خمس منتجات من الصيدليه ما استغني عنها مع قيف اواي 5 (تم اعلان الفائزه ) Must have DRUGSTORE products with Giveaway

مرحبا بنات مره متحمسه لهالتدوينه فيها كل شي احبه : )
معروف الصيدليات فيها اشياء روعه وخصوصا الميك اب والعنايه وجودتها ممتازه وكثير منها تكون بديله للماركات الغاليه
صراحه انا اذا رحت الصيدليه اقعد ساعه احوس فيها ولا امل لين يطلعوني اهلي :(
عاد كثير اشوف يوتيوب بنات حاطين ٥ منتجات من الصيدليه ماستغنون عنها وقلت راح اسوي هالتدوينه واخترت خمس اشياء فعلا احبها ودايم استعملها وسهله جدا ومتوفره والمفاجاة الجميله ان كل الخمس منتجات راح اسوي قيف اواي لها تستاهلون كل خير حبيباتي الشروط راح اتركها باخر التدوينه : )

اول منتج كحل مايبلين الكريمي كنت دايم استخدم ماك واذا بديت انتصف فيه يبدا يجف معي وجربت كحل مايبلين وتركت ماك الى الابد مررره جميل وكريمي ولا ينشف يعني اذا جف جف على نهايته وهذا شي طبيعي لاني افتح العلبه مليون مره فيه منه بني وموف وازرق .

المنتج الثاني هي فرشه ريل تكنيك للوجه للمحترفين صراحه كنت اسمع عن هالفرشه كثيييييير وجربتها وعرفت السر روعه بالدمج وتنفع لكل فاونديشن الكريمي والسايل والبي بي كريم .

المنتج الثالث بلشرات نكس جودتها ممتازه وثباتها جميل فيها منها كريمي وفيه منها بودره هالبلشر اسمه قلو لونه وردي طبيعي يعطي الوجه تورد صحي وطبيعي وغير متكلف قد كتبت عنه قبل اضغطي هنا وانه بديل لماك بوسي .

المنتج الرابع مسكارا ماكس فاكتر 2000  هالمسكارا قديمه بس مازالت مطلوبه جميله تكثف وتطول كثير مسكارات اتركها بس هاذي دايم ارجع اشتريها .

المنتج الخامس والاخير روج ريد فلفت من ريفلون قد كتبت لكم قبل اني ماتوقعت الريفلون لب بتر بهالشكل وماعجبتني ابدا مافيها ثبات وسعرها مبالغ فيه بس طحت في غرام هاللون اجمل لون جربته من اللب بتر لونه عنابي احمر وثابت بالنسبه للارواج الثانيه حتى لو اختفى يبقى اثر جميل على الشفايف .
هاذي منتجات لو خلصت راح اشتريها لانها فعلا مناسبه لكل يوم والاوقات اللي تكونين تبين شي سمبل كل هالمنتجات روعه وتعطيك نتيجه ناعمه واسعارها ممتازه ومتوفره في اغلب الاماكن .

ماركه نكس متوفره في سنتر بوينت
ماركه مايبلين وريل تكنيك وماكس فاكتور وريفلون في وايتس ( فرشه ريل تكنيك هالنوع ماشفتها في الصيدليات بس الانواع الثانيه متوفره .

كل وحده تقول وش منتجاتها المفضله من الصيدليه وماتستغني عنها ؟ حابه اعرف وش الاشياء اللي تحبونها اكتبوها لي هنا او على التويتر او الانستقرام .
القيف اواي راح يكون لما السبت الجاي ان شاء الله وراح يكون لجميع مناطق المملكه
الشروط ( مافي شروط صعبه ) :
تسوين فولو بالتويتر او على الانستقرام .
اهم نقطه هي انك تكتبين ايميلك.
وين تكتبين ايميلك ؟ 
عندك كذا خيار اختاري اللي يناسبك .. اما تكتبينه هنا بالتعليقات او تكتبينه منشن بالتويتر او تعليق في صوره الانستقرام هاذي 

راح اختار الفائزه من المتابعات بالتويتر او بالانستقرام بس لوماكنتي حاطه ايميلك ماراح اختارك .
الانستقرام norahbeautybox
التويتر اضغطي على هالرابط
اشوفكم على خير 

اشياء حبيتها الفتره اللي راحت May Faves!

