منتجات ندمت على شرائها

التسوق من امتع الاشياء بحياتنا ولما تتوفقين باشياء ممتازه يصير اسعد واسعد ♥ :)
كثير منتجات ندمنا اننا شريناها وماستعملناها يا اما انك تشوفين مدح ويطلع مب قد الكلام او البايع يقنعك انه واو وهو خربوطي او بكل بساطه انتي تخطئين باختيارك وهالشي يصير للاغلبيه بالمحلات نتحمس نشتري مع الناس والجو العام بالسوق يحرضك تشترين اشياء يمكن تكون غير جيدة او سيئه تدوينتي هاذي راح اقولكم عن منتجات ندمت اني شريتها: 

بودرة البرونز  من بورجوا /Bronzing Powder From BOURJOIS 
بودرة البرونز من بورجوا تجي على شكل لوح شوكولاته بعلبه كرتونيه تتسكر مغناطيسيا العلبه كيوت مره وسمعت مدح كثير عليها وقررت اشتريها واستغربت كثير كيف الناس معجبتهم صبغتها سيئه جدا لازم تحطين كم طبقه عشان يطلع لك اللون ماعتبر هالشي جيد ابدا يضيع وقت وجهد الباودر برونز يجي بدرجتين واح وخمسين وثنين وخمسين .

بيس ال مات من ميك اب فور ايفر All mat from MUFE
المنتج الثاني ال مات من ميك اب فور ايفر يفترض انه بيس يمتص الدهون ويعطيك اللوك المطفي للاسف مايسوي شي حطيتيه او ماحطيتيه نفس الشي جربته على وحده بشرتها دهنيه ومافي اي فرق خصوصا منطقه الانف بالنسبه للبشرات الدهنيه يتركز فيها الدهون ماتغيرت بعد ساعه الأنف فيه لمعان ! حتي للبشرات العاديه لو بغيتي تحطينه عشان يعطيك لوك مخملي ماراح يسوي شي يذكر اللي محيرني ان الميك اب ارتست من ميك اب فور ايفر يعشقونه يمكن انا ماعرفت له ؟! 
جربته فوق وتحت الفونديشن نفس الشي للامانه ملمسه مخملي رائع وريحته نظافه :) . 

فرشه الحمره من بودي شوب / Blush Brush From TheBodyShop
هالفرشه وصتني عليها صديقتي وقالت انها جميله ولاني اعشق فرش الميك اب شريتها .. الفرشه حجمها وسعرها معقول لكنها ناعمه بزيادة عن اللزوم فيه فرش ناعمه لكن تمسك اللون بالشكل المطلوب هاذي العكس 
التوزيع فيها سيئ جدا خصوصا ان بلشراتي صبغتها قويه اغلبها فتطبع اللون طباعه واذا جيتي توزعين راح يبان نقطه البدايه والفكره من البلشر انه يكون ناتشروال قدر الامكان هاذي تفعل العكس فعلا اكرهها وندمت اني شريتها مانصح فيها راح اجرب الكابوكي يمكن تكون احسن منها لاني سمعت مدح عليها : ) 
 

اساس ميبلين دريم لوكد موس / Dream liquid Mousse From Maybelline 
الاساس شريته بناء على مدح البائع مدح غير طبيعي شريته وندمت فورا الاساس يسيح ومايثبت ابدا حطي شوي او كثير الثبات سيئ قوامه ثقيل شوي وصعب بالدمج  الى حد وما انسى انه يتكتل بشكل قبيح الشي الحلو فيه الضغاط بما اني احب العلب اللي تجي ضغط سهله بالتحكم والاستعمال لكن ماراح انصح فيه احد ابدا .

قلوس من سماش بكس Gloos From Smashbox
قلوس من سماش بوكس شريته الشتا اللي راح هاللون عبجني مره وكونه غامق وقلوس شي اغراني بقوه اشتريه جميل جميل كلون لكن تركيبته سيئه ثقيل بالنسبه لقلوس ويتلصق كأني حاطه شي فوق شفايفي احب القلوسات الخفيفه تعطي تغطيه ولوك جميل فرشته مب عمليه من النوعيه اللي تكون شعيرات وقاسية وطويله مفروض تكون اسفنجيه اسهل بالتوزيع ماتوقع اني راح اشتري قلوسات من سماش بوكس ابدا .

مناكير من كليرز/  Manicure From Claires 

مناكير كليرز شريت لي وشريت لاختي منها هالماركه معروف انها تقريبا موجهه للمراهقات لكن حتى المراهقات يستحقون مناكير افضل سيئ بدرجه غير معقوله مع اني اسكر العلبه بشكل جيد الا انه تنشف ويصير قوامه كثيف وكأنه صمغ هذا غير ان اول ماشريته كان يطول على بال ماينشف .. مع ان سعره ١٣ ريال لكن حسافه عليه ريالين 
الوانهم حلوه لكن مستحيل اشتريه ثاني مره ولا حتى لطفلة ام خمس سنوات : )

ظل كريمي من ديور Creme Eyeshadow From Dior 
شدو كريمي من ديور شريته من ايام الصيف قوامه موسي على كريمي سهل جدا بالتوزيع لونه حلو وصيفي المشكله انه يتكتل بشكل غريب حطيت برايمر او ماحطيت نفس الشي مع اني جربت كثير شدوات كريميه لكن هذا اعتبره الاسواء استغربت من النتيجه لأن شدوهات ديور بالعاده ممتازه .
 
فيه منتجات ندمت عليها كانت من كولكشنات ليمتد اديشن فكره ان هالمنتج فترته محدوده تغريني مره : ( والعواقب منتج اندم عليه ماحبيت اذكرها لانها ماراح تفيدكم بشي لانها ماعاد صارت موجودة بالمحلات .
 فيه منتجات شريتها وندمت عليها ورميتها ماتحملت وجودها بحياتي ولو كنت داريه اني بكتب هالموضوع كان احتفظت فيها منها شدو بورجوا الثلاثي اتذكر انه اسوء شدو مر علي صبغته خفيفه ولا تبين وحتى لو بينت يطلع اللون واضح انه متكلف وطبقات متراكمة و ندمت بعد على فرش مكياجي للوجه والبلشر بعد فتره بسيطه خشنت معي وغير الشعر اللي تساقط :( برضو شدو شانيل الرباعي الالوان كانت روعه نتشرال وبرونز لكنها تطيح وتهل على كل الوجه .
المنتجات ماعجبتني انا شخصيا بعد تجارب وفتره ليست بالقليله لكن ممكن تعجب غيري وتمشي معهم ولولا اختلاف الاذواق لبارت السلع لاتنسون تعلموني عن منتجات انتم ندمتوا عليها : )
* اتمنى تدوينتي حازت على رضاكم واستفدتوا تسعدني متابعتكم واشتراككم وتعليقاتكم :)
* للاشتراك في مدونتي اضغطي على الرابط الموجود في اليمين .