زيارتي لمركز العناية بالشعر والبشرة

مرحبا بنات اتمنى انكم طيبين ومبسوطين بوست اليوم عن تجربتي لمركز العنايه بالشعر والبشرة عندي دوام بعد ساعه قلت استغل الوقت واكتبه قبل ما اتجهز .
قبل فتره دعوني مركز العناية بالشعر والبشرة لتجربة جلسات الشعر الجديدة اللي عندهم هاذي اول زيارة لي للمركز وان شاء الله ماراح تكون الاخيرة ..

الجلسة الاولى :
 كانت جلسة الديتوكس للشعر ومن اسمها واضح وش وظيفتها زي الديتوكس للجسم بس للشعر تنظيف عميق للشعر والفروة خصوصا من اثار الشامبو والبلسم والصبغات وغيره ولو فيه دهون متجمعه بالفروة تخفف منها
الجلسه عبارة عن خمس مراحل تحتاج منك ساعة الى ساعه ونص تقريبا عشان تنتهي من الجلسة .
الجلسة تناسب جميع انواع الشعر بدون استثناء وسعرها ٤٩٥ ريال .

الجلسة الثانيه :
 بلاستيك سيرجري هي زي عملية التجميل للشعر التالف والمتقصف الجلسة فيها ثلاث خطوات وتاخذ منك ساعه تقريبا فرق الجلسة هاذي انها تركز على الشعر كامل ومخصصه للشعر التالف وقالت لي الموظفه ان اللي شعرها جيد ماتحتاج هالجلسة سعرها ٤٩٥ ريال .

الجلسة الثالثة :
جلسة ازالة تقصف الشعر حبيت التجربة مررره عندهم جهاز زي الاستشوار  تمشي الشعر عليه ويقص الشعرات المتقصفه .. صراحه خفت يقص شعري بس سالتها قالت لا بس الشعرات المتقصفه ويبقى طول الشعر زي ماهو هالجلسة يكون معها ماسك
 بس انا ماحطيته لان عندي جلستين بجربهم سعرها ١٩٥ ريال .

صوره من الستوري لشعري قبل وبعد شعري  اسحب لونه كثير لاني اعشق الالوان الفاتحه وشعري غامق لكن مجملا عجبتني النتيجة وملمس شعري صار طري وفيه خفه ونعومه .

ملاحظات :
- فرع التخصصي كل الكراسي فيها مساج يعني ممكن تسوين مساج لجسمك وانتي جالسة
- يقدمون لك قهوه او شاي لو حابه
- مغاسلهم كبيره وهذا الي ريحني ( قد صار لي موقف بصالون كانت مغسلتهم صغيره مررره )
- العلاج للشعر والبشره اشوف انه ياخذ وقت ويبي له استمرار .
- اكثر شي حبيته فيهم انهم مايعلقون على شعرك ابداااا شعري تالف من سحب اللون واكره الصالونات اللي تسوق لنفسها انه تقعد تتذمر ان شعري تالف ومتقصف وتعبان .

اتمنى عجبكم البوست وفادكم لان كثير بنات سألوني بالسناب فقلت احسن احط بوست يرجعون له البنات متى مابغوا : )
واذا فيه جلسات تنصحوني اجربها عندهم علموني !
لاتنسون متابعتي على السوشل ميديا بنفس اسمي هذا norahbeautybox
القاكم على خير ..