روج كورتني كارداشيان ايف سان لوران رقم ١٣ مع بديل YSL ROUGE PUR COUTURE 13 Le Orange

بنات الكارداشيان تميزوا بالموضه والستايلات الجديدة من فاشن وميك اب .. الخ واكثر وحده فيهم مشهورة كيم وتذكرون هبة البنات بروج انجل من ماك اللي هو معروف انه روج كيم  بالنسبه لي يعجبني بعد ستايل اختهم الكبيره كورتني ومن اول الصيف كنت اشوفها دايم حاطه روج اورنج كان يجننن عليها تحطه بالليل والنهار كله حلو واحيانا تحطه مع مكياج ثقيل برضو جميييل وبما ان هوايتي التنبيش والبحث لقيت لها مقابله في مجله بالنت كاتبه عن روجها الاورنج المفضل اللي دايم تحطه رحت دورته عندنا بالسعوديه بكل مكان ومالقيته وطلبته من النت لما نزلت السوق بعد فتره لقيته وكان موجود من الاول بس انا كنت ادور بالاسم وحنا العرض عندنا يكون بالارقام :( .

 

لون الروج اورنج فيه لمحه احمر فاقع كريمي ثابت بدرجه ممتازه فيه حمايه من الشمس العلبه ذهبيه كلاسيكه تركيبه الروج فيها ريحه ورد خفيفه ميزته مايتلطخ حول الشفايف معروف الالوان القويه اللي زي كذا يبي لها محدد هذا بالنسبه لي ماساح ولاتلطخ ثبت معي لمدة خمس ساعات رجعت حطيت عليه بشكل خفيف اللون موضه هاللحين على الصيف وصيفنا مطول فما تندمت اني اشتريته لكن لو ميزانيتك محدودة  ممكن تشترين البديل من ريفلون بحط السواتش بآخر التدوينه.

سواتش :

البديل من ريفلون كورال رقم ٠٨٠ Revlon Lipstick, Coral 080

 

بالعلبه فيه فرق ايف سان لوران درجه الاورنج افتح الريفلون جاي على احمر واغمق اما بالسواتش تشوفون تقريبا مافي فرق ابدا باللون الثبات واي اس ال اثبت والتغطيه تقريبا نفس الشيئ .

* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )
* متوفر في وجوه ٬دبنهامز،فافافوم،هارفي نيكلس ،باريس قالري، ساكس فيث افنيو، سفورا .
* سعره ١٨٠ ريال سعودي اما سعر روج ريفلون 48 ريال سعودي .