مجموعة زيوت الحياة الجديدة من ذا بودي شوب

مرحبا

من فترة وانا ابي اكتب هالبوست وانشغل بالسناب والانستقرام كالعادة 

حضرت قبل اسبوعين ايفنت ذا بودي شوب كان تعريف كامل عن مجموعة الزيوت الجديدة المجموعة نازله من فترة قريبه وكثير من بنات جدة والخليج جربوها وجا الوقت لبنات الرياض اخيرااا😭 المجموعه مختلفة عن اللي تعودنا من بودي شوب الزيوت داخله بقوة غير كذا التركيز كان ان المنتجات تعطيك استرخاء ودلع مب بس عنايه بس كان ناقص ينزلون شموع مع هالمجموعه وتكمل .☺️😁😍

الزيت اللي من اليمين يعيد الحيويه للبشره ويخفف من ظهور علامات التجاعيد تركيبته خفيفه مررررره يعني ماكنه زيت اتوقع البشرات الجافه راح تعشقه ويناسب جميع البشرات .

من اليسار منتج عجيب انا استخدمته لازالة الميكب وبعدها اغسل وجهي فضيييع يعطي نظارة ونعومة للبشره بعد اسبوع بتلاحظين الفرق ينفع لكل البشرات الشيء اللي ماحبيته ريحته 😔

كريمات مغذيه للبشره الجل جربته بالليل اصحى الصباح القى بشرتي رطبه كانها متشربه مويه حبيت التركيبه مره واحسن شي
ان تركيبته على طول تمتصها البشره الكريم مابعد جربته بس اتوقع اثقل من الجل .

لو اقولكم وش قد متحمسه للسكراب ماتصدقون مررررره سمعت عليه مدح بالمدونات الاجنبيه وفيه وحده حاطته من التوب بالمقشرات الجديده اللي طلعت هالفترة راح اجربه ان شاء الله واكتب عنه بالانستقرام بأقرب وقت .

من اليمين كريم للجسم للي يعشقون زبدة بودي شوب المشهورة راح يعجبهم هالمرطب ريحته خياااال فضيعه ناعمه وهاديه .

اخر شي اداة المساج او التدليك فيها زي الاحجار وباردة مره تدلكين فيها الوجه والرقبه تحفز الكولاجين في بشرتك وتستخدم مع الزيوت لنتيجة افضل .

فيه منتجات نزلت مع هالمجموعة ناويه اجربها ان شاء الله مثل قناع الطين للجسم اللي جربت شي من هالمنتجات تعلمنا عن تجربتها
في التويتر او الانستقرام او هنا اسمي بكل مكان norahbeautybox .

اتمنى استمتعتوا بهالرفيو البسيط مع المنتجات الجديدة والقاكم على خير في بوست جديد الاسبوع القادم 🙏🏾🌷🌈

تجربتي لماسك الشباب من ذا بودي شوب

مرحبا بنات

بكتب بوست اليوم عن تجربتي للماسك الليلي من ذا بودي شوب بعد تجربه اسبوعين تقريبا جربته اسبوع بشكل متواصل ووقفته لاني سافرت وبعدها رجعت له لكن مب بشكل يومي .
الماسك قوامه جل ثابت ولما توزعينه على البشره يكون بشكل كريمي شفاف ريحته لطيفه تقريبا ريحته اشجار ونباتات وهاذي مكوناته اساسا .

الماسك مخصص لمقاومه التجاعيد والعنايه بالبشره بسن مبكر عشان نتفادى ظهور التجاعيد بسن اقل من المعتاد النتايج ظهورها بعيد المدى بس كنتيجه فوريه لاحظت ان البشره الصباح رطبه ومنتعشه وافضل بكثير من اني ماحطه خصوصا مع الميكب اذا وزعت الفاونديشن الاحظ الفرق ❤️❤️

توزيعه يبي له وقت اهم شي تسوين مساج لوجهك وماتسخدمينه كمرطب عاد ولا راح يتدبق معك ويلصق كله على المخده p;
 متوفر في محلات ذا بودي شوب مع مجموعه كامله من هالفئة بس انا ماجربت الا هالماسك سعره تقريبا ١٢٠ ريال سعودي.

