الـكـحـل Eyeliner

الكحل يعتبر من اقدم انواع المكياج قبل الشدو والروج وهالاشياء وكثير من الشعراء تغزلوا بالعيون الكحيله p; اوكي ندخل بالمهم 
الكحل ميزته ان الجميع مايستغني عنه عجايز وبنات .. باليل او النهار كلنا نعشق الكحل وكلنا نفتح فمنا اذا تكحلنا p; واكيد فيه احد يفضله ملون فيه احد يفضل الكات ايز وكل واحد واللي يناسبه بذكر لكم الانواع مع تجاربي لهم وش اللي افضله ومن اي ماركه . 

الكحل القلم / Pencil Eyeliner
من اشهر الانواع واقدمها كثير ناس يستخدمونه ومرتاحين عليه سهل ومتوفر في كل مكان بدايتي بالكحل كانت مع القلم وماكنت ابغى اغيره لانه معطيني اللي ابيه رسم سهل وثبات وهذا المطلوب انصح فيه المبتدأت بالميك اب اذا كنتي من النوع اللي يسيح الكحل عليه انصحك باللي يكون ضد الماء او ممكن ترسمين فوق الكحل بشدو اسود يعطيك ثبات اطول ولون قوي .
النوع اللي افضله جيفنشي / ماك  . 

الكحل الكريمي/ Gel Eyeliner
هالنوعيه اشتهرت بالفترة الاخيره هي عباره عن كحل كريمي يستعمل بواسطه فرشه دقيقه للرسم كثير منا يتخوف يشتري هالنوع لانه يبي له يد ثابته وترسم بسهوله يعتبر نوعا ما صعب الاستعمال للمبتدئين لكن اذا عندك عزيمه وحب للكحل راح تتقنين الرسمه بأسبوع انصحك تشترين نوعيه رخيصه عشان تتدربين عليها .. بالبدايه راح تشوفين عين عريضه وعين نحيفه شي طويل وشي قصير طبيعي جدا كلنا اول مابدينا كنا كذا p; هو يبي له صبر وتدريب فقط والنتيجه لو ضبطتيها راح تدمنين الكحل الكريمي ... مميزاته سواده فاحم وثابت لمده طويله ومايسيح حتى لو عيونك مايثبت عليها الكحل.
الماركه اللي افضلها / ماك , ميبلين .

الكحل السايل / Liquid Eyeliner
نوع اعتبره الاصعب شبيه بفكره الجل الكريمي  بس هذا اصعب بالتحكم والرسم لأنه قوامه سايل يعني ممكن تغلطين بالرسم حتى لو محترفه يبي له يد ثابته وترسم بسرعه اذا واجهتي صعوبه فيه ممكن ترسمين خطوط صغيره وتشبكين بينهم (اتمنى تكون الفكره واضحه ) بصراحه عن نفسي ما افضل هالنوعيه ابدا يحتاج وقت بالرسم وجهد اكثر من غيره من الانواع اللي ذكرتهم . 
الماركه اللي جربتها / ريميل وماعجبني خالص خالص .

* فيه ناس يحبون يرسمون الكحل بشدو اسود حلو وعملي وسهل بس لازم تكونين منتبه ماينزل على الوجه ميزته انه مطفي مره وناعم وتقدرين تستخدمين جميع شدوهاتك بطريقه الكحل بس اختاري فرشه حاده ولها زاويه زي فرشه ماك 266 . 

نصايح من نوره بيوتي بوكس
* الكحل متجدد واللحين الناس طايحين برسمه الكات ايز حلوه بس لاتتكلفين بسحبها لبرا.
* اذا كان المكياج للنهار حاولي تكون الرسمه نحيفه . 
* بين فتره وفترة ممكن ترسمين جوا عينك كحل هالرسمه كانت مشهورة بايام التسعينات قديمة نوعا ما لكن تبقى جميله.
* لو كنتي تبين الكحل يوضح ويبان ارسمي جواة عيونك بكحل نيودي / محايد .
* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )