متفرقات من ابو ظبي ودبي

قبل فتره رحت ابو ظبي ودبي الجو كان كارثه حار مره مره واحر من الرياض بكثير .. اتوقع الرطوبه تزيد الحر والكتمه

المهم عدا الحر كان كل شي جميل عاد قلت اذكر لكم متفرقات لعل تستفيدون منها بزياراتكم القادمه

ملاحظه :

التصوير من كاميرا جوال فاعتذر عن جودة الصور

ابو ظبي

اعشق ابو ظبي مره مدينه هاديه وجميله ومافيها ضجه دبي سكنت بجزيرة المارية

فيها اوتيلين الفور سيزن وروز وود كلها خمس نجوم ونظيفة وجديدة وفيها قالري اغلبها هاي اند براند وفيه كفيات جميله مثل قوديفا وليبلودز وبتيل

سكنت في RoseWood جميل ورايق ومافيه زحمه واهم شي عندي انه نظيف الاماكن اللي زي كذا غصب افتح عيوني واركز على كل شي والحمدلله هذا مالقيت شي يخليني اكرهه ، المطاعم اللي فيه جربتها ماعجبتني

الرد فلفت في Leopold's الذ ريد فلفت ذقتها بحياتي من لذاذتها ماصورتها وبرضو كيكة الجزر روعه

* في قالريا مول

القهوه التركية بلوبي FourSeasons بجزيرة الماريه ممتازة

الاوتيل كان فيه قناة ماجد اول مره اشوفها ذكرتني بالمجله مره عاد جلست اتفرج عليها p;

دبي

سكنت بسوفتيل الجي بي ار كان سيء جدا اول واخر مره اسكنه .. النظافه معدومه متخيلين اني لقيت ظفر اكستنشن بالارض ماصدقت سويت تشك اوت ماكان مريح ابدا وقديم للاسف بوكينق مايظهر الاوتيل زي ماهو ..

من الاشياء اللي احبها بالحل والترحال ستار بكس يعجبني بفروع دبي خيارات المفن كثيييره كل انواع المفن عندهم عكس الرياض مافي الا ثلاث او اربع انواع فإذا رحت استغل الفرصه

  

افترنون تي 

من الاشياء اللي احب اجربها وانا مسافره الافترنون تي احيانا افضله على الوجبات والقهاوي 

متعه ورلاكس وخيارات متنوعه

الافترنون تي في اوتيل The palace كان رايق مره وفيه نوع كلاسيك ونوع عربي الخيارات كلها لذيذه احيانا يكون زحمه مره فاحسن حجز :)

افترنون تي FourSeasons - الجميرا - ماحبيته مره  بس المكان كان جميل ورايق وقهوتهم البلاك لذيذه مره

كافيه the brass موجود فرع بالجي بي ار والستي وواك .. قهوتهم لذيذه مره وحتى فطير جوز البيكان لازم تجربونها
طعمها مميز مره

الافلام 

شفت فيلم سوسايد سكواد دخل قائمة افلامي المفضله

وذا سيكرت لايف اوف بيتس لطيف والرسومات والالوان روعه

بالنسبه للميكب هاذي اول مره اسافر وماشتري شي اخذت هالروج من السوق الحره من زمان ادور عليه 

الباقي متوفر عندنا اسواقنا تطورت مره وصار اغلب اللي بالامارات متوفر عندنا : ) 

* سواتش للروج بالانستقرام

اتمنى عجبكم هالبوست والقاكم في تدوينات قادمه