روتين عنايتي مع رفيو بسيط عن جهاز كليرسونك .

مرحبا بنات 
من زمان بكتب هالبوست بس انشغلت وزياده على كذا احس منتجات البشره نتايجها تختلف من ناس لناس عشان كذا تترددين تنصحين احد بشي عاجبك ...
انا زي كل البنات احلم ببشره صافيه وقزازه بس للاسف دايم داخله بمعاناة بالثانوي كانت بشرتي زينه بعدين لما دخلت الجامعه الله لايوريكم :( 
وقررت اخذ روكتان وخلصت كورس وبعد فتره رجعت الحبوب ضاق صدري واكتئبت ورجعت اكلته مره ثانيه بعد الجامعه واللحين بعد ٣ سنين من تركته مارجعت الحبوب الا يادوب كم حبه كل كم شهرين 
البشره يدخل فيها عوامل كثيره الاكل والنفسيه والجو .. الخ بس تقدرين تسيطرين على شي معين بحيث تكونين راضيه الى حد ما عن نفسك .
بحكي لكم عن المنتجات اللي جربتها ولعل وحده منكم تستفيد منها ( انا بشرتي دهنيه الى مختلطه )

اول شي الكليروسانك من ٤ سنين وانا اسمع عنها وانها آله عظيمه لين قررت اغامر واشتريها ولي ٣ شهور تقريبا استعملها جميله بالتنظيف خصوصا لو كنتي حاطه ميك اب ذاك اليوم وغسلتي وجهك تحسين تطلع كل الاثار احيانا استخدمها يومي او يوم ورا يوم .
طريقتها باختصار :
تتحطين الغسول اللي تستخدمينه على الفرشه وبعدها تشغلينها وراح تحسب لك ٢٠ ثانيه للجبهه ٢٠ ثانيه للذقن والانف وعشر ثواني لكل خد ..
شحنها تقريبا نص يوم وراح تظل معك مشحونه لمده اكثر من ٣ اسابيع 
فيه ناس استخدموها وويقولون انها طلعت لهم حبوب بالبدايه لان تنضيفها عميق فتطلع الحبوب الداخليه انا ماصار لي هالشي 
الفرشه تبدلينها كل ٣ اشهر الى خمس انا ماغيرتها لحد اللحين ..
 

الغسول استخدم ثنين 
افين جميل جدا وينظف مررره يناسب البشره الدهنيه والختلطه ماحسه يجفف البشره 
وكلين اند كلير خفيف على البشره وريحته حلوه مع انهم كاتبين عميق المفعول بس ماحسه كذا ابد . 

التونر (وظيفته يغلق المسام ويوازن الدهون وبعد الغسول تحطينه )
استخدمت  لوريال وكلينك بس مالقيت زي مويه الورد احسها ماتضر البشره وتساعد على توازن الدهون ويكفي انها طبيعيه 
اشتريها من الحمود وتلقونها باي محل عطاره ( العلبه انكسرت وحطيته بعلبه سبراي فكتوريا سيكرت )

المرطبات 
من اليمين بودي شوب فيتامين اي دايم امدحه للناس وماقد شفت احد اشتكى منه يناسب كل البشرات خفيف مررره على البشره وبنفس الوقت يرطبها استخدمه دايم قبل الميك اب عشان مايدهن وجهي اسوء شي فيه انه اذا خليتيه فتره ماستعملتيه يتغير قوامه يصير خفيف بزياده .
الوسط مرطب من ماركه لروشي بوزي من صيدليات وايتس جمممميل هالمرطب للبشره الدهنيه او المختلطه استخدمه غالبا بالليل لان احس ترطيبه عالي مره .
اليسار من كلينك مع اني ماعمري شريت شي من كلينك وعجبني الا ان هالمرطب ماستغني عنه كانه جل وخالي من الزيوت وتمتصه البشره على طول . 

