مفضلاتي مؤخرا

مرحبا بنات ان شاء الله تكونون مبسوطين اخر تدوينه كتبتها برمضان وبعدها جاني كسل احس كل الناس يجيهم كسل وخمول بعد رمضان !! 
الله يعيده على الجميع اتمنى الجميع انبسط بالعيد والاجازه .. هالتدوينه جمعت فيه الاشياء اللي حبيتها الشهور اللي راحت لاني ماسويت بوست المفضلات الشهري من زمان وتجمعت اشياء احبها فقلت هذا وقتها اتمنى تجيبون كوب قهوه للقراءه لان البوست شوي طويل هههه انجوي حبيباتي .

 اليمين بلشر كريمي من شانيل رقمه ٦٣ نزلوا ست الوان اللون وردي لاهو غامق ولا فاتح احسه مثالي للكل التركيبه جميله جددداا كريميه بس ماتتكتل وتندمج بسهوله كنت اظن ان بلشرات ماك الكريميه ماك ممتازه بس يوم جربت شانيل تغيرت نظرتي وحسيت ماك ثقيل بالدمج القهر انها لميتد اديشن بالموقع كاتبين انها فتره محدوده عاد يمكن ربي يهديهم لان من زمان ماجربت منتج بهالروعه والسهوله فيه بنات قالوا لي مالقيناه بس اقولكم الالوان الثانيه بنفس الجوده (العوض ولا القطيعه ) .
البلشر الثاني شوقر بمب من بينفت يمكن قد تكلمت عنه قبل جميل جدا فيه لون وردي ومشمشي وبرونزي هالالوان كلها اجتمعت بعلبه جمال حقيقي وفيه لمعه خفيفه اذا حطيت منه احس ماحتاج اضاءه يعطي قلو للوجه بشكل ناعم .

مناكير اسينس او اسينسي جميله وسعرها رخيص وفرشتها كبيره للي تحب الفرش الكبيره راح يعجبها طبقه وحده تكفي اخترت الوان صيفي اليمين مرجاني رقمه 109 واليسار وردي فاقع رقمه 107 اسمائهم اليمين واليسار .

قلم زيت اللوز المخصص لزوائد الاظافر من بودي شوب صار لي فتره استخدمه والحمدلله خفت الزوائد كثير يجي على شكل ريشه تفركين القلم ويطلع الزيت وتوزعينه على محيط الاظافر .

بيقمنت نيود بيتش Nude Beach من بيرمينرالز من سيفورا شفت باليوتيوب وحده تمدحه وعجبني من وصفها وفعلا طلع رووعه لونه لحمي وفيه موف خفيف تبين تحطين خفيف منه او ثقيل ماحس لمعته تو متش  ناعمه للسهرات يعطي لوك راقي وجميل .

 بودره شفافه من ماك صديقتي جابت لي اياها مع ان عندي حقت فور ايفر اتش دي بس برضو هاذي حلوه تثبت الميك اب واحسها تخفي الدهون بالبشره اوزعها على الجبهه والانف فيه منها كومباكت للي ماتحب البودره .

 فرشه ريل تكنيك للمحترفين احس طفشتكم بهالفرشه بس فعلا جميله كتبت عنها بالانستقرام وبتدوينه سابقه هنا فيه بنات كثير سألوني اذا هي متوفر بوايتس او لا الجواب لا ماشفتها بصيدليه وايتس يمكن يوفرونها بعدين مادري!!

كونسيلر مايبلين برضو قد حكيت عنه خفيييف وجميل تغطيته وترطيبه تحسينه انه منتج غالي من شانيل ولا ديور انا احطه كاضاءه خصوصا لو كانت هالاتي واضحه ذيك الايام وقبله احط كوركترهنا التدوينه اللي تكلمت عنه بالتفصيل

الارواج انا طايحه فيها طيحه مدري وش فيني ..  اليمين روج كريمي قلوسي من ريميل روعه روعه ثابت ولون من اول طبقه يجفف الشفايف شووي بس ممكن تحطين قبله مرطب حلاته لونه جميل وبرضو يعطي لمعان افكر اشتري الوان ثانيه لان تحفه واختراع جميل .

اللونين الفاقعات من مايبلين المجموعه الجديده هالارواج آخر مانزلت من مايبلين عندنا طريقتي احطها بشكل خفيف ووفوقها قلوس او مرطب يعطيك لون جديد ومميز وصيفي الكورالي رقمه 109 اسمه SHOCKING CORAL والموف رقمه 902
واسمه FUCHSIA FLASH 

الاخير غرامي روج قيرلان اول روج اشتريه من قيرلان من اسمه GISELA رقم 47 من المجموعه G لونه احمر لكن احمر معقول هذا اول احمر اشتريه اقدر استخدمه يوميا واحسه ملائم جميل اللون مرررره وتركيبة الروج سحر صحيح سعره غالي جدا بس على سنع علبته جميله وفاخره يجي معها مرايه اللي ناويه روج من قيرلان انصحها بهذا بقوه .

 هاذي مفضلات متفرقه من اليمين مزيل المناكير اجمل مزيل جربته لحد اللحين وهاذي مكن ثالث علبه ريحته شوي مزعجه بس يشيل على طول حتى الالوان الغامقه
العلبه الزرقاء غسول لليدين من باث اند بودي وركس برائحه الزهور الايطاليه يابنااااات ريحته جميله جداا ورومانسيه صرت اغسل يديني كل دقيقه يجي على شكل رغوه اتمنى القى عطر زيه .
واخيرا على اليسار مناديل مزيله للمكياج من لا فريش بزهور اللافندر اخذتها من صيدليه بوتس فيها ثمان حبات بسعر 38 صراحه غاليه بس مادري لو اقدر استخدم المناديل كذا مره او لا جربت مره مسحت الميك اب وخليت المنديل مارميته تحسفت من بكرا استخدمت نفس المنديل والمفاجأه انه مسح كلش ههههه فيها زيوت اتوقع هذا السبب عموما راح اخلي كل منديل استخدام مرتين حسافه 38 ريال .

هالاعواد فكت ازمه شريتها من صيدليه وايتس دايم اخبص بالمناكير وبدال ما امسح كل المناكير ازيله بهالعود وبس

واخيرا شمعه من باث اند بودي وركس للي يحبون ريحه الخربز والبطيخ هذي تنفع لهم ريحتها صييييف جميله وهاديه وتوسع الصدر . 
وخلصت التدوينه اتمنى ماطولت عليكم اللي جربت شي منهم وعجبها او ماعجبها تعلمني انا موجوده في هالمواقع اللي تحت .
شكرا لقرائتكم ووقتكم 

• تلقوني هنا على التويتر   
•  انستقرام : norahbeautybox
•  إذا حابين تطلبون من سيقما هذا كود التخفيض تحطونه قبل ماتسوون تشيك اوت ويخفض لكم ١٠ بالميه  RNL2013 اضغطي هنا لموقع سيقما 
• اللي عندها سؤال هنا الآسك 
•  اشوفكم على خير .