مرحبا بنات مره متحمسه لهالتدوينه فيها كل شي احبه : )
معروف الصيدليات فيها اشياء روعه وخصوصا الميك اب والعنايه وجودتها ممتازه وكثير منها تكون بديله للماركات الغاليه
صراحه انا اذا رحت الصيدليه اقعد ساعه احوس فيها ولا امل لين يطلعوني اهلي :(
عاد كثير اشوف يوتيوب بنات حاطين ٥ منتجات من الصيدليه ماستغنون عنها وقلت راح اسوي هالتدوينه واخترت خمس اشياء فعلا احبها ودايم استعملها وسهله جدا ومتوفره والمفاجاة الجميله ان كل الخمس منتجات راح اسوي قيف اواي لها تستاهلون كل خير حبيباتي الشروط راح اتركها باخر التدوينه : )
اول منتج كحل مايبلين الكريمي كنت دايم استخدم ماك واذا بديت انتصف فيه يبدا يجف معي وجربت كحل مايبلين وتركت ماك الى الابد مررره جميل وكريمي ولا ينشف يعني اذا جف جف على نهايته وهذا شي طبيعي لاني افتح العلبه مليون مره فيه منه بني وموف وازرق .
المنتج الثاني هي فرشه ريل تكنيك للوجه للمحترفين صراحه كنت اسمع عن هالفرشه كثيييييير وجربتها وعرفت السر روعه بالدمج وتنفع لكل فاونديشن الكريمي والسايل والبي بي كريم .
المنتج الثالث بلشرات نكس جودتها ممتازه وثباتها جميل فيها منها كريمي وفيه منها بودره هالبلشر اسمه قلو لونه وردي طبيعي يعطي الوجه تورد صحي وطبيعي وغير متكلف قد كتبت عنه قبل اضغطي هنا وانه بديل لماك بوسي .
المنتج الرابع مسكارا ماكس فاكتر 2000 هالمسكارا قديمه بس مازالت مطلوبه جميله تكثف وتطول كثير مسكارات اتركها بس هاذي دايم ارجع اشتريها .
المنتج الخامس والاخير روج ريد فلفت من ريفلون قد كتبت لكم قبل اني ماتوقعت الريفلون لب بتر بهالشكل وماعجبتني ابدا مافيها ثبات وسعرها مبالغ فيه بس طحت في غرام هاللون اجمل لون جربته من اللب بتر لونه عنابي احمر وثابت بالنسبه للارواج الثانيه حتى لو اختفى يبقى اثر جميل على الشفايف .
هاذي منتجات لو خلصت راح اشتريها لانها فعلا مناسبه لكل يوم والاوقات اللي تكونين تبين شي سمبل كل هالمنتجات روعه وتعطيك نتيجه ناعمه واسعارها ممتازه ومتوفره في اغلب الاماكن .
ماركه نكس متوفره في سنتر بوينت
ماركه مايبلين وريل تكنيك وماكس فاكتور وريفلون في وايتس ( فرشه ريل تكنيك هالنوع ماشفتها في الصيدليات بس الانواع الثانيه متوفره .
كل وحده تقول وش منتجاتها المفضله من الصيدليه وماتستغني عنها ؟ حابه اعرف وش الاشياء اللي تحبونها اكتبوها لي هنا او على التويتر او الانستقرام .
القيف اواي راح يكون لما السبت الجاي ان شاء الله وراح يكون لجميع مناطق المملكه
الشروط ( مافي شروط صعبه ) :
تسوين فولو بالتويتر او على الانستقرام .
اهم نقطه هي انك تكتبين ايميلك.
وين تكتبين ايميلك ؟
عندك كذا خيار اختاري اللي يناسبك .. اما تكتبينه هنا بالتعليقات او تكتبينه منشن بالتويتر او تعليق في صوره الانستقرام هاذي
راح اختار الفائزه من المتابعات بالتويتر او بالانستقرام بس لوماكنتي حاطه ايميلك ماراح اختارك .