الماسكات 
انا انسانه اعشق الماسكات خصوصا وقت الشاور حلو تستخدمينها كل اسبوع الى مرتين بالاسبوع تزيل الخلايا الميته وتنظيفها عميق .
الماسكات اللي جربتها :
ماسك بودي شوب بلو كورن لطيف وتنظيف معقول .
ماسك كيس ماي فيس هالماركه متوفره في بعض فروع التميمي مرره جميل هالماسك تحسينه ينظف ويشد البشره .
ماسك كلارنس يساعد على تضييق المسام ولما تحطينه ينعم بشرتك ويعطها نضاره ماركه كلارنس بالعنايه ممتازه مره بس محد عاطيها فرصه منتجاتهم طبيعيه ولطيفه على البشره اشوف بنات كثير يشتكون من كلينك احس كلينك كميائيه مره وقويه على البشره 
انصح البنات يجربون كلارنس بس اختاري اللي يناسبك .
ماسك من نوكس صراحه ماسك فاشل بس مازلت استخدمه عشان احلل فلوسه ماستفدت منه شي غير انها بعد ماحطه يدهن وجهي مره يمكن يناسب غيري مادري !! ..

هالمنتج مدري هو ماسك او غسول بس كاتبين ماسك من ماركه بيلس متوفره في دابنهامز قوامه زي الجل تغسلين وجهك بالمويه وتحطينه وتدلكين وجهك فيه وتطلع لك رغوه منتج مميز ماقد جربت زيه ريحته فواكه حمضيه تنظيف عميق وتحسين بشرتك بعدها فرش ونظيفه .

الواقي 
الواقي استخدمت كثير حاليا استخدم نيتروجينا وتوبكس نصحتني فيها وحده من متابعاتي الله يسعدها كلهم ممتازين توبكس لاحظت مايدهن بالوجه ابد . 
وهذا كل شي في روتين العنايه طولت عليكم بالمنتجات بس حبيت يكون البوست شامل بحيث كثير يستفيدون منه .
اللي عندها شي تنصح فيه تكتب لنا هنا نتشارك المنتجات واهم شي تكتب وش نوع بشرتها .
نصيحه :
ازاله المكياج قبل النوم مهمه جدا انصحك ماتخلين شي على وجهك وبتلاحظين كيف تتحسن بشرتك بعكس اذا خليتي الميك اب ونمتي حبوب ونفره بالوجه ... هنا كتبت عن مزيلات المكياج .
 

• تلقوني هنا على التويتر   
•  انستقرام : norahbeautybox
• اللي عندها سؤال هنا الآسك 
•  اشوفكم على خير.

ريفيو شامل عن البي بي كريم

مرحبا بنات شلونكم ؟ ان شاء الله بخير : ) .❤.❤
هالريفيو انطلب مني كثير من زمان ان شاء الله يعجبكم ويفيدكم ولو اني تأخرت فيه 
اول شي بتكلم عن البي بي كريم باختصار  :
هو منتج قديم كانوا الاسيوين يستخدمونه ولما عرفوا شركات التجميل الغربيه عنه كل شركه انتجت بيبي خاص فيها
طبعا بشرات الاسيويات لها خاصيه معينه نظرا لبيئتهم واكلهم تلاقون ام 80 سنه زي بشره ام 50 عندنا فشي طبيعي ان هالمنتج يناسبهم جدا ويضيف لبشرتهم رونق خاص فيهم اكثر مننا ❤.

تعريف البي بي كريم :
البي بي كريم مكوناته غير ضاره وكيميائيه ويرطب ويعطي البشره نضاره ويعالجها ( هالكلام مب بالضروره صحيح )
الماركات المشهوره اغلبها نزلت لها بي بي كريم اللي فاشل واللي ممتاز واللي خفيف واللي كانه كريم اساس وهكذا ... انا عن نفسي ماكنت متحمسه اجربه من ايام الاقلاع وانا اشوف التجارات يبيعون الكوري حسيته موضه وبتروح .. لكن بعد مده بديت اجرب من كم ماركه وفيه اللي عجبني وفيه اللي لا .. راح استعرض معكم بهالتدوينه تجاربي لست انواع بي بي كريم اتمنى يعجبكم وتستفيدون واسفه اني تأخرت بالريفيو بس قلت اجرب هالكريمات فتره عشان احكم صح ❤ ❤ ❤: )  

بي بي كريم سماش بوكس : 
جميل جدا واعتبره كريم اساس خفيف تغطيته متوسطه قوامه ثقيل شوي فيه حماية من الشمس انصح فيه اللي تبي تغطيه اثقل من البي بي كريم الخفيف

بي بي كريم بودي شوب :
يجي منه 3 درجات 1 و2 و3 انا اخترت 2 قوامه ابيض ومع الدمج يتحول للون بشرتك تغطيته خفيفه لازم يتثبت بودره اشوف انه يدهن بعد كم ساعه .

بي بي كريم بوبي براون :
ممتاز وهو افضل واحد جربته يناسب البشرات الصفراء اكثر من الورديه تغطيته متوسطه ثباته ممتاز ويدمج بسهوله على البشره فيه نسبه 35 حماية من الشمس .

بي بي كريم قارنيه :
كثير يسبون هذا البي بي انا ماشفت انه سيئ خصوصا اني ادمجه مع اساس احيانا ويعطيني تغطيه حلوه قوامه كريمي يندمج بسهوله
مافيه حماية من الشمس .

بي بي كريم مايبلين :
تغطيه خفيفه جدا عجبني قوامه وتركيبته كثير احطه اذا بغيت طله خفيفه مع شوي كونسيلر ويطلع جميل جدا انصح فيه المراهقات اللي يحبون التغطيه الخفيفه بالمدرسه مناسب لهم و نسبه الحمايه من الشمس  30 .

بي بي كريم لوريال :
اول ماحطيته لاحظت كم وحده قالوا بشرتك منوره للاسف الشديد ماقد شفته باسواقنا انا شريته من السوق الحره من دبي تغطيته خفيفه قوامه ابيض ويندمج بسهوله فيه حماية بسيطه من الشمس 12 بالميه بس الشي اللي ماعجبني فيه انه يترك ملمس ترابي خفيف .

اللي محتاجين تعرفونه بحطه بهالنقاط ❤ :
1- البي بي كريم يناسب البشرات الصافيه اكثر من البشرات المتضرره
2- البي بي كريم عاده فيه دهون لان هو اللي يخلي قوامه كريمي ويعطي اضاءه للوجه لذلك تحتاجين تثبيت بودره خصوصا اذا كانت بشرتك دهنيه
3- البي بي كريم غالبا تغطيته خفيفه الي متوسطه فأذا انتي تدورين شي ثقيل ما انصحك فيه  
4- اغلب البي بي كريم يجي بثلاث درجات لايت ميديم ودارك .

وهذا كل شي عن البي بي كريم اتمنى استفتدوا من هالتدوينه واللي جربت اي نوع او انواع ثانيه تقرد تترك تعليق هنا او منشن بالتويتر❤ ❤.❤
 

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
• 
    انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RSR2013 وهنا موقع سيقما  
•  اشوفكم على خير 

تجاربي لشهر مارس MARCH FAVORITES

مرحبا بنات 
ان شاء الله انكم بخير انبسطتوا بالاجازه للاسف بدت الدومات وماعاد فيه عندي وقت :( 
بهالتدوينه بستعرض افضل ماجربته في الميك اب في الشهر اللي فات وعجبتني وفيه منتجين فاشلين باخر التدوينه بكتب عنهم : 

