مفضلات سبتمبر September favourites

مرحبا
ان شاء الله جميع قراء مدونتي بخير .. هالتدوينه راح اذكر افضل المنتجات بالنسبه لي اللي استخدمتها في شهر سبتمبر .. هاذي اول مره اكتب مفضلات .. الفكره من هالتدوينه اني اكتب اكثر المنتجات اللي كنت استخدمها بهالشهر واهم شي اكون حبيتها عاجبتني الفكره مره ودايم باليوتيوب والمدونات احب اشوف وش افضل شي عند البنات بهالشهر لأني احس فيه كثير اشياء مميزه ومفيدة فقلت يلا نسوي زيهم وبالاضافة ان شهر سبتمبر احب الشهور لقلبي لأنه شهر ميلادي ودايم يصير الجو فيه حلو ومعتدل واحسه رايق وحبوب ههههه هيا بنا نشوف افضل شي جربته بهالشهر ❤❤❤

الارواج اغلبها طبيعيه بما ان الجو لا هو صيف ولا هو شتاء حبيت اكون ناتشورال قدر الامكان 
من اليمين 
1- استي لودر لونه مشمشي دافي اسمه Spiced coral رقم 31
2- ماك فيفا قلام رقم V وقد كتبت عنه هنا
3 - ريفلون بينك ترفل رقم Pink Truffle 001
4 بريف من ماك MAC Brave هذا اغلب واحد كنت استخدمه روووعه وثباته ممتاز

 

1 - بالت نيكد من اربن داكي مايحتاج اقول شي ♥♡♥

2- بودره الاساس ستديو فكس جميله وتغطيه كامله تنفع للبشره الدهنيه من زمان عندي انساها وارجع اطيح فيها : )

3- العلبه السوداء الصغيره مجموعه اكحال ملونه من سماش بوكس جميله جدا انا طلعت لي مع مجموعه بس تقدرين تشترينها لوحدها الاكحال كريميه والوانها جميله وثابته

4 -اضاءه واتس اب من بينفت كتبت عنها سابقا يوميا احطها تقريبا مره جميله للمزيد شوفي التدوينه هنا 

5 - مسكارا بينفت ذي ار ريل جميله وطبيعيه تطول وتكثف بشكل بسيط تنفع للجامعه والدوامات ♥

 مناكير من او بي آي هو المناكير اللي علقت عليه هالشهر لونه وردي حليبي فاتح جدا مبين غير ! روعه هاللون سمبل وناعم متوفر في نزيه .

 

*سبري الجسم جميييل جدا من باث اند بودي وركس اول مافتح باث كنت كل يوم عندهم بعدين مليت حسيت كل الاشياء متشابهه :/ هذا بالذات هو وجابنيز تشري بلوسم مختلفين وفيهم ريحه مميزه انصح بكل المجموعه ♥♡♥
*العلبه الصغيره معقم جربت ديتول وهالطقه ودايم يكون فيها ريحه كيمائيه كريهه هذا من باث اند بودي وركس بالفانيليا حلو ولاتحسين انه كيميائي انصح تشترونه بالتخفيضات يطلع ب٥ او ٣ ريال الميني 
* المرطب اللي غطاه اسود من بودي شوب لجميع انواع البشره وفيه فيتامين E اعشق هالمرطب وماستغني عنه ابد ودايم ارجع اشتريه 
بما اني اعشق الاكواب فراح اوريكم كل شهر ان شاء الله كوبي المفضل هههههه واللي تلقى اكواب مميزه وجميله تعلمني :) 

 

ان شاء الله كانت هالتدوينه مفيده لكم واي وحده عندها شي جميل  توريني اياه هنا او بالتويتر ولاتنسون تعلمون  صديقاتكم وقريباتكم عن المدونه يستفيدون ♥♡♥

 * للاشتراك في مدونتي اضغطي على الرابط الموجود في اليمين بالضغط على .

* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

مسكارا شوكنق من ايف سان لوران YSL Shocking Mascara

مرحبا فيكم ان شاء الله الجميع بخير بتكلم اليوم عن مسكارا ايف سان لوران وهاذي اول تدوينه لي عن المسكارا بشكل عام ♥♥.. 
المسكارا نسبيه ممكن وحده تعجب بنت وتناسبها وممكن وحده تقول قبيحه وماسوت شي لرموشي وهذا شي طبيعي لأن الرموش تختلف من بنت لبنت . ومستحيل نلقى مسكارا تعجب الجميع وهذا حال الاشياء كلها بحياتنا 
هالمسكارا عليها سوق حاليا انتشرت بين البنات من بدايه الصيف و سيفورا اخر مارحت له قالت انها سولد اوت♥♥ .
المسكارا قوامها كثيف وناعم الفرشه عريضه نوعا ما وتشيل كميه كبيره من المسكارا ريحتها ورد وكثير تشكوا من الريحه صراحه حركه غريبه من الشركه مسكارا وفيها ريحه ليه ؟ 
بالنسبه لتجربتي جربتها بالمحل كانت جميله جدا وفعلا صدمه على اسمها روعه وكثفت وطولت بشكل خياااالي .. لما شريتها وجربتها اول مره تفاجأت انها جمعت رموشي وتلصقت :/ صحيح اني احب هاللوك اللي كأن العيون متبلله لكن هالمسكارا شاريتها عشان تعطيني كثافه وطول .. 
رحت قريت عنها بالنت لانه ضاق صدري من النتيجه☹ .. وطلع الكثير مشتكي من نفس الشي .. وقالوا تزين بعد ثالث او رابع استعمال وفعلا صار لي شهر تقريبا استخدمها باوقات متفرقه وطلعت روووعه بشكل صادم هههه تكثف وتطول وتكبر العين وتجملها معاناته يبيلها ممارسه وفعلا مع عده استعمالات بتعرفين كيف تستخدمينها وتوزعينها انصح فيها بس بعد تجربتها بالمحل لأن يمكن ماتعجبك وتتحسفين انك شريتيها .
يجي منها ست الوان الاسود الرمادي البرونزي الموف الاخضر والازرق ماعندي فكره لو كانت كل الالوان عندنا .
هذا شكل الفرشه :

اتمنى انكم استفدتو واذا استفدتي من المدونه خبري صديقاتك وقريباتك وخليهم يستفيدون ♥♡♥
* للاشتراك في مدونتي اضغطي على الرابط الموجود في اليمين بالضغط على .  

* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

قيرل اباوت تاون من ماك مع بديل رخيص من ريفلون MAC Girl About Town Lipstick

كتبت بتدوينه سابقه عن ٣ ارواج ورديه رائعه لكل بنت افتحي الرابط هنا  كان من ضمنها روج قيرل اباوت تاون من ماك ♥.
الروج لونه وردي غامق من درجات الفوشي ثابت قوامه كريمي وتغطيته كامله يعتبر من الارواج الكلاسيكيه بماك وفيه منه مناكير وقلوس كثير بنات يحبونه وكثير يكون اول روج لهم من ماك لانه مشهور وسهل تحطينه مع كذا لوك واهم شي لونه جذاب وملفت بشكل انوثي انصح فيه البنت اللي ملت من درجات الوردي المعتاده وحابه تغامر لكن تغامر بالوردي ودرجاته هذا ممتاز ومثالي لها.. ميزته يناسب جميع البشرات تقريبا وممكن تحطينه مع مكياج ثقيل وممكن خفيف وناعم بالنسبه لي افضله مع الميك اب السمبل بس قد شفت وحده مسويه سموكي ايز وحاطه هاللون وطالع مره خطير ومتناسب ♥♥.
سواتش : 

طبعا فيه الوان بديل من ماركات رخيصه او غاليه اذا كنت حابه تشترين هالروج  مبروك وعليك بالف عافيه ♥ : )
فيه بنات تقول ابي هاللون بس ارخص من ماك فيه ؟ طبعا موجود وهاللون بالذات مشهور بكل الماركات ومطلوب من جميع الاعمار .. فيه روجين من ريفلون طبق الاصل من قيرل اباوت تاون الاول فاشن فوشيا وهاللون ماتذكر اني شفته عندنا لكن لو لقيتيه لاتترددين لانه نسخته بالضبط والثاني فوشيا اللي عندي فوشيا رقمه ٠٣٠ وهنا بالصوره نشوف المقارنه :

الالوان بدون مبالغه لون واحد ولو ثنتين حاطينه ماراح افرق بينهم ابدا يعني ممكن تشوفين اختلاف بسيط جدا جدا لو حطيتيه على ايدك ولبستي النظاره ودققتي ههههه الثبات ماك اثبت من ريفلون ماك تقريبا يجلس ٦ ساعات اما ريفلون بالكثير اربع ساعات ودايما بالغالب الماركات الغاليه تكون اثبت من الميزانيه المحدودة 
الاسعار ماك ٩٠ تقريبا ريفلون ٤٤ ريال والله يديم الرخص اللي على سنع ♥♥.

* روج قيرل اباوت تاون متوفر في محلات ماك .
*ريفلون صيدلية وايتس٬دبنهامز ٬ فافافوم ٬ سنتر بوينت .

كيف ارسم حواجبي (بالتفصيل) How To Shape Your Eyebrows

بقولكم قصتي  .. بالأول ماكنت اهتم بالحواجب ولما اشوف ماركات الميك اب ينزلون شي للحواجب اقول وش هالمبالغه يعني نرتب حواجبنا وخلاص خصوصا ان حواجبي خفيفه ومرتبه وهذا اللي خلاني ماهتم للفكره ابد  .
بآخر سنه بالجامعه صرت اركز بحواجب البنات ههههه وصرت افرق بين المرسومه وبين الشهباء زي حالتي وقررت اشتري علبه الحواجب من بودي شوب ومن بعد ماكان رسم الحواجب شي ثانوي صار عندي شي اساسي واول ما ابتدي بالميك اب ابتدي بحواجبي > سبحان مغير الاحوال ♡♡♡.
اتوقع كثير منا نفس الشي و كل ماتوسعنا واطلعنا بالميك اب كثرت اساسياتنا بالنسبه لي  الحواجب المرتبه تجمل الوجه وتعطيه الايطار الرائع للعيون خصوصا وللوجه بشكل عام .
اول شي لازم نتعرف على شكل حواجبنا الاساسي بعدين ندور الرسمه المناسبه بعض البنات مشاء الله حواجبهم الطبيعيه جميله من خلقه ربي وبعضهم يبي لها تعديل سواء بالتشقير او اي شي ثاني .
لما تحددين الرسمه المناسبه تشرتين المنتج اللي يناسب سواء قلم او باودره عن نفسي افضل الباودره القلم مايعطي الامتلاء الطبيعي .
نجي للرسم فيه اربع نصايح مهمه بقولها لكم  :
١- اللون اهم شي يكون مقارب للون شعرك .. مثلا شعرك بني فاتح اختاري بني افتح او اغمق بدرجه انتبهي يكون مخالف بشكل تام .
٢ الغرض من الرسم هو الامتلاء بين الشعيرات لاترسمين رسمه تكون كأنها لصق او ستيكر حاطته على حواجبك حاولي قد ماتقدرين يكون طبيعي .. شوفي حواجب العارضات من قريب تقدرين تشوفين الجلد بس  من بعيد يكون الحاجب ممتلئ باللون .
٣- انتبهي يطلع اللون برا الحواجب مهما كنتي مستعجله لايطلع اللون لبرا او يكون نازل لآخر شي .
٤- ابتعدي عن رسمات الحواجب اللي مره حاده اللي توحي بالشر وابتعدي عن الرسمات المقوسه اللي كأنها افلام كرتون : )  

 شكل الأوجه مع رسمه الحواجب المناسبه : 
رسمه وجهك مهم تكون متناسقه مع رسمه حواجبك ويصير فيه توازن .. ضروري تعرفين رسمة وجهك فيه ست اشكال للوجه راح اذكرها مع الشكل المناسب للحواجب لها نبدا على بركه الله :
١- الوجه البيضاوي يعتبر هالشكل من اجمل الاشكال ويقبل عليه كثير من الرسمات واجمل رسمه تكون فيه زاويه ناعمه بالاخير او آخر الوسط مثل وجه الممثله قريس كيلي شوفوا كيف التناسق :

٢- الوجه الدائري اذا كان وجهك دائري لازم ترسمين رسمه تخليه اطول شوي وهي انسب شي لهالنوع من الاوجه فاحسن رسمه راح تكون المقوسه بشكل حاد شوي بالزاويه شوفي صوره هالممثله وكيف التناسق:

٣- الوجه الطويل بما ان الوجه طويل يفضل تكون الرسمه تعطيه قصر شوي اذا اخترتي رسمه تطوله ماراح يبين الجمال ويصير ملفت بشكل سيئ  انصحك تكون حواجبك مسطحه او مستطيله هاذي اجمل رسمه راح تضفي جمال على وجهك وعيونك مثل جسيكا البا بهالصوره شوفوا كيف حواجبها وهي وجهها يعتبر من الاوجه الطويله :

 

٤- الوجه المربع يعتبر من اكثر الوجه حده لان الفك يكون حاد وبارز افضل رسمه هي رسمه حواجب حاده بالزاويه مثل شكل كاميرون دياز لاحظو كيف التناسق وتخيلوها بحواجب دائريه او مستطيله ماراح تكون بنفس الجمال:

٥- الوجه القلب شكل الوجه القلب يكون الذقن دقيق وعريض م عند الجبهه يناسب له رسمتين اما تكون خط مستطيل مرتفع بشكل ناعم ونحيف بالاخير او مقوس بشكل لكن ناعم بالزاويه ريز ويذرسبون يعتبر وجهها بشكل القلب ولو تشوفون بقوقل صورها ترسم برسمتين مختلفات مره مقوسه ومره مستطيل ناعم مرتفع شوفوا الصوره هنا : 

 

٦- الوجه الجوهري من اصعب الاوجه لأنه حاد وعريض والجبه صغيره هو اقل الاوجه شيوعا اذا كان وجهك جوهري اهم نقطه ماترسمين رسمه حاده وراعي تكون ناعم عشان تعطي التوازن المطلوب شوفي هالي بيري يتتميز وجهها بالشكل الجوهري وترسم رسمه حواجبها بشكل ناعم مرتفع من الزاويه بشكل خفيف جدا:

بالنهايه كل ماتعرفتي على شكل وجهك كل ماعرفتي الرسمه المناسبه وحتى القصات المناسبه واختاري المنتج اللي يناسبك سواء قلم اوبودره او شدو وبفتره بسيطه راح تتقنين الشكل الجميل اللي يناسبك ويطلع شكلك اجمل بكل شي حتى لو رسمه كحل بسيطه وروج يطلع شكلك مرتب ومتناسق .

نجي لكيفيه الرسم: 
بعد ماتختارين القلم او البودره اللي تناسبك اختاري الفرشه مع البودره وانا استخدم سماش بوكس من اجمل فرش الحواجب اللي جربتها ميزتها مب ناعمه مره وهذا هو النوع المثالي للحواجب لأنها منطقه خشنه نوعا ما فيبي لها شي يمسك عليه اللون .
ابدي خوذي كميه وارسمي من الوسط لحتى النهايه بعدين ارجعي للبدايه وحددي بشكل متناسق بعد ماتخلصين مشطي حواجبك بمشط الحواجب الخاص عشان يندمج اللون الموضوع بسيط جدا جدا ومع الممارسه ماراح ياخذ وقت .
بالنسبه للبودره ممكن تستخدمين شدو اذا كان ماعندك الا هو يفضل مايكون بودره مره ومتناثر .. مثلا حق بودي شوب ميزته انه صلب ومايتطاير اذا اخذتي منه .
بعد ماعرفنا اشكال الوجه والرسمات المناسبه حابه اوريكم هالمغنيه قبل وبعد مازينت حواجبها وكيف تغير شكلها بعد ماكانت بشعه صارت تهبل 

شكل حواجبها سابقا : 

حاليا : 

يالله الجنه فرررق ..♡♡♡
بالنهايه هاذي ادواتي بالحواجب منذ الازل البودره متوفر في محلات بودي شوب هاذي العلبه الثالثه اللي بخلصها والفرشه متوفره في محلات وجوه وكتبت عنها هنا فرشه حواجب من سماش بوكس .

اتمنى انكم استفدتو واذا استفدتي من المدونه خبري صديقاتك وقريباتك وخليهم يستفيدون ♡
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

علبه الظلال شيدي ليدي الثاني من ذا بالم shadyLady Palette Volume 2

ماركه ذا بالم من ماركات المكياج الجديدة جودتها عاليه واسعارها متوسطه مريسا هي مُؤسسه هالماركه تقول عن بدايتها انها كانت تحب المكياج وتعشقه فقررت تشتري ١١ كتاب من الامازون عن كيفيه صنعه وبدت تحوس بمطبخها ومن هنا بدت الانطلاقه < لو احد يسوي كذا قالوا انهبلت ههههه المهم ميزة هالماركه انها جميله ومرحه علبهم كيوت ورومانسيه تذكرني في ستايل بينفت للاسف ماتوفرت عندنا لحد اللحين لكن ممكن تطلبونها من المواقع او تشترونها من برا.. بتكلم عن علبه الشدو هي ٣ علب اللي بتكلم عنها رقم ٢  .

العلبه يجي فيها تسع الوان فيه اللي النتاشورال وفيها الملون صبغته واضحه مره وفيه لمسه كريميه حريريه  (تكوينتها مب بودره زي الشدوهات الثانيه ابد ) دمجها سهل مايحتاج اي مجهود حجم الون يعتبر كبير نوعا ما اكبر من حجم ماك واصغر من حجم ميك اب فور ايفر بالعلبه موجود مرايه كبيره وممتازه ♥  .

السطر الاول من اليسار :

Caught in the Act Courtney : لونه بني غامق فيه لمعه ذهبيه بسيطه

Feisty Felicia : لونه بنفسجي غامق وفيه لمعه فضيه 

Insane Jane : بيج بني فيه لمعه معدنيه 

السطر الثاني : 

Bossy Bobbi : ازرق بحري فيه لمعه زرقاء بنفس اللون .

Makeout Mary : اخضر عشبي وفيه اضاءه ذهبيه .

Just This Once Jamie : وردي على بنفسجي بلمعه واضاءه فضيه/عشقي هاللون

السطر الثالث من اليسار :

Mischievous Marissa : برتقالي فاتح جدا مع لمعه .

Tempting Tara : ابيض مضيئ مع لمعه . 

Devilish Danielle :لونه خوخي شامباني مع لمعه .

سواتش حسب الترتيب بالعلبه :

انصح الجميع يجربونها مره ممتازه وجودتها رائعه اسوء شي انها مب موجودة عندنا بالسعوديه واذا طلبناها تكون غاليه مع سعر الشحن والضريبه مع ان اسعارها متوسطه وبعد فيها سيئه او نقطه ممكن ماتعجب الجميع انها كلها فيها لمعه او اضاءه يعني اللي يحبون المات ماتعجبهم ذكرتني بنيكد بالت الى حد ما . 
الماركه بشكل عام روعه وقد سولفت مع بنت استخدمت الاضاءه والبرونز وتمدحهم مره واتوقع كل اشيائهم جميله .

للطلب ممكن تطلبونها من موقع Nordstrom.com ويوصلها خلال سبع ايام .
وللي يبي يتعرف على الماركه اكثر هذا موقعهم : ذا بالم  


p.s اشكر كل متابعيني من جميع انحاء العالم .. ماكنت متصوره ان بامريكا الجنوبيه وحتى اوروبا احد يتابعني ويقراني .. اتركوا لي تعليق عشان اتعرف عليكم اكثر♥ ♥

* للاشتراك في مدونتي اضغطي على الرابط الموجود في اعلى الصفحة بهذا الشكل . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

قلوس مشمشي من كلارنس Instant Light Natural Lip Perfector

 كما عودتكم حبيباتي اجيب لكم منتجات ميك اب استعملتها وعجبتني وحبيت اشاركهم فيها هالمره قلت اكتب عن قلوس من كلارنس  ماركه كلارنس كثير منا مايمر عليها ويعطيها اهتمام لأنها ماتطلع اشياء مغريه او الوان تشد زي الماركات الثانيه هي باختصار تهتم بالعنايه والعلاج لكن لو جربتي شي جميل وبرضو معالج هذا هو عز الطلب احيانا نستخدم قلوسات بين فتره وفتره تغيير عن المات والكريمي والارواج الثقيله القلوس دايم يعطي انتعاش ويرجعك لعمر الصبا والمراهقه ههههه عن نفسي ماكنت يوم من الايام من المعجبين بالقلوسات بشكل عام لأني اهتم جدا بالثبات .

قلوس لونه مشمشي على وردي يتوزع بالاسفنجه اللي فيه خفييييف ومايتلصق زي بعض القلوسات ميزته معالج للشفايف ومرطب لفتر طويله لما كنت اعاني من الشفايف المتشققه خلال علاجي بالروكتان كنت ماستغني عنه ويخلي شفايفي مترطبه كل اليوم
هالقلوس جميل جدا جدا وغير نظرتي للقلوسات وصرت احترمها اكثر هههههه طبعا تغطيته خفيفه مررره لكن حلو لو حطيتيه فوق روج لو حابه يكون اقوى .. ريحته يالله على ريحته كأنك تاكلين هالشي .

لو وحده تبي تشتري قلوس انصحها بهذا لو وحده تبي تغير نظرتها عن القلوسات مثلي انصحها بهذا لو وحده شفايفها تعبانه وبرضو حابه تحط شي يجملها انصحها بهذا ... انصحكم كلكم تجربونه يجي منه ٣ الوان المشمشي والوردي والنيود  .
سواتش :

* متوفر في وجوه ٬دبنهامز، فافافوم ، سفورا .
* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

روج سموك ريد من توم فورد Smok Red From TOM FORD

توم فورد ماركة تعتبر حديثه كانت مختصه بالازياء والجلديات وبالفترة الاخيرة طلعت خط للميك اب من الماركات ذات الاسعار المرتفعه والجوده ممتازه .
اللون عنابي مخملي غامق علبته بيضاء فاخرة تركيبته كريميه سهل وثابت بشكل خيالي حطيته مره بمناسبه وكنت ماخذته معي عشان اعيد عليه اذا مر الوقت ولحسن الحظ مافتحت العلبه حتى مع الاكل والشرب والثرثره : ) 
عيبه انه غالي بشكل مبالغ فيه الروج سعره حوالي ميتين ريال ماتوقع فيه روج يستحق هالسعر مهما كانت ميزاته .
توم فورد كانت متوفرة بدبنهامز ولما رجعت له قبل فترة قال ان ماعندي الا ارواج برضو زرت محل وجوه بصحارى وقال انسحبت من الشركه نفسها والمسموح بيعه العطور فقط احبطت احباط شديد :/ اتوقع انهم كانوا يشترون المنتجات بدون ترخيص لبيعها عشان كذا انسحبت عموما مازال فيه محلات تبيع الارواج بكميات قليله زي دبنهامز وهارفي نكلس وكتبت هالتدوينه للفائده لو بغيتوا تشترونه او وللي تبغى تتسوق من برا .
لو حصل لي اشتري منها شي مستقبلا راح اختار البلشر لأن عليه مدح مب طبيعي وكثير من الميك اب ارتست يستخدمونه .
نصيحه بما ان الماركه اسعارها مرتفعه يستحسن تشترين شي مقتنعه فيه تماما وتستخدمينه بشكل دائم .
سواتش :

* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )

حمرة بيتش من ماك Blush Peaches From MAC

بلشر بيتشس من ماك لونه خوخي زي اسمه بالضبط احب الاسماء اللي توصف المنتج بكل بساطه ( بدون لف ودوران ) زي فيه بلشر من نيكس اسمه بيتش وهو بينك باربي هههه .
على كل حال لونه خوخي اصلي طبيعي دافي مات بدون اي لمعه صبغته واضحه جدا كميه قليله توزعينها تكفيك وممكن تزيدين لو بغيتي اكثر وراح تتوصلين للون اللي تبغينه روعه رووووعه هالبلشر من افضل منتجات ماك بالنسبه لي وكونه بدون لمعه يخليه انسب بلشر لكل يوم و يعطيك حيويه وانتعاش خصوص بالصيف لو حطيتيه مع برونز بيطلع احلى لوك ثباته اعتبره عالي يبقى معي لاكثر من ٨ ساعات ولونه ينفع لجميع البشرات لكن الافضليه للبشرات الميديم الى الغامق ناصعات البياض يمكن يكون عليهم تو متش وممكن تحطينه بخفه بيعطيك شكل طبيعي جدا .
سواتش:

* متوفر في محلات ماك ٫دبنهامز المملكه .
* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )
p.s :بنات الكويت الحبيبه يسمون الروج حمره وحنا بالسعوديه نسمي البلشر حمره p;

اضاءه واتس اب من بينفت Highlighters Benefit Watt's Up

 الاضاءه صارت شي ضروري بالميك اب تعطيك حيويه بوجهك ونضاره حتى لو كنت تمرين بايام سيئه بالنسبه لي احسها تكمل الميك اب واللوك وتضيف له النهايه السعيدة فيه بنات يقولون شكلها اوفر عشان كذا مانحرص نشتريها!! صحيح فيه اضائات اوفر وتبين كأنها لمبه عرس هههه اما انها تكون مخصصه للتصوير او انها نوعيه رديئه  لكن فيه اضائات طبيعيه وناتشورال وهاذي اللي راح اتكلم عنها دائما باختصار تخيلي انتي حاطه ميك اب جميل عيون سموكي وروج ياخذ العقل ووجهك باهت ومشهب ولا فيه روح :( .. قمه الاحباط سابقا كتبت عن اضاءه بنفت هاي بيم وهالمره بكتب عن اضاءه  ثانيه من بينفت اللي طحت فيها بالفتره الاخير وحبيت اشارككم . 

عباره عن علبه فيها اضاءه صلبه /مب سايله زي الهاي بيم تجي بعلبه اسطوانيه لونها لؤلؤي شامباني فيها لون ذهبي خفيف الباكجينق مستوحى من اللمبه كالعاده بينفت لزم يكون فيها لمسه فنكي وكيوت ♥
العلبه فيها فرشه اسفنجيه صغيره من تحت توزعين فيها الاضاءه انا ماستخدمها ماعجبتني استعمل فرشه ثانيه او اصابعي هالاضاءه شفت عليها مدح بالنت وقررت اشتريها والحمدلله اني شريتها جميله جدا جدا طبيعيه وتعطيك لوك صحي ومنعش مره وماتبين انك حاطه اضاءه كأنه قلو طبيعي واللي حببني فيها انه مافيها القلتر او اللمعه الخشنه اللي نشوفها دايم بالاضاءات وهالشي يخليها مثاليه للصباح سهله جدا بالتوزيع تمسكين العلبه وتمررينها على المناطق اللي تبينها مثل خدودك و الانف او ماتحت الحواجب او اي مكان تبينه وتوزعينها باللي تبين سواء نفس الفرشه او غيره لما تشوفينها بالعلبه تتفاجأين انها زي القلم وتحسين انها صعبه بس لما تستعملينها تمشي معك على طول بكل سهوله .
هالاضاءه مب شرط تستعملينها مع الفل ميك اب بما انها طبيعيه حلوه حتى لو انك حاطه ميك اب سمبل وتبين طله بسيطه وخفيفه بصراحه افضلها على الهاي بيم لأن هاذي اسهل واسرع بالاستعمال وتناسب جميع البشرات السمراء والبيضاء .
سواتش :

مبينه بالصوره غامقه لكن على البشره روعه وطبيعيه .

* سعرها ١٤٥ ريال سعودي .  
* متوفر في محلات وجوه ٬ سيفورا . 
* اتمنى انكم استفدتوا و لا تنسون التعليق والمشاركه ♥ ♥ :)
* للاشتراك في مدونتي اضغطي على الرابط الموجود في اليمين . 
* وللأستفسارات السريعه والمتابعه انا موجودة على التويتر ( تويتر نوره بيوتي بوكس )