مرحبااا بنات .. شلونكم ان شاء الله طيبين 
العالم كلها اختبارات ومذاكره فالله يعينكم يارب .. انا جايتكم بمفضلات هالشهر وهي اشياء جربتها هالشهر او الفتره اللي راحت عموما وعجبتني وعلقت عليها عاد اشيائي كثيره هالمره اتمنى تعجبكم وتستفيدون ..

بالنسبه للوجه ماكنت استخدم فاونديشن لاني يوميا احط مكياج فصعبه احط فاونديشن كل يوم .. واحسن شي جربته هالشهر ويعطيني تغطيه جيده هو بي بي كريم مايبلين تغطيته خفيفه مافيه زيوت كثير وفيه حمايه من الشمس اتوقع قرب يخلص حقي اذا تبين تقرين زيادة عن البي بي كريم افتحي هالرابط .
بالنسبه للكونسيلر فيه ثنين كنت استخدمهم اول واحد الكونسيلر الجديد من بنفت وكتبت عنه هنا بس عشانه غامق صرت استخدمه كمصحح للهالات جميل جدا ولايتكتل وانصح فيه بعدها احط كونسيلر فيت مي من مايبلين وهذا فاتح بالنسبه لي بس يعطي اضاءه مع كونسيلر بينفت .. وعموما درجاته قليله لكنه جميل مره ويناسب البشرات اللي فيها عيوب قليله انصح فيه بقوه .
 البلشر بما اني دايم مستعجله وكنت مضغوطه فا احسن شي جربته هو البلشر الكريمي روز بيتل من نكس حلو مره وناعم ويناسب كل البشرات واللوكات وعلى فكره هو بديل مثالي لبلشر بوسي من ماك  شوفي هالرابط .

العيون : هالبالت عندي اياها من زمان من بير مينرلز وهي لميتد ادشن يعني مب متوفر هاللحين شاريتها اون لاين بس من فتره شفت سيفورا منزلين شدوات بير منيرلز قلت دام نزلوها بكتب عنها شدوات هالماركه جدا جميله وثابته وصبغته قويه مره احبها احيانا استخدم لون واحيانا الوان متعدده ( ملاحظه ماراح تلاقون هالبالت بس نصيحه جربوا شدواتهم ) .
الاكحال غير الاسود الوحده اكيد تحب التغيير ومافي اجمل من اللون الاخضر والبني كتغيير وبرضو هادي ومب زحمه زي الازرق والموف كلها من بورجوا وثباتها ممتاز .
المسكارا هاذي عينه من شانيل لمسكراتهم الجديده ممتازه مرره توزع الرموش ولا تكتلها وبرضو تطول حبيتها مره مع اني ماقد فكرت اشتري مسكارا من شانيل بس هاذي اعجبتني مره ويمكن اشتريها بالحجم العادي مستقبلا.

الفرش :
سيقما الكابوكي F88 اروح وارجع عليها مره ممتازه للتوزيع والدمج وبما ان شعيراتها جدا كثيفه فهي مناسبه مره للتغطيه المثاليه مع الفاونديشن الثقيل وحتى الخفيف تنفع له تقدرين تطلبينها من هنا وفيه خصم لو حبيتي 10 بالميه .
الفرشه الثانيه لي كم اسبوع شريتها من بربري رقمها ٩ استخدمها للدمج الشدو مره ممتازه وتدمج بسهوله ومهمتها شبيهه بفرشه 224 بس حبيت هاذي اكثر لان شعيراتها اكثر .