الفاونديشن والكونسيلر :
من فتره طويله وانا ادور البي بي كريم حق بودي شوب وكنت ابي الدرجه الثانيه ودايم مخلصه والحمدلله اخيرا توفر تجربتي كانت ناجحه حبيته مره يغطي بشكل خفيف يندمج بسهوله بس اهم نقطه لازم يتثبت بودره ولا بيعطيك شكل دهني ماراح تحبينه .
بالنسبه للكونسيلر قد كتبت عن هالكونسيلر هنا (دليلك بأختيار الكونسيلر من ماك ) هو تغطيته خفيفه وهذا اللي يناسبني غالبا خصوصا بفترات الصباح ماحب الشي الثقيل .

الشدو : 
كل هالشهر تقريبا اذا حطيت شدو ماحط الا هذا اسمه برونز من ماك ( كنت شاريته وانا مسافره وتكسر :( ) جميل جدا تقدرين تخففينه او تثقلينه وحطيت سواتش بالانستقرام هنا للي حاب يشوف اللون .

البلشر :
اليمين  MELBA من MAC  لونه وردي فاتح جدا وطبيعي دايم مخلص من ماك وعرفت ليش صراحه اكثر بلشر طبيعي عندي ويناسب اي بشره يمكن هذا اللي خلاه يشتره واهم شي انه مطفي يناسب اللي مايحبون اللمعه  حطيت سواتش بالانستقرام : ) 
اليسار بلشر بلمعه اسمه ALPINE BRONZE لونه برونزي مع لمعه ذهبيه جميل مررره كنت انتظره من زمان لاني شفت وحده باليوتيوب تمدحه ورحت سألت حقت ماك قالت مخلص :( بعدين نزلت مره ثانيه طلع الكولكشن توه ينزل اتاري البائعه ماتدري قالت مخلص وبس < تبي تفتك مني ... المهم هو من اخر كولكشن يمكن تلاقونه اللحين للي تبيه روعه وخطير بالصيف .. انا احطه بلشر وصديقتي توزعه على كامل الوجه وتقول مره حلو بالطريقه : ) (قصة حياتي هالبلشر :/ )

الأرواج : 
اليمين اقلام ريفلون الجديدة رقمه 001 برضو فيه صوره بالانستقرام صجيتكم فيه بس لاني توي اطيح فيه > بدري :( 
الاقلام جميله تغطيتها بسيطه وخفيفه تنفع للصبح وللطلعات البسيطه ثابته بس لمعه القلوس تروح بسرعه 
الوسط قد حكيت عنه بتويتر وهو عباره عن محدد شمعي شفاف من ماركه تو فيسد في سيفورا تحددين فيه شفايفك وبعدين ترسمين الروج ويساعد ان الروج مايطلع على الحوايف ويتلطخ المنتج ممتاز وفكرته جديده عجبني مره وجربته كم مره وفعلا مايطلع الروج مع الاكل والسواليف يناسب مره الالوان اللي تحوس وتخافين يخرب شكلك مثل الاورنج والاحمر.

اليسار قلوس / كريم الشفايف من NYX اسمه  Buttery Nude رقمه ٠٤ مع ان كثير بنات يمدحونه من زمان بس توي اطيح عليه عجبني مررره ثابت ولونه يجنن بس العيب الوحيد هو الفرشه سيئه مره كانه خشب!! سواتش انستقرام .. 

 المسكارا :
اليمين المسكارا الصغيره من كلينك تركتها فتره ورجعت لها يعني حتى اللي مالها رموش تحت تطلع لها 
اليسار مسكارا من ماركه برستيج من سنتر بوينت جميله المسكرا مره وفرشتها عريضه انا احب هالنوعيه تكثفه مرررره بس التطويل عادي اللي مثلي تهمها الكثافه راح تعجبها مره وسرها ممتاز 30 ريال .

 الفرش :
هالفرشه اخذتها من الدانوب وكتبت عن فرشتين هنا بسعر رخيص جميله مره مع الشدو اللي فوق تنفع للي مستعجله وتبي شي سريع مناسبه لكامل الجفن او لو حبيتي للأضاءه .

