مزيل المكياج Makeup Removers

 

مزيل المكياج يعتبر من الاشياء الضروريه اللي لازم تكون عندك خصوصا لو كنتي تستخدمين المكياج الكامل او مكياج العيون بالذات .. فيه بنات يقولون يكفي نغسل بالغسول والمويه وخلاص .. للاسف مايكفي لان المكياج يحتاج ازاله بشكل لطيف وهالشي مايكون الا بالمزيل ..المزيلات كثيره جدا وكل ماركات الميك اب والعنايه منزله مزيل بعرض لكم تجاربي بالترتيب من اليمين الى اليسار 

١- لوريال من افضل المزيلات اللي جربتها هاذي يمكن العلبه الخامسه اللي اخلصها ينظف ومايلطخ ومتوفر واهم شي رخيص وجودة رائعه.

٢-مزيل على شكل رغوه من سيفورا جميل وينظف بشكل ممتاز بس عيبه الصعوبه بالنسبه للانواع الثانيه 

٣-مزيل حليبي من بربري جميل وينظف ويشيل كل الميك اب بشكل سهل حبيت التركيبه مره .

٤-بايدورما اشتهر بقوه بعالم اليوتيوب جربته مرتين حلو مرررره ويزيل بشكل لطيف ومره استخدمته كغسول والنتيجه جميله لطيف وماحسيت بجفاف زي العاده .

٥- مزيل من جونسون عادي جدا وماحسه ينظف يبي لك تمسحين كم مره

٦- نيفيا برضو عادي بس احسن من جونسن ينفع لو حاطه مكياج ناعم وخفيف اما لو سموكي ايز بتلطخين الدنيا بهالمزيل p; 

٧- مزيل من بوتس Nْ7 روعه وينظف ويزيل المكياج بس عيبه ماينمزج بسرعه اذا رجيته والفتحه كبيره يبي لك تنتبهين اذا فتحتيه وفيه عيب بسيط انه يترك بقايا زي الزيت مع اني بغسل بعدها بغسول بس احس هالشي مزعج بالنسبه لي :/.

بالنسبه لي احب المزيلات السائله هي اللي تنظف وتشيل الميك اب من جذوره 

* معلومه بسيطه : اذا شريتي مزيل فيه سائلين ازرق وشفاف رجيه لين يتمازج اللونين ويصير لون واحد بعدين استعمليه وكرري العمليه اذا احتجتي .

 

المناديل مليان برضو بالصيدليات وبالنسبه لتجاربي ماقد جربت مناديل تشيل الميك اب بذمه وضمير خصوصا لو الميك اب ثقيل هي ممتازه لو مكياجك خفيف + انتي طفشانه ومالك خلق تعتبر اسرع من المزيل السايل 

هالمناديل من لوريال رقيقه وتنظف بشكل بسيط واهم شي ناعمه على الوجه

جربت جونسون فاشله جداا واحرقت وجهي وحمر منها قارنيه عاديه مره نيروجينا روعه رووووعه شريتها من التميمي ولا عاد لقيتها :(

لو ماكان عندك مزيل او ماتبغين تشترين فيه مزيل طبيعي عندك بالبيت وهو زيت الزيتون الطريقه انك تجيبين قطن او الشرائح القطنيه وتصبين عليها مويه دافيه وبعدها تحطين شوي زيت زيتون وراح تشيل لك الميك اب بكل سهوله وبساطه  : )  

واخيرا بعد ماتخلصين ازاله الميك اب وتغسلين بشرتك لاتنسين ترشين مويه الورد راح تعطيك انتعاش ونظاره وتسكر المسامات تلقين مويه الورد في العطاره والمحامص : ) 

لاتنسون تعلموني لو عندكم مزيلات ممتازه !!

*اتمنى انكم استفدتو واذا استفدتي من المدونه خبري صديقاتك وقريباتك وخليهم يستفيدون ♥♡♥
* للاشتراك في مدونتي اضغطي على الرابط الموجود في اليمين بالضغط على .

* وللأستفسارات السريعه والمتابعه انا موجودة على التويتر ( تويتر نوره بيوتي بوكس )