الشفايف :
روج ايف سان لوران YSL 14 وروج كريم بورلي رقمه 095 من ريفلون الصراحه كل هاللونين ابي استعملهم وبديت ادمجهم سوا اول شي احط ايف سان لوران وبعدها اخففه بمنديل وبعدها احط كريم بورليه من ريفلون ويعطيني نتيجه ناعمه مره .
واللي عندها كريم بورليه ووتورطت فيه لانه نيود بزياده اقولها حاولي تستخدمينه مع الارواج الصارخه او المحددات وراح يعجبك مره .

والقلوس اعشقه من كلارنس رقمه 2 مره جميل وقد تكلمت عنه احسانه احطه لوحده واحيانا مع ارواج ريحته تفتح النفس ويمكن تتحمسين وتاكلينه لان طعمه لذيذ . 

الاظافر :
 اليسار من سالي هانسن من وجوه فرع صحارى لونه ازرق بحري مره جميل وكريمي وعلى طول ينشف وهاذي اول مره اجرب مناكيرهم وعجبني مره رقمه 250 واسمه BLUE IT  .
الثاني هوليدي من شانيل Holiday 617 هذا اللون لو تذكرون الصيف الماضي انهبلت كنت ابيه ولا حصلته وكان لميتد ادشن واللحين نزلوه بشكل دائم جاني هديهلونه اورنج فاقع وهادي بنفس الوقت وبرضو حسيته يقبل كل البشرات .

الشيين اللي ماحبيتهم الفتره الماضيه :
هالسكراب / من باث اند بودي بوركس بالمانقو وجوز الهند ريحته استغفر الله ياربي قبيحه جدا وغير كذا مايسوي اي مفعول بس شكل واسم هاذي اول مره اجرب سكرابات باث بس شكلي ماراح اسويها ثاني مره .
الشي الثاني شمعه من ديورانس محلهم في حياة مول المحل يجننن مره وروايح تاخذ العقل وكنت من زمان ابي شمعه جميله وقررت اشتري منهم وحده وطبعا اخترت رائحتي المفضل اللافندر او ماشغلتها بالبيت انصدمت مالها ريحه ابد ابد :( مره انقهرت وخصوصا انها غاليه وغير كذا شي يقهرني بالشموع ماتحترق بالتساوي يعني بيضيع نص الشمع عليك بالحوايف عموما المحل ودي اجرب منه اشياء بس الشمعه احبطتني .

 *للاشتراك في مدونتي اضغطي على الرابط الموجود فوق على اليمين بالضغط على  

• تلقوني هنا على التويتر   
•  انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  SUM2013 اضغطي هنا لموقع سيقما
•  اشوفكم على خير .

ريفيو شامل عن البي بي كريم

مرحبا بنات شلونكم ؟ ان شاء الله بخير : ) .❤.❤
هالريفيو انطلب مني كثير من زمان ان شاء الله يعجبكم ويفيدكم ولو اني تأخرت فيه 
اول شي بتكلم عن البي بي كريم باختصار  :
هو منتج قديم كانوا الاسيوين يستخدمونه ولما عرفوا شركات التجميل الغربيه عنه كل شركه انتجت بيبي خاص فيها
طبعا بشرات الاسيويات لها خاصيه معينه نظرا لبيئتهم واكلهم تلاقون ام 80 سنه زي بشره ام 50 عندنا فشي طبيعي ان هالمنتج يناسبهم جدا ويضيف لبشرتهم رونق خاص فيهم اكثر مننا ❤.

تعريف البي بي كريم :
البي بي كريم مكوناته غير ضاره وكيميائيه ويرطب ويعطي البشره نضاره ويعالجها ( هالكلام مب بالضروره صحيح )
الماركات المشهوره اغلبها نزلت لها بي بي كريم اللي فاشل واللي ممتاز واللي خفيف واللي كانه كريم اساس وهكذا ... انا عن نفسي ماكنت متحمسه اجربه من ايام الاقلاع وانا اشوف التجارات يبيعون الكوري حسيته موضه وبتروح .. لكن بعد مده بديت اجرب من كم ماركه وفيه اللي عجبني وفيه اللي لا .. راح استعرض معكم بهالتدوينه تجاربي لست انواع بي بي كريم اتمنى يعجبكم وتستفيدون واسفه اني تأخرت بالريفيو بس قلت اجرب هالكريمات فتره عشان احكم صح ❤ ❤ ❤: )  