المناكير : 
 قبل سنه تذكرون هبه البنات بمناكير تيفاني لدرجه اي بياع تدخلين عنده يقول عندنا مناكير تيفاني عاد حامت كبدي وكرهت اللون وكرهت الاسم وكرهت تيافني بكبره لول .. عاد قبل تره طحت على مناكير بيري ام كتبت تدوينه هنا وعجبني هاللون مره فرايحي وجميل . 

المنتجات سيئه لا انصح بشرائها :

هالمنتجين فاشلين بدرجه غير معقوله يعني اصلا هالاشياء مفروض ماتنباع يمكن الروج اهون شوي .. اليمين روج من لوريال اللي يجي غطاه شفاف بساعه او اقل يروح اللون مع ان اللون عاجبني مره لكن للاسف مب ثابت ابدا 
اليسار سويت سواتش بالانستقرام عنه وهو من البلشرات الجديدة من مايبلين اغبى بلشر شريته في حياتي مايطلع اللون ابدا ياحسافه الفلوس بس مانصح ولا وحده تشتريه ابدا ابدا .

طولت بهالتدوينه مررره اتمنى تسامحوني واهم شي تستفيدون وهذي غايتي ولاتنسون التعليق والمشاركه .

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
•   انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  AAM2013 وهنا موقع سيقما  
•  اشوفكم على خير 

كيف تضعين مكياج اللا مكياج No Make-Up Make-up

السلام عليكم .. حياكم الله في مدونتي من جديد .

برد واجازه والعالم هاجده .. اتمنى الجميع بخير ومبسوطين

بهالتدوينه بكتب لكم عن مكياج اللامكياج وهو انك تحطين مكياج بس مايبين انك حاطه شي ابدا مثل هالصوره 

ممكن تعتمدين هالمكياج لعده اماكن مثلا زيارات خفيفه وماتبين شكلك يصير زحمه او طلعات صباحيه مثل زياره مدرسه اولادك او مثلا بمكان مفترض ماتكونين حاطه مكياج مثل عزاء او زياره مريض وبشرتك تعبانه فتبين شوي اخفاء للعيوب... وفيه ناس تشوفينهم بزواجات كأنهم ماحطوا مكياج برضو هذا خيار خصوصا لو كنتي لابسه فستان فخم او عقد وتبين التركيز يكون عليهم بيعطيك تناسق جميل وشكل عصري 

هاذي ادواتي اللي استعملها لو بغيت مكياج اللامكياج اول شيء ترطيب البشره وبعدها بخمس دقايق تحطين كريم الاساس واذا كانت بشرتك صافيه ممكن ماتحطين .. الاساس اختاري النوع اللي يكون اقرب للطبيعي وتغطيته تكون خفيفه الى متوسطه انا اخترت هنا بورجوا هيلثي مكس.. بعدها ممكن توزعين خافي العيوب اذا كان عندك بثور او ندب

العيون ممكن تلفين رموشك بالعاقصه وتكتفيين بهالشي وممكن تحطين مسكارا بس ماتكون اللي تكثف وتطول بشكل خيالي لان زي ماقلنا الفكره مايبان انك حاطه شي ابدا

الحواجب ممكن تملين شوي  الحواجب بشكل خفيف بس ماترسمين وبعدها تمشطين حواجبك 

بالنسبه للشفاه والخدود لازم تكونين عارفه الاندر تون تبع بشرتك وقد كتبت موضوع ممكن تشوفين هنا وتستفيدين اهم شي بالروج مايكون قلوسي وفيه لمعه ويكون طبيعي قدر الامكان سواء وردي او نيود .. تقدرين تحطين من الروج على خدودك زي ماكانواامهاتنا يسوون عشان يصير كل شي متجانس وهذا كل شي عن مكياج اللي مش مكياج 