الانستقرام norahbeautybox
التويتر اضغطي على هالرابط
اشوفكم على خير
مرحبا بنات .. احس من زمان ماكتبت شي بالمدونه انشغلت هالاسبوع مره بس قلت لازم اسوي شي بالويك اند للبنات ومافي اجمل من الفرش صراحه انا من عشاق الفرش وبقولكم سر لو تجيبين شدو اي كلام ومعك فرشه جميله راح تبدعين فيه .. ولو معك فوانديشن غالي وفرشه سيئه راح تكون التغطيه اي كلام ..
لو تشوفون هالابداعات بالميك اب وخبراء التجميل كله فرش في فرش .. انا راح احط لكم عشر من فرشي المفضله ما استنغني عنها طوال الاسبوع ..
موجز بسيط عن الفرش :
هي نوعين :
1- فرش صناعيه : تكون من مواد صناعيه وليست طبيعيه غالبا قاسيه ورخيصه ومالها ريحه جودتها غالبا اقل من الطبيعيه .
2- فرش طبيعيه : مصنوعه من مواد طبيعيه (شعر حيوانات ) الخشب طبيعي صناعتها غالبا يدويه لها ريحه جودتها رائعه غاليه جدا .
فرش الوجه (الفاونديشن والبلشر والاضاءه ) : ( من اليمين )
1- فرشه سيقما الكابوكي جميله جدا للتوزيع تدمج بسهوله وماتمتص الفاونديشن جميله جدا مع اي فاونديشن حتى استخدمها مع البيبي كريم ويطلع خيال .
2- فرشه ماك ١٠٩ هاذي الفرشه قبل سنه ماكانت متوفره عندنا دايم اسأل عنها يقولوا مافيه واخر شي قالوا انقطعت طبعا انا عارفه انها مانقطعت بس يسكتوني :( المهم لقيتها في دبي الحمدلله ويوم دورت قبل كم نزلوها عندنا الحمدلله .. جميله جدا للاضاءه والبلشر والكنتور .
3- فرشه ريل تكنيك سنتبلينق برش هي عباره عن فرشه تنقيط يعني توزعين بالتنقيط والضغط جميله جدا بالفاونديشن الثقيل والمتوسط تعطي تغطيه رائعه حتى اللي عندها مسامات واسعه لو توزعين بالتنقيط والضغط تلاحظين راح خف بشكل كبير شكل المسامات (ممكن تدورين كيف تستعمل هالفرشه ) برضو استخدمها للبلرش الكريمي تجنن مره .
4- فرشه الفان برش ٢٢ من سماش بوكس
انا من عشاق الفان برش بس للاسف نادره بالسوق بشكل عجيب وماك كمان قطعوا حقتهم !! صار مايبيعها الا الماركات الغاليه جدا مادري ليه .. المهم هاذي الفرشه جميله جدا للاضاءه على عظمه الخد ولا لو بغيت بلشر فاقع تمسك اللون بشكل خفيييييف وتوزعه بشكل جميل جدا جدا .
زي هالبلشر مثلا مستحيل احطه بفرشه تمسك اللون بقوه هاذي بيرفكت .
فرش العيون ( الشدو والدمج ) : ( من اليمين )
1- اليمين فرشه ١٣٩ من ماك هالفرشه تمت ٨ سنوات عندي على الاقل ومازالت صامده (فرش ماك تعيش تعيش بقوه ) هالفرشه رائعه للشدو والبيقمنت والتوزيع الكامل على الجفن تمسك اللون بشكل مرتب ونظيف .
2- فرشه انقلوت ١٠ اس فرشه للدمج المحدد والنحيف انتي مثلا تبين توزعين شدو بس ماتبين الدمج كثير تبينه نحيف هاذي مثاليه مره احبها كثير ودايم على كسره الجف تدمج اللون بشكل ناعم وخفيف واذا بغيت ازيد ازيد زي ما ابي ..
3- فرشه ٢٢٤ من ماك لو اعرف اكتب شعر كان بكتب قصيدة مدح بهالفرشه اعشقها اعشقها تدمج الحواف بشكل رائع وعجيب كأنه سحر انصح فيها بقوه كثير يقولون حقت سقيما نفسها واحسن انا ماجربت الا ماك يمكن اجرب سيقما واقولكم وش احسن لو حصل لي .
4- الفرشتين الاخيرات من اليسار وحده من ماك رقمها ٢١٧ جميله بالدمج والتوزيع خطيره هالفرشه دمجها احترافي جدا ولا يعلى عليه اللي جمبها الصغيره من صيدليه بوتس شبيهه فيها بس ماك افضل بس شيكو بين فتره وفتره في بوتس ممكن تلقونها لان اخر مره كانت مش موجوده تدمج بشكل جميل وتوزع برضو وسعرها ٢٥ ريال بس .
فرش الكحل والحواجب :
هالفرشتين كلهم من سماش بوكس على فكره سماش بوكس فرشهم ممتازه واحترافيه وكثير من الميك اب ارتست يستخدمونها بس شهرتها هنا مره قليله وغير كذا كاونترات سماش بوكس عندنا مافيها شي ابد يقهرون :(
المهم اللي على اليمين فرشه الكحل جميله بالرسم مره وماستخدم الا هي مع ان عندي سيقما وماك وبودي شوب وشانيل بس ما احب الا هذي استخدمها مع الجل لاينر ومايحتاج اغسلها قبل بفتره تنشف بثواني بالصباح ارش عليها غسول الفرش بشكل خفيف وامسحها بمنديل وتصير جاهزه للاستعمال ( ترا فرش الكحل النحيفه كلها ماتبي غسل قبلها بيوم تنشف بدقيقه ) .
الثانيه للحواجب رقمها 12 جميله برسم الحواجب وتاخذ اللون مدري كيف بس اقولكم تاخذ الكميه الكافيه للحواجب كانها تعرف هههه جميله جدا واهم شي عندي دائما بفرش الحواجب انها ماتصير ناعمه مره وهاذي كذا : )
وطبعا الاداه السحريه اللي صارت هوس كل البنات هي البيوتي البلندر اعشقها مررره استخدمها للفاونديشن واذا بغيت تغطيه خفيفه اغسلها وبعدها اوزع الفونديشن فيها يطلع مره طبيعي واحيانا استخدمها للكونسيلر شي عجيب بالتوزيع والدمج مره ممتازه وتستحق الضجه .
واخيرا القيف اواي عباره عن بيوتي بلندر واتمنى تعجب صاحبتها راح اخلي الدخول مفتوح لحد الخميس الجاي وبعدها راح اعلن الفايزه واراسلها وين ماكانت بالسعوديه الشروط بسيطه جدا :
1- فولو بالتويتر اضغطي هنا
2 - فولو بالانستقرام هذا حسابي norahbeautybox
3- اكتبي تعليق تحت مع اسمك بالتويتر او الانستقرام او ايميلك عشان اراسلك اذا فزتي .الفائزه هي
nourh123@hotmail.com وحظ اوفر للبقيه انتظروني الجاي اجمل ياجميلات
نصائح للفرش :
1- الفرش يبي لها عنايه وتنظيف كل ماعتنيتي فيها كل ماقعدت معك اكثر .
2 - لاتتحسفين بالدفع لفرشه او فرشتين لانها تقعد معك سنوات .
3-الفرش الرخيصه متوفره بشكل قليل بس الريل تكنيك رائعه ومتوفرة عند مندوبين ممكن تدورون بالنت .
4- الفرش لها مليون استخدام لاتحصرين استخدامها بشي معين وتموتينها P;
*للاشتراك في مدونتي اضغطي على الرابط الموجود في اليمين بالضغط على