بي بي كريم سماش بوكس : 
جميل جدا واعتبره كريم اساس خفيف تغطيته متوسطه قوامه ثقيل شوي فيه حماية من الشمس انصح فيه اللي تبي تغطيه اثقل من البي بي كريم الخفيف

بي بي كريم بودي شوب :
يجي منه 3 درجات 1 و2 و3 انا اخترت 2 قوامه ابيض ومع الدمج يتحول للون بشرتك تغطيته خفيفه لازم يتثبت بودره اشوف انه يدهن بعد كم ساعه .

بي بي كريم بوبي براون :
ممتاز وهو افضل واحد جربته يناسب البشرات الصفراء اكثر من الورديه تغطيته متوسطه ثباته ممتاز ويدمج بسهوله على البشره فيه نسبه 35 حماية من الشمس .

بي بي كريم قارنيه :
كثير يسبون هذا البي بي انا ماشفت انه سيئ خصوصا اني ادمجه مع اساس احيانا ويعطيني تغطيه حلوه قوامه كريمي يندمج بسهوله
مافيه حماية من الشمس .

بي بي كريم مايبلين :
تغطيه خفيفه جدا عجبني قوامه وتركيبته كثير احطه اذا بغيت طله خفيفه مع شوي كونسيلر ويطلع جميل جدا انصح فيه المراهقات اللي يحبون التغطيه الخفيفه بالمدرسه مناسب لهم و نسبه الحمايه من الشمس  30 .

بي بي كريم لوريال :
اول ماحطيته لاحظت كم وحده قالوا بشرتك منوره للاسف الشديد ماقد شفته باسواقنا انا شريته من السوق الحره من دبي تغطيته خفيفه قوامه ابيض ويندمج بسهوله فيه حماية بسيطه من الشمس 12 بالميه بس الشي اللي ماعجبني فيه انه يترك ملمس ترابي خفيف .

اللي محتاجين تعرفونه بحطه بهالنقاط ❤ :
1- البي بي كريم يناسب البشرات الصافيه اكثر من البشرات المتضرره
2- البي بي كريم عاده فيه دهون لان هو اللي يخلي قوامه كريمي ويعطي اضاءه للوجه لذلك تحتاجين تثبيت بودره خصوصا اذا كانت بشرتك دهنيه
3- البي بي كريم غالبا تغطيته خفيفه الي متوسطه فأذا انتي تدورين شي ثقيل ما انصحك فيه  
4- اغلب البي بي كريم يجي بثلاث درجات لايت ميديم ودارك .

وهذا كل شي عن البي بي كريم اتمنى استفتدوا من هالتدوينه واللي جربت اي نوع او انواع ثانيه تقرد تترك تعليق هنا او منشن بالتويتر❤ ❤.❤
 

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
• 
    انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RSR2013 وهنا موقع سيقما  
•  اشوفكم على خير 

تجاربي لشهر مارس MARCH FAVORITES

مرحبا بنات 
ان شاء الله انكم بخير انبسطتوا بالاجازه للاسف بدت الدومات وماعاد فيه عندي وقت :( 
بهالتدوينه بستعرض افضل ماجربته في الميك اب في الشهر اللي فات وعجبتني وفيه منتجين فاشلين باخر التدوينه بكتب عنهم : 

الفاونديشن والكونسيلر :
من فتره طويله وانا ادور البي بي كريم حق بودي شوب وكنت ابي الدرجه الثانيه ودايم مخلصه والحمدلله اخيرا توفر تجربتي كانت ناجحه حبيته مره يغطي بشكل خفيف يندمج بسهوله بس اهم نقطه لازم يتثبت بودره ولا بيعطيك شكل دهني ماراح تحبينه .
بالنسبه للكونسيلر قد كتبت عن هالكونسيلر هنا (دليلك بأختيار الكونسيلر من ماك ) هو تغطيته خفيفه وهذا اللي يناسبني غالبا خصوصا بفترات الصباح ماحب الشي الثقيل .

الشدو : 
كل هالشهر تقريبا اذا حطيت شدو ماحط الا هذا اسمه برونز من ماك ( كنت شاريته وانا مسافره وتكسر :( ) جميل جدا تقدرين تخففينه او تثقلينه وحطيت سواتش بالانستقرام هنا للي حاب يشوف اللون .

البلشر :
اليمين  MELBA من MAC  لونه وردي فاتح جدا وطبيعي دايم مخلص من ماك وعرفت ليش صراحه اكثر بلشر طبيعي عندي ويناسب اي بشره يمكن هذا اللي خلاه يشتره واهم شي انه مطفي يناسب اللي مايحبون اللمعه  حطيت سواتش بالانستقرام : ) 
اليسار بلشر بلمعه اسمه ALPINE BRONZE لونه برونزي مع لمعه ذهبيه جميل مررره كنت انتظره من زمان لاني شفت وحده باليوتيوب تمدحه ورحت سألت حقت ماك قالت مخلص :( بعدين نزلت مره ثانيه طلع الكولكشن توه ينزل اتاري البائعه ماتدري قالت مخلص وبس < تبي تفتك مني ... المهم هو من اخر كولكشن يمكن تلاقونه اللحين للي تبيه روعه وخطير بالصيف .. انا احطه بلشر وصديقتي توزعه على كامل الوجه وتقول مره حلو بالطريقه : ) (قصة حياتي هالبلشر :/ )

الأرواج : 
اليمين اقلام ريفلون الجديدة رقمه 001 برضو فيه صوره بالانستقرام صجيتكم فيه بس لاني توي اطيح فيه > بدري :( 
الاقلام جميله تغطيتها بسيطه وخفيفه تنفع للصبح وللطلعات البسيطه ثابته بس لمعه القلوس تروح بسرعه 
الوسط قد حكيت عنه بتويتر وهو عباره عن محدد شمعي شفاف من ماركه تو فيسد في سيفورا تحددين فيه شفايفك وبعدين ترسمين الروج ويساعد ان الروج مايطلع على الحوايف ويتلطخ المنتج ممتاز وفكرته جديده عجبني مره وجربته كم مره وفعلا مايطلع الروج مع الاكل والسواليف يناسب مره الالوان اللي تحوس وتخافين يخرب شكلك مثل الاورنج والاحمر.

اليسار قلوس / كريم الشفايف من NYX اسمه  Buttery Nude رقمه ٠٤ مع ان كثير بنات يمدحونه من زمان بس توي اطيح عليه عجبني مررره ثابت ولونه يجنن بس العيب الوحيد هو الفرشه سيئه مره كانه خشب!! سواتش انستقرام .. 

 المسكارا :
اليمين المسكارا الصغيره من كلينك تركتها فتره ورجعت لها يعني حتى اللي مالها رموش تحت تطلع لها 
اليسار مسكارا من ماركه برستيج من سنتر بوينت جميله المسكرا مره وفرشتها عريضه انا احب هالنوعيه تكثفه مرررره بس التطويل عادي اللي مثلي تهمها الكثافه راح تعجبها مره وسرها ممتاز 30 ريال .

 الفرش :
هالفرشه اخذتها من الدانوب وكتبت عن فرشتين هنا بسعر رخيص جميله مره مع الشدو اللي فوق تنفع للي مستعجله وتبي شي سريع مناسبه لكامل الجفن او لو حبيتي للأضاءه .

المناكير : 
 قبل سنه تذكرون هبه البنات بمناكير تيفاني لدرجه اي بياع تدخلين عنده يقول عندنا مناكير تيفاني عاد حامت كبدي وكرهت اللون وكرهت الاسم وكرهت تيافني بكبره لول .. عاد قبل تره طحت على مناكير بيري ام كتبت تدوينه هنا وعجبني هاللون مره فرايحي وجميل . 