اهم النقاط اللي لازم تتبعينها

١- البشره تكون اقرب للطبيعي لان اعتماد الميك اب على البشره

٢- ماتحطين شي يلمع او شميري او قلوسي

٣-مايبين اي حدود للمكياج سواء الحواجب او الخدود .. الخ يعني تدمجين بشكل ممتاز

وبس هذا كل شي .. ان شاء الله اسستفدتو من هالتدوينه 

وعندي طلب لكم يابنات ياجميلات 

اذا استفدتوا من تدويناتي لو بشكل بسيط انشروا المدونه واعملوا رتويت لتغريداتي

الأدوات اللي موجوده بالصوره من اليمين الي اليسار 

• مرطب سيتافيل
• اساس هيلثي مكس من بورجوا
• بودره الحواجب من بودي شوب رقم ٢
• فرشه حواجب رقم ١٢ من سماش بوكس
• مسكارا بورجوا تبع الخطوتين +عاقصه الرموش من سيفورا
• بلشر كريمي بوسي من ماك
• روج نيود من ماك وروج اسيا رقم 077 من ريميل 
• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر  

اشوفكم بخير ..

Best Beauty Products of 2012 افضل منتجات ٢٠١٢ الجماليه

مرحبا فيكم ... ان شاء الله كلكم بخير ...احس من زمان مادونت قلت يابنت اتركي الكسل واكتبي طبعا تأخر الوقت على مفضلات ديسمبر وتأخر الوقت على مفضلات ٢٠١٢ فقررت اكتب عن ٢٠١٢ مره وحده وان شاء الله تستفيدون من هالتدوينه .. 

الوجه /
اول شي نبدا بافضل فاونديشن .. فاونديشن شانيل فيتالومير غني عن التعريف خفيف وتغطيته متوسطه سهل بالدمج وهذا اجمل شي فيه 
الكونسيلر من بوبي براون ... بوبي براون ممتازه بمنتجات الوجه سواء اساس او كونسيلر او بودره واذا لقيتي درجتك المناسبه اضمن لك راح تكونين راضيه عن مكياجك .

البلشر من تارت اعتبره من اجمل البلشرات اللي جربتها يكفي انها طبيعي لونه طبيعي وثباته رائع .
 

اضاءه ديور امبر دايمند قد كتبت عنها هنا اضاءه جميله وناعمه وكل شي حلو بالدنيا شريتها من موقع ساكس فيث افنيو .. اتمنى ينزلونها هنا تستحق الشراء .

الأدوات / 

البيوتي بلندر جميله جدا جدا مع الاساس سهله بالاستخدام وناعمه على الوجه يمكن اللي يقهرني فيها احس انها تمتص الاساس مع اني قد شفت فيديو وحده قاطعتها من النص وتقول شوفوا مافيه اساس جوا وهذا دليل انها ماتمتص > ياحسافتها يوم قصتها :( 
المهم انصح فيها مره توزع الاساس بشكل طبيعي 
الفرشه الثانيه فرشه انقلوت للعيون وش اقول عن هالفرشه ؟ اعتبرها من فرشي المفضله المحبوبه تدمج بشكل خفيييييف ومركز لو بغيتي تدمجين لون غامق على كسره الجفن هاذي ممتازه لهالشي زي هالصوره 

العيون /

الشدو صعب الاختيار لأن مكياج العيون نحب نجدد فيه كل يوم فما بالكم سنة كامله !!... طبعا نيكد ٢ ابهرتني زي الاولى مع اني اول متردده اخذها ولا لا بس الحمدلله استفدت منها 
ولو بختار لون واحد راح اختار All That Glitter هالشدو بدون مبالغه ماقد حطيته بأي مكان الا احد يمدحني عليها طريقتي استخدمه على كامل الجفن مع كحل كات ايز عريض واجمل لوك اضمن لك بيطلع لوك انيق وناعم .. هذاي الصوره من النت توضح اللون 
الشدو الكريمي يفك ازمه ولما تحطينه ويكون يعطي لونين تحسين مكياجك جميل ومرتب كثير اجرب نوعيات وهالسنه طحت على شدو كريمي من بنفت اللون موف على بني ثابت ومايتكتل وسهل بالدمج دايم اذا مالي خلق احط شي احطه مع مسكارا وفعلا يرضيني الالوان اللي منزلينها قليله بس كلها روعه . 

