتبره ثابت وممتاز الاساس حسب ماقريت انه فايز بجائزه افضل منتج ٢٠١١ كونه معالج بالفواكه انا عن نفسي ماحسه معالج ولا قد سمعت وحدة من محيطي عالج بشرتها .
مكتوب على علبته ثبات لمده ١٦ ساعه مادري عن صحه هالشي لكن جربته لمده ٨ ساعات الى حد ما كان ثابت يمكن ساح بشكل بسيط لكن زي ماقلت مع لمسه بودره راح يرجع اللوك فرش وجميل .
* سعره 82 ريال سعودي .

اساس ريفلون كولر سيتي / Revlon Colorstay Foundation
اساس ريفلون مشهور قوامه سايل ثقيل تغطيته متوسطه الى ثقيل على حسب الكميه اللي توزعينها ثباته ممتاز هذا اللي ممكن ينقال يثبت ١٦ ساعه ممتاز لجونا الحار اللي يسيح الصخر تغطيته اعتبرها كامله بالنسبه لي هالاساس اعتبره هاي كوالتي .
نجي للمشكله الالوان لو لقيتي لون يناسب لون بشرتك فأنتي محظوظه اولا الدرجات اللي منزلتها شركة ريفلون محدودة اما شركاتنا الموزعة للأسف منزله النص و اكثر هم بالاصل ٢٠ درجه اللي تشوفينه بالمحلات ٨ اذا صار محل سنع ويجيب خيارات كثيره واحيانا ٣ او اربع درجات شي فعلا يجيب الاحباط ماقلت لكم تو اللي بتلقى درجتها محظوظه ؟!
بعد معاناه بالبحث عن درجتي المطلوبه وصلت اني وصيت ناس بالشرقيه يدورون :( قررت اشتري لون اقرب شي للوني وعلى هالاساس راح تكون تجربتي للفاونديشن ناقصه لأن اهم نقطه بالفاونديشن يكون نفس درجة بشرتك اقل او افتح بدرجه فقط  .
الفاونديشن رائع كتغطيه وثبات انصح فيه فقط اذا لقيتي اللي يناسبك وراح تستمتعين فيه وتثقين بطلتك اهم شي التوزيع يكون سريع لانه على طول ينشف على البشره يعني تقسمين بشرتك اقسام وتوزعين قسم قسم .
الفاونديشن ماينفع ابدا للناس اللي مايحبون اللمعه (القلتر) فيه لمعه اللي يقرب منك يشوفها بس العلبه جيده بس لو كانت ضغاط افضل الكنترول صعب باللي بدون ضغاط لازم اقلب العلبه بحذر عشان ماينزل كله .
بأذن الله مستقبلا راح اكتب تجاربي مع الفاونديشن من الماركات الكبيرة

* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )
* المنتجين متوفرين في  سنتر بوينت ٫ دبنهامز ، فافافوم، المصباح ،صيدلية وايتس ، بوتس، وبعض الصيدليات الاخرى .