المنتجات سيئه لا انصح بشرائها :

هالمنتجين فاشلين بدرجه غير معقوله يعني اصلا هالاشياء مفروض ماتنباع يمكن الروج اهون شوي .. اليمين روج من لوريال اللي يجي غطاه شفاف بساعه او اقل يروح اللون مع ان اللون عاجبني مره لكن للاسف مب ثابت ابدا 
اليسار سويت سواتش بالانستقرام عنه وهو من البلشرات الجديدة من مايبلين اغبى بلشر شريته في حياتي مايطلع اللون ابدا ياحسافه الفلوس بس مانصح ولا وحده تشتريه ابدا ابدا .

طولت بهالتدوينه مررره اتمنى تسامحوني واهم شي تستفيدون وهذي غايتي ولاتنسون التعليق والمشاركه .

• *للاشتراك في مدونتي اضغطي على الرابط الموجود في اليمين بالضغط على  
• تلقوني هنا على التويتر   
•   انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  AAM2013 وهنا موقع سيقما  
•  اشوفكم على خير 

منتجات ندمت عليها ٢ product i regret buying 2

مرحبا ♥ :)

تذكرون قبل فتره كتبت عن منتجات ندمت تقدرين تشوفين التدوينه القديمه هنا عليها جيتكم من جديد ومعي اشياء ندمت عليها .. مع اني اقرا قبل اشتري واتفحص واسأل بس لابد يطلع شي ما يناسبني .. او اجربه ومع الايام اكتشف انه مايستحق !

طبعا لو اقولكم حماسي قبل سنه على هالارواج ماتصدقون مع حماس البنات عليهم قلت مب ارواج معجزه وفعلا نزلت بعد ٨ اشهر في اسواقنا .. وما انكر انها عجبتني الى حد ما واستخدمها الى يومكم هذا ترطب والوانها جميله وريحة الارواج تفتح النفس .. مشكلتي مع الثبات ماتثبت ابدا ابدا استغرب انه ٥٠ او ٦٠ ريال ماتوقع راح اشتريهم مره ثانيه ابدا فيه ارواج بنفس هالسعر وتثبت لمده اطول ..

 روج ايف سان لوران برضو ثباته سيئ لونه جميل جدا لكن مايثبت ابدا ابدا خصوصا هالنوعيه الانواع الثانيه جميله وقد كتبت عن ثنين روعه بس العلبه اللي يكون فيها ابيض الظاهر فيها مشكله ومشكلتها سايحه بزيادة .

مسكارا استي لودر ..مادري شلون شريت هالمسكارا سيئه وثقيله بس خلصتها عشان حرام فلوسها 

الثانيه ماتخفى على الكثير واستغرب من الناس اللي يحبونها واحسدهم واقول الله يهنيكم : ) ماضبطت معي ابدا 

هالمنتج  من تو فيسد قلوس شفاف يتحول للون وردي ثابت فكره هالمنتجات حلوه للمراهقات مشكلته يدبق وانا ماحب هالنوعيه ابد بس للامانه القلوس ثابت من بكرا ماراح : ) . 

فرشه ماك ١٨٧ من زمااااان شاريتها هالفرشه واقدر اقول ماستفدت منها بالشكل اللي كنت اتمناه كبيره مره فيه اصغر منها هي اللي ممتازه (اهم شي ظل يديني بالتصوير متحمسه هههه ).

ماسك للشعر من بوتس .. بعترف لكم اعتراف .. منتجات بوتس ماتفقنا انا وياها ابدا مدري العله مني او منهم اشياءهم مغريه ومتنوعه لكن الجوده سيئه على الاقل الاشياء اللي جربتها قريبه لمنتجات كارفور .

الماسك لو ما احطه يطلع شعري احسن < اسهل وصف : ) 

اللي جمبه مدري وشو بالضبط هههه فعلا مادري شريته والبائع قال لي تحطينه بعد الاستحمام ويخلي الشعر الكيرلي كيرلي بشكل مرتب مالاحظت هالشي ابدا يخلي الشعر دهني قريسي ! 

نجي للشي اللي ندمت وماندمت عليه هالشمعه من لوكسيتان روحوا للمحل وشموها بس يالهي اجمل ريحه شمعه شميتها بحياتي روووووعه مميزه وفخمه وتنفع عطر .. المشكله لم احترقت ماحترقت بالتساوي يعني اللحين فيه شمع كثير على الحواف حاولت اميعها ماقدرت يوم رحت لوكسيتان اخر مره قال جربي الزيت ترا احسن معترف ان فيها مشكله ! صرت افتحها واشمها واسكرها :(

وبس خلصنا .. : )
*للاشتراك في مدونتي اضغطي على الرابط الموجود في اليمين بالضغط على .

*  هنا التويتر ( تويتر نوره بيوتي بوكس )

منتجات ندمت على شرائها

التسوق من امتع الاشياء بحياتنا ولما تتوفقين باشياء ممتازه يصير اسعد واسعد ♥ :)
كثير منتجات ندمنا اننا شريناها وماستعملناها يا اما انك تشوفين مدح ويطلع مب قد الكلام او البايع يقنعك انه واو وهو خربوطي او بكل بساطه انتي تخطئين باختيارك وهالشي يصير للاغلبيه بالمحلات نتحمس نشتري مع الناس والجو العام بالسوق يحرضك تشترين اشياء يمكن تكون غير جيدة او سيئه تدوينتي هاذي راح اقولكم عن منتجات ندمت اني شريتها: 

بودرة البرونز  من بورجوا /Bronzing Powder From BOURJOIS 
بودرة البرونز من بورجوا تجي على شكل لوح شوكولاته بعلبه كرتونيه تتسكر مغناطيسيا العلبه كيوت مره وسمعت مدح كثير عليها وقررت اشتريها واستغربت كثير كيف الناس معجبتهم صبغتها سيئه جدا لازم تحطين كم طبقه عشان يطلع لك اللون ماعتبر هالشي جيد ابدا يضيع وقت وجهد الباودر برونز يجي بدرجتين واح وخمسين وثنين وخمسين .

بيس ال مات من ميك اب فور ايفر All mat from MUFE
المنتج الثاني ال مات من ميك اب فور ايفر يفترض انه بيس يمتص الدهون ويعطيك اللوك المطفي للاسف مايسوي شي حطيتيه او ماحطيتيه نفس الشي جربته على وحده بشرتها دهنيه ومافي اي فرق خصوصا منطقه الانف بالنسبه للبشرات الدهنيه يتركز فيها الدهون ماتغيرت بعد ساعه الأنف فيه لمعان ! حتي للبشرات العاديه لو بغيتي تحطينه عشان يعطيك لوك مخملي ماراح يسوي شي يذكر اللي محيرني ان الميك اب ارتست من ميك اب فور ايفر يعشقونه يمكن انا ماعرفت له ؟! 
جربته فوق وتحت الفونديشن نفس الشي للامانه ملمسه مخملي رائع وريحته نظافه :) . 

فرشه الحمره من بودي شوب / Blush Brush From TheBodyShop
هالفرشه وصتني عليها صديقتي وقالت انها جميله ولاني اعشق فرش الميك اب شريتها .. الفرشه حجمها وسعرها معقول لكنها ناعمه بزيادة عن اللزوم فيه فرش ناعمه لكن تمسك اللون بالشكل المطلوب هاذي العكس 
التوزيع فيها سيئ جدا خصوصا ان بلشراتي صبغتها قويه اغلبها فتطبع اللون طباعه واذا جيتي توزعين راح يبان نقطه البدايه والفكره من البلشر انه يكون ناتشروال قدر الامكان هاذي تفعل العكس فعلا اكرهها وندمت اني شريتها مانصح فيها راح اجرب الكابوكي يمكن تكون احسن منها لاني سمعت مدح عليها : ) 
 

اساس ميبلين دريم لوكد موس / Dream liquid Mousse From Maybelline 
الاساس شريته بناء على مدح البائع مدح غير طبيعي شريته وندمت فورا الاساس يسيح ومايثبت ابدا حطي شوي او كثير الثبات سيئ قوامه ثقيل شوي وصعب بالدمج  الى حد وما انسى انه يتكتل بشكل قبيح الشي الحلو فيه الضغاط بما اني احب العلب اللي تجي ضغط سهله بالتحكم والاستعمال لكن ماراح انصح فيه احد ابدا .

قلوس من سماش بكس Gloos From Smashbox
قلوس من سماش بوكس شريته الشتا اللي راح هاللون عبجني مره وكونه غامق وقلوس شي اغراني بقوه اشتريه جميل جميل كلون لكن تركيبته سيئه ثقيل بالنسبه لقلوس ويتلصق كأني حاطه شي فوق شفايفي احب القلوسات الخفيفه تعطي تغطيه ولوك جميل فرشته مب عمليه من النوعيه اللي تكون شعيرات وقاسية وطويله مفروض تكون اسفنجيه اسهل بالتوزيع ماتوقع اني راح اشتري قلوسات من سماش بوكس ابدا .

مناكير من كليرز/  Manicure From Claires 

مناكير كليرز شريت لي وشريت لاختي منها هالماركه معروف انها تقريبا موجهه للمراهقات لكن حتى المراهقات يستحقون مناكير افضل سيئ بدرجه غير معقوله مع اني اسكر العلبه بشكل جيد الا انه تنشف ويصير قوامه كثيف وكأنه صمغ هذا غير ان اول ماشريته كان يطول على بال ماينشف .. مع ان سعره ١٣ ريال لكن حسافه عليه ريالين 
الوانهم حلوه لكن مستحيل اشتريه ثاني مره ولا حتى لطفلة ام خمس سنوات : )

ظل كريمي من ديور Creme Eyeshadow From Dior 
شدو كريمي من ديور شريته من ايام الصيف قوامه موسي على كريمي سهل جدا بالتوزيع لونه حلو وصيفي المشكله انه يتكتل بشكل غريب حطيت برايمر او ماحطيت نفس الشي مع اني جربت كثير شدوات كريميه لكن هذا اعتبره الاسواء استغربت من النتيجه لأن شدوهات ديور بالعاده ممتازه .
 
فيه منتجات ندمت عليها كانت من كولكشنات ليمتد اديشن فكره ان هالمنتج فترته محدوده تغريني مره : ( والعواقب منتج اندم عليه ماحبيت اذكرها لانها ماراح تفيدكم بشي لانها ماعاد صارت موجودة بالمحلات .
 فيه منتجات شريتها وندمت عليها ورميتها ماتحملت وجودها بحياتي ولو كنت داريه اني بكتب هالموضوع كان احتفظت فيها منها شدو بورجوا الثلاثي اتذكر انه اسوء شدو مر علي صبغته خفيفه ولا تبين وحتى لو بينت يطلع اللون واضح انه متكلف وطبقات متراكمة و ندمت بعد على فرش مكياجي للوجه والبلشر بعد فتره بسيطه خشنت معي وغير الشعر اللي تساقط :( برضو شدو شانيل الرباعي الالوان كانت روعه نتشرال وبرونز لكنها تطيح وتهل على كل الوجه .
المنتجات ماعجبتني انا شخصيا بعد تجارب وفتره ليست بالقليله لكن ممكن تعجب غيري وتمشي معهم ولولا اختلاف الاذواق لبارت السلع لاتنسون تعلموني عن منتجات انتم ندمتوا عليها : )
* اتمنى تدوينتي حازت على رضاكم واستفدتوا تسعدني متابعتكم واشتراككم وتعليقاتكم :)
* للاشتراك في مدونتي اضغطي على الرابط الموجود في اليمين .