الحواجب ماجربت شي جديد هالسنة وبقيت على بودرة الحواجب من بودي شوب .. وصايره احط مرطب بشكل خفيف جدا يعطي لوك طبيعي 

الكحل كحل ماك الكريمي من اشهر انواع الكحل وقليل جدا القى احد مايحبه سواد بس يبي لك فرشه واستمتعي باجمل كحله 
المسكارا شوكينق من سان لوران جميله هالمسكارا مررره يمكن بالآول ماعجبتني لأنها جمعت الرموش بس مع كل استخدام احبها اكثر وفعلا قد قريت مقال تجميلي يقولك فيه نوع مسكارات تتحسن مع الوقت .. يعني لاتيأسين من المسكارا على طول جربيها كذا مره .

الشفاه /

الارواج .. السنه هاذي الروج اللي حسيت اني حبيته ويستحف افضل روج هو روج سان لوران رقم ١٣ مع اني ماستخدمته طول السنه تقريبا الصيف بس .. لكن ثباته ولونه يستحق يكون افضل روج .. وكثير سمعت مدح على كل كولكشن روج كتور 
القلوس من نكس جميل وطبيعي وريحته توت انصح فيه حتى اللي ماتحب القلوسات اسمه (ناتشورال ) .
 المناكير /

المناكير ريفلون سموكي كانفس جميل هاللون ويحلي اليد بشكل .. ولونه غريب بس مب بشكل ملفت .. انا من النوع اللي احب احط مناكير كثير وبنفس الوقت احب الشي اللي يكون شيك ويليق مع كل شي وبكل وقت وهذا منقذني الحمدلله .
عطر / 

العطر من بنيفت اسمه ايفا عطر جميل وساحر ومافي  احد ماراح يحبه .. فعلا هذا العطر اللي راح يتفق الجميع انه جميل من كثر ماهو حلو صرت اشتريه هديه لصديقاتي وقريباتي واضمن انه يعجبهم ... بينفت منزلين ٦ عطورات كلهم حلوين جربوهم : )

العنايه /

من اليمين مرطب يدين من لوكسيتان معومه فائقه باختصار 
اللي جمبه مرطب من ستيفس بالخوخ استخدمه بالاسبوع مره جميله ولطيف 
اللي جمبه سيتافيل عرفته من مدونه كات واك قلام الله يسعدها روعه واتوقع اني راح اعتمده بحياتي 
الشامبو طبي اسمه كاستاليا صراحه قللللل التساقط عندي بشكل واضح الحمدلله جربت قبله فيتشي لكن هذا افضل 
اللي فوق ماسك من لوريال وماسكات لوريال كلها ممتازه واهم شي ماتخلي الشعر دهني .

هالمنتج اكثر منتج تكلموا عنه الناس هالسنه والسنه اللي قبلها ... مزيل مكياج ناعم على البشره وينظف اذا كان موجود بمدينتك انصحك وبقوه تشترينه : )

واخيرا شموع باث اند بودي غرامي وعشقي مع انهم يقولون مضره بس احبها .. واجمل وحده جربتها وراح اشتريها مره ثانيه ان شاء الله هي تشيري بلوسم اشغلها تحت واشمها فوق ريحتها تنتشر بكل البيت .. وبما ان باث تخفيضات انصحكم تستولون عليها بس خلوا لي وحده .
اتمنى لكم سنة جميله يارب تتحقق فيها امنياتكم وتزيد نجاحتكم .
*للاشتراك في مدونتي اضغطي على الرابط الموجود في اليمين بالضغط على .

*  هنا التويتر ( تويتر نوره بيوتي